लुकस 7
7
कप्तानस ही पत्तअना
(मत्तिस ८:५-१३)
1येसुस तंग्हय हुरमी कत्थन आलरिन तिंगका ख़ोख़ा आस कफरनहुम नू केरस। 2असन ओन्द रोमी कप्तानस#७:२ कप्तानस १०० गोट्टेर सेनार ही अगुवास! ही ओन्द दुलार दासस रहचस, आस बेमार मन्जस की खेएना लेखा मन्जका रहचस। 3एकाबिरी आस येसुस ही पत्त नू मेन्जस, ताब आस ही दाससिन कोड़े नना चिआ बआ की आस यहुदी अगुवारिन बिन्ती नना तइयस। 4अबड़र येसुस हेद्दे बरचर की एकअन्नेम हूँ बरके बआ की बिन्ती नन्नुम बआ हेल्लरर, “आस निंग्हय संगरा ख़क्खना जोगे रअदस। 5एन्देरगेका आस नम्हय जतियरिन चोन्हा नन्दस, अउर आसुम नमा गे ओन्टा यहुदिर ही सभाएड़पा कमचका रहचस।”
6औंगे येसुस आर गने केरस। कप्तानस ही एड़पा हेद्दे अड़सा बिद्दका रहचस ख़ने, आस तंग्हय संगेरिन येसुस हेद्दे एन्ने बाचस की तइयस, “अना उर्बायो, निन दुक्खे मला उठबआ, एन ई जोगे मलकन का निन एंग्हय एड़पा नू बरओय, 7अउर एन अपनेम हूँ निंग्हय हेद्दे बरना जोगे ही मलकन। लेकिन बचन लेका बआ चिआ, अउर एंग्हय दासस कोड़े मनोस कालोस। 8एन्देरगेका एन हूँ अधिकार किइयाँ रऊ आलन हिकदन, अउर एंग्हय अधिन नू सिपाहिर रअनर। एन ओर्तोसिन ‘कला’ बअदन, होले आस कादस, अउर दोसरसिन ‘बरा’ बअदन होले बरदस अउर एन एंग्हय नोकरसिन ‘इदिन नना’ बअदन, होले आस अदिन नन्दस।”
9ई कत्थन मेन्जस की येसुस छक्केम मन्जस, अउर तंग्हय ख़ोख़ा बरऊ आलर तरा किर्रियस की बाचस, “एन निमरिन बअदन, एन इस्राएल नू हूँ एन्ने कोहाँ पत्तअना मला ख़क्खका रहचकन।”
10एकाबारी तइका आलर किर्रियर की केरर, अबड़र आ दाससिन कोड़े मन्जका ख़क्खियर।
बेवा ही तंग्दस उज्जताचका
11दोसरा उल्ला येसुस नाइन नामे ही ओन्टा सहर नू केरस, आस ही चेलर अउर ओन्टा कोहाँ गोहड़ा आस गने केरर। 12एकाबिरी आस सहर ही बली हेद्दे अड़सका रहचस, ख़ने ओन्टा बेवा ही ओन्टे लेका तंग्दस ही मुरदन चेड़अर की काला लगियर। सहर ता एका बग्गे आलर अदी गने रहचर। 13एकाबिरी उर्बा येसुस अदिन इरियस, ख़ने आस ही जिया अदी खतरी दया ती निन्दिया, ताब अदिन बाचस, “मला चिख़य।” 14ख़ने येसुस, हेद्दे बरचस की संघड़ान ओंसस, अउर चेड़ऊ आलर इज्जर केरर। आस बाचस, “ए जोख़य, एन निंगन बअदन, चोआ।” 15ताब केच्चका आलस चोचस की उक्कियस अउर कच्छनखरा हेल्लरस। येसुस आसिन तंगियो गे सोप्चस चिच्चस।
16ख़ने होरमा आलर इल्चियर, अउर धर्मेस ही महबा नन्जर, अउर बाचर, “ओन्द कोहाँ अगमजानिस नम्हय मझही नू एथरका रअदस, अउर धर्मेस तंग्हय आलरिन संगरा नना गे बरचका रअदस।”
17आस ही पत्त नू ई खबर हुरमी यहुदिया अउर हेद्दे-हेद्दे ता हुरमी जिला गुट्ठी नू बिड़रा।
बप्तिस्मा चिऊ युहन्नास ही मेन्ना ख़ोजना
(मत्तिस ११:२-१९)
18युहन्नास ही चेलर ई हुरमी कत्थन आसिन तिंगियर चिच्चर। ख़ने युहन्नास तंग्हय दुई गोड़े चेलारिन मिख़ियस। 19युहन्नास अबड़रिन उर्बा येसुस हेद्दे इदिन मेना गे तइय्यस, “ने बरऊ बला रअदस, एन्दरा निनिम हिकदय? का एम दोसरस ही आसे एरोम?”
