लुकस 16
16
चलाक इरु-ख़ुजुस ही खिरी
1फेर येसुस तंग्हय चेलारिन बाचस, “एकअम उरुब आलस ही ओरोत इरु-ख़ुजुस रहचस। आस तंग्हय उरुबस ही खुर्जिन बुड़ाबआ लगदस बआ की आलर आ उरुबसिन बाचर चिच्चर। 2ताब उरुबस आसिन मेख़दस की बअदस, ‘एन निंग्हय पत्त नू एन्दरा मेन्जकादन? निंग्हय हुरमी हिसाब एंगा गे चिआ, एन्देरगेका निन अक्कू इरु-ख़ुजू मला मना ओंगोय।’ 3ख़ने इरु-ख़ुजुस तंग्हय जिया नू सोच्चस, ‘उरुबस एंगन नलख ती ओथरआ लगदस, अक्कू एन एन्दरा ननोन? आरख़ाजोतआ गे सवंग मल्ला, अउर तेम्बा गे एंगा लज्जे लग्गी। 4अक्कू एन एन्दरा नना पड़ारओ, एन सोच्चकन होच्चकन! इरु-ख़ुजू नलख ती ओथोरका ख़ोख़ा आलर एंगन एड़पा नू एकन्ने स्वागत ननोर।’ 5ख़ने आस तंग्हय उरुबस ही रिन होच्चका आलरिन ओन्द-ओन्द नन्जस की मिख़ियस। अउर पहिल आलसिन बाचस, ‘निंगा गे एंग्हय उरुबस ही रिन कय बग्गे र' ई?’ 6आस बाचस, ‘तिन हजार लिटर इसुंग।’ ताब इरु-ख़ुजुस आसिन बाचस, ‘निंग्हय तमसुक ओन्दरआ अउर चाँड़े ओक्का की पन्दरा सय लिटर लिखआ।’ 7ख़ने आस दोसरा आलसिन बाचस, ‘निंग्हय रिन कय बग्गे र' ई?’ आस बाचस, ‘तिन सय पचास क्विन्टल गोहोम।’ आस बाचस, ‘निंग्हय तमसुक ओन्दरआ अउर तिन सय क्विन्टल लिखआ।’ 8ई कत्थन अख़चस की आ उरुबस तंग्हय अधर्मी इरु-ख़ुजुस ही तारिफ नन्जस, एन्देरगेका ई ख़ेख़ेल ता आलर तंग्हय पिढ़ी ता दोसरा आलर गने नलख नन्नर होले बिल्ली ता ख़द्दर ती और बग्गे चलाक मन्नर।”
9एन निमरिन बअदन, “ख़ेख़ेल ता खुर्जी ती संगे गुट्ठी कमआ, अन्ने नन्दर होले आ खुर्जी मुन्जरओ होले, निमन जनमजुग ता एड़पा नू स्वागत ननतारओ। 10ने एकदम सन्नी कुना कत्था नू इमानदार मन्दस, आस कोहाँ कत्था नू हूँ इमानदार मन्दस, अउर ने एकदम सन्नी कुना कत्था नू बेइमान मन्दस, आस कोहाँ कत्था नू हूँ बेइमान मन्दस। 11औंगे निम ख़ेख़ेल ता धन नू इमानदार मला मन्जकर होले, ने निमन मेर्ख़ा ता मानी धन ही जिम्मा चिओर दरा? 12अउर निम दोसरर ही धन नू इमानदार मला मन्जकर होले, निम्हय अपना धन निमा गे ने चिओ दरा?