20एकाबिरी अबड़ा आलर येसुस हेद्दे बरचर की मेन्जर, “बप्तिस्मा चिऊ युहन्नास एमरिन इदिन मेना गे निंग्हय हेद्दे तय्यका रअदस, ने बरऊ बला रअदस, एन्दरा निनिम हिकदय? का एम दोसरा नेख़अम आसे एरोम?”
21आ बेड़ा नुम येसुस बग्गे रोगियर, मलदव बोलता लक्कारिन कोड़े नन्जस अउर बग्गे अन्धारिन एःरा ओंगना कमचस। 22ताब आस युहन्नास ही चेलारिन बाचस, “कला, अउर एन्दरा निम इरकर अउर मेन्जकर, कला की युहन्नासिन बआ चिआ, अन्धार एःरा ओंग्गनर, लंगड़र एकनर, कोढही रोगियर कोड़े मन्नर, बहिरा आलर मेन्नर, केच्चकार उज्जा चोअनर, गरिबरिन दवसमाचार तेंगतारआ लगी।#यसायाहस ३५:५-६; ६१:१ 23धैन रअदस आ आलस ने एंग्हय मइयाँ संखा मला नन्दस।”
24युहन्नास तइका चेलर किर्रका ख़ोख़ा, येसुस युहन्नास ही पत्त नू आलरिन बआ हेल्लरस, “निम फिटकी अड्डा नू एन्दरा एःरा केरकर? एन्दरा ताका ती नुकुरना ख़मी घाँसीन? 25ताब निम एन्दरा एःरा उरख़क्कर? एन्दरा दव झुलन अत्तका आलसिन एःरा गे का? बेस्स-बेस्स झुला अत्तका आलर अउर सुक्खे नू उज्जू आलर तो बेलस ही एड़पा नू रअनर। 26लेकिन निम एन्दरा एःरा बाहरी उरख़कर? एन्दरा अगमजानिसिन? मानिम, एन बअदन, निम अगमजानिस ती हूँ ढेर कोहाँ आलासिन इरकर। 27एन्देरगेका युहन्नास ही पत्त नू धरमपुथी नू धर्मेस एन्ने बाचका रअदस,
‘एःरा, एन एंग्हय दुतसिन निंग्हय ती अगू-अगू तइय्या लगदन,
आस निंग्हय अगु निंगा गे डहरेन सपड़ओस।’”#मलाकिस ३:१
28एन निमन बअदन, “मुक्कर ती कुन्दुरका मधे नू ने हूँ युहन्नास ती कोहाँ मल्लर, अन्नू हूँ ने धर्मेस ही राजी नू होरमर ती सन्नी रअदस आस युहन्नास ती हूँ कोहाँ रअदस।”
29होरमा आलर अउर बटी उठबुउर इदिन मेन्जर की धर्मेस ही कत्था मानिम इन्झरर, एन्देरगेका आर युहन्नास ती बप्तिस्मा होच्चका रहचर। 30लेकिन यहुदी बअना फरिसिर अउर मोसास ही व्यवस्था सिखाबउर तो धर्मेस ही मने आबोन तरकुटी नन्जका लेके युहन्नास ती बप्तिस्मा मला होच्चर।
31येसुस बाचस, “अक्कू ई पिढ़ी ता आलरिन एन नेख़ाय गने जोक्खओन? अबड़र एका लेखा रअनर? 32अबड़र तो बजार नू रऊ ख़द्दर लेखा रअनर, आर तम्हय-तम्हय नू एन्ने बअनर, ‘एम निमा गे बंसरी उरचकम, लेकिन निम मला नलकर, अउर एम दुक्खे ही डन्डी पाड़कम, निम मला चिख़कर।’ 33ख़ने बप्तिस्मा चिऊ युहन्नास बरचस, आस न तो असमा मोख़दस न अंगुर रासी ही मध ओना लगियस। निम ‘आसिन नाद लक्की र' ई’ बअदर। 34धर्मेस तय्यका एन आल तंग्दस बरचस, अउर मोक्खस अउर ओन्डस, अउर निम आसिन, ‘ओन्टा खौहट, उंखुस अउर बटी उठबुउर ही अउर पपहर ही संगे बअदर!’ 35लेकिन बुद्धी लेखा जिन्गी उज्जुर दुम बुद्धी मानिम हिके बअनर की एदनर।”
पापी आली गे छेमा