13“एकअम नोकरस दुई गोड़े उरुबर ही सेवा नना पोल्लनर, एन्देरगेका आस ओर्तोसिन हिंड़ओस की दोसरसिन चोन्हा नन्दस, या आस ओर्तोस ही भक्त मन्दस की दोसरसिन ख़ाँड़दस। निम धर्मेसिन अउर खुर्जिन दोनोन सेवा नना पोल्लोर।”
व्यवस्था अउर धर्मेस ही राजी
(मत्तिस ११:१२-१३; ५:३१-३२; मरकुस १०:११-१२)
14इबड़ा हुरमी कत्थन मेन्जर की धन ही लोभी यहुदी बअना फरिसिर येसुस मइयाँ अलखियर। 15ख़ने आस आरिन बाचस, “निम आलर ही एरना नू गा तंगनुम धर्मी एदआ बेद्दर, लेकिन धर्मेस निम्हय जिया ता कत्थन अख़दस। एन्देरगेका एकदा आलर ही मझही नू कोहाँ र' ई आद धर्मेस ही एरना नू ख़ाँड़ना र' ई।
16“बप्तिस्मा चिऊ युहन्नास ही बेड़ा गुटी मोसास ही व्यवस्था अउर अगमजानिर गुटी दव कत्था गुट्ठी तेंगतारा। आ बेड़ा ती धर्मेस ही राजी ता दवसमाचार तेंगरआ लगी, अउर होरमर आ राजी भितरी कोरआ गे बड़पेलहा नन्नर। 17लेकिन मेर्ख़ा अउर ख़ेख़ेल एबसेरआ की काला उंगी लेकिन धर्मेस ही व्यवस्था ता ओन्टा बिन्दू हूँ मला मेटरओ।
18“नेकइम तंग्हय आलिन अम्बदस की दोसरा बेंजरदस, आस भडुवा नलख नन्दस, अउर दोसरा अम्बकन बेंजरउस हूँ भडुवा नलख नन्दस।”
उरुब आलस अउर लाजरसस
19“ओरोत उरुब आलस रहचस, आस हुरमी उल्ला दव-दव झुला अत्ता पुन्दरआ लगियस अउर सुख-सौरत ही जिन्गी उज्जा लगियस। 20अउर आस ही बली नू भैर देह खादी-खादी निन्दरका लाजरस नामे ही ओरोत गरिब आलस ओक्का लगियस। 21आस आ उरुब आलस ही टेबुल ती खतरका जुट्ठा-कट्ठान मोख़ा की तंग्हय कुलन उड़तआ बेद्दा लगियस। अल्ला गुट्ठी हूँ बरआ की आस ही खादिन टाटा लगिया। 22ओन्द उल्ला आ गरिब आलस केच्चस, अउर मेर्ख़ादुतर आसिन होच्चर की अबराहामस हेद्देम उइय्यर चिच्चर। अउर आ उरुब आलस हूँ केच्चस अउर माड़रस। 23अउर चिच्च गड्डी नू बग्गे कलपारनुम आस मेन इरियस, अउर गेच्छा ती अबराहामसिन अउर आस ही कोइछा नू मन्जका लाजरससिन इरियस। 24ख़ने आस चिच्चियारस की बाचस, ‘अना बोय अबराहाम, एंग्हय मइयाँ दया नना, अउर लाजरससिन तइय्या चिआ का आस तंग्हय अंगलिन अम्म नू जोबोड़ओस की एंग्हय ततख़न किरतओस, एन्देरगेका एन ई चिच्च नू एकदम कलपारआ लगदन।’ 25लेकिन अबराहामस बाचस, ‘अना बेटा, निन निंग्हय जिन्गी नू हुरमी सुखे चिजन ख़क्खका रहचकय, लेकिन लाजरसस दुक्खे-दुख ख़क्खका रहचस। लेकिन अक्कू आस इसन सुखे अउर सान्ती ख़क्खका रअदस अउर निन कलपारआ लगदय। 26इद लेका मला, एम्हय अउर निम्हय मझही नू ओन्टा कोहाँ गड्डी र' ई। औंगे इसते ती आ पक्खे निम्हय गुसन कला बिद्दुर कला पोल्लोर, अउर ने हूँ असले ती इपक्खे एम्हय गुसन बरआ पोल्लोर।’ 27आस बाचस, ‘होले अना बबा, एन निंगन बिन्ती नन्दन का निन लाजरससिन एंग्हय बबस ही एड़पा नू तइय्या चिआ, 28एन्देरगेका एंग्हय पाँच भइर रअनर, अउर आस आर गे चेताबओस, महलेता आर हूँ ई कलपारना अड्डा नू बरओर होत्एन।’ 29लेकिन अबराहामस बाचस, ‘आर गुसन मोसास अउर अगमजानिर ही पुथी र' ई। आर अदिन मेना नेकआ।’ 30लेकिन आस बाचस, ‘मला, बबा अबराहाम, अगर एकअम ओर्तोस केच्चकन्ती नेकइम आर गुसन कालोर होले, आर पाप ती जियन किरतओर।’ 31लेकिन अबराहाम आसिन बाचस, ‘मोसास ही अउर अगमजानिर ही कत्थन मला मेन्नर होले, नेकइम केच्चकन्ती उज्जा चोओर होले हूँ आर मला पत्तओर।’”
Currently Selected:
लुकस 16: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