36यहुदी बअना फरिसिर मझही ती ओर्तोस येसुसिन ओना गे पाही मिख़ियस, अउर येसुस आ फरिसिस ही एड़पा नू केरस की ओना गे उक्कियस। 37आ सहर नू ओन्टा पपहा आली रहचा। फरिसिस ही एड़पा नू येसुस ओना गे उक्का रअदस बअना मेन्जा, अउर ओन्टा बेस्स कुना सिसी#७:३७ ओन्टा बेस्स कुना सिसी अलाबास्टर बअना सुन्दर पन्डरु अउर बालका रंग ही पखना ती कमरका सिसी रहचा। नू महंगा गमकारना इसुंगन ओन्दरा की बरचा। 38अउर ख़ोख़ा ती येसुस ही ख़ेड्ड हेद्दे इज्जा, चिख़नुम आस ही ख़ेड्डन ख़ंजलख़ो ती चयदआ हेल्लरा, अउर तंग्हय कुक्क ता चुट्टी ती चिच्तेम आस ही ख़ेड्डन चुंखिया, अउर आ गमकारना इसुंगन ख़ासआ हेल्लरा। 39येसुसिन पाही मिख़का फरिसिस इदिन इरयस की जिया नू एन्ने बआ हेल्लरस, “इस मानिम अगमजानी रअदस होले, आसिन ओंसका आली ने हिके अउर एकन्ने खल्ल ही पपहा आली हिके बअना अख़ओस दने।”
40येसुस आ फरिसिसिन बाचस, “अना सिमोन, एंगा गे निंगन ओन्टा कत्था बअना र' ई।”
आस बाचस, “अना गुरु, बआ।”
41“ताब येसुस बाचस, एकअम ओन्टा ओरोत आलस गने दुई गोड़े आलर रिन होच्चका रहचर। ओर्तोस पाँच सय अउर दोसरस पचास चँदी ही ढिबा रिन होच्चका रहचस। 42लेकिन आर गुसन तंग्हय रिन किरतआ गे मला रहचा, ख़ने आस इबड़र ही रिनन अम्बियस चिच्चस। अक्कू एंगन बआ तो, इबड़र ती ने बग्गे आसिन चोन्हा ननोस?”
43सिमोनस बाचस, “नेख़ाय बग्गे रिन अम्बतारा केरा।” येसुस आसिन बाचस, “निन मानिम बाचकय।”
44अदिही ख़ोख़ा येसुस आली तरा इरयस की सिमोनसिन बाचस, “ई आलिन एरदय? एन निंग्हय एड़पा नू बरचकन, लेकिन निन एंगा गे ख़ेड्ड नोढ़ोरआगे अम्म मला चिच्चकय, लेकिन ई आलिद एंग्हय ख़ेड्डन ख़ंजलख़ो ती नुड़िया, अउर तंग्हय चुट्टी ती चिंचिया। 45निन एंगन स्वागत नना गे गल्ले नू मला चुंखकय#७:४५ स्वागत नना गे गल्ले नू मला चुंखकय यहुदी चलन इद आदर नना चिन्ह हिके।, लेकिन ई आली तो, एन एकाबिरी बरचकन आ बिरी ती, एंग्हय ख़ेड्डन चोंखागे मला अम्बिकी र' ई। 46निन एंग्हय कुक्क नू इसुंग मला ख़स्सकय#७:४६ कुक्क नू इसुंग मला ख़स्सकय यहुदिर नू खास पाहियरिन आदर नना की स्वागत नन्ना चलन रहचा।, लेकिन इद तो एंग्हय ख़ेड्ड नू गमकारना इसुंग ख़स्सा। 47औंगे एन निंगन बअदन, इदी ही बग्गे पाप गुट्ठी छेमा मन्जकी र' ई, एन्देरगेका ई आलिद बग्गे चोन्हा एदचकी र' ई। लेकिन नेकन थोरे छेमा नन्तारा, आर थोरे चोन्हा नन्नर।”
48ख़ने आस आ आलिन बाचस, “निंग्हय बग्गे पाप गुट्ठी छेमा मन्जकी र' ई।”
49असन ओना उक्का आलर ताम-ताम बआ हेल्लरर, “पाप छेमा ननू इस ने हिकदस?”
50आस आ आलिन बाचस, “निंग्हय पत्तअना निंगन बछाबाचकी र' ई, सान्ती गने कलेय।”
Currently Selected:
लुकस 7: KRUX
Highlight
Share
Compare
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
