लुकस 15
15
एबसेरका मेढ़हो ही खिरी
(मत्तिस १८:१२-१४)
1एकाबिरी बटी उठबुउर अउर पपहर होरमर आस ही सिखाबअनन मेना गे आस गुसन बरआ लगियर। 2ख़ने यहुदी बअना फरिसिर अउर मोसास ही व्यवस्था सिखाबउर एन्नेकी गनगन नना हेल्लरर, “ई आलस तो पपहरिन स्वागत नन्दस अउर अबड़र गने ओक्दस की ओन्दस।” 3ताब आस अबड़रिन ई खिरिन तिंगियस,
4“निम्हय मधे एका ओरोत आलस रअदस होत्एन, नेख़य ओन्द सय मेढ़हो र' ई, अगर इबड़न्ती ओन्टा एबसरओ होले निनाबेन चौरिनुम अम्बोस की आ एबसेरका मेढ़होन मला ख़क्खरना गुटी मला बेद्दोस दरा? 5एकाबिरी एबसेरका मेढ़होन ख़क्खदस, ताब आस खुसमारनुम अदिन तंग्हय कान्हा नू चेड़दस, 6अउर एड़पा बरदस की तंग्हय संगेरिन अउर परोसियरिन मेख़दस, अउर अबड़रिन बअदस, ‘एंग्हय गने रिझरआ, एन्देरगेका एन एबसेरका मेढ़होन ख़क्खका रअदन।’ 7एन निमन बअदन, एन्नेकिम पाप ती जियन किर्तअना ही चाड़ मलका निनाबे धर्मी आलर खतरी ती तंग्हय पाप ती जियन किर्तअना ओन्टा पपहा आलस खतरी मेर्ख़ा नू कोहड़े खुसमारना मनो।”
एबसेरका डल्लर ही खिरी
8“एका आली र' ई होत्एन, नेख़य गुसन दस ठो चँदी ही डल्लर र' ई, अउर आ मधे ओन्टा एबसरओ होले बिल्लिन दगई की आद एड़पन इर्री-उथरी की मला ख़क्खरना गुटी मेहनत ती मला बिद्दी? 9एकाबिरी आद अदिन ख़क्खी, ताब आद तंग्हय संगेरिन अउर परोसियरिन मिख़ी की बई, ‘एंग्हय गने रिझरआ, एन्देरगेका एन एंग्हय एबसेरका डल्लरन ख़क्की रएन।’ 10एन निमरिन बअदन, एन्नेम पाप ती जियन किर्ताचका ओरोत पपहा आलस ही खतरी धर्मेस ही मेर्ख़ादुतर गुसन खुसमारना मनो।”
एबसेरका तंग्दस ही खिरी
11येसुस फेर बाचस, “एकअम आलस ही दुई गोड़ेर तंगदाबगर रहचर। 12ओन्द उल्ला सन्नी तंग्दस तम्बासिन बाचस, ‘बबा, एंग्हय बखरा नू पड़ारना खुर्जी ही अंस एंगा गे चिआ।’ ख़ने आस आर गे तंग्हय खुर्जिन ख़ट्टियस चिच्चस। 13थोरे उल्ला ख़ोख़ा सन्नी तंग्दस हुरमी धन-खुर्जिन होच्चस की गेच्छा राजी नू केरस, अउर असन आस तंग्हय खुर्जिन मलदव नलख नन्जस की गोट्टेन मुन्जियस। 14आस हुरमिन खरचा नन्जका ख़ोख़ाम आ राजी नू कोहाँ अकाल पड़ारा, अउर आस गे चाड़ मना हेल्लरा। 15औंगे आस आ राजी ता ओरोत आलस गुसन नलख नना केरस, अउर आ आलस आसिन तंग्हय ख़ल्ल नू किस्स मेन्तआ गे तइय्यस। 16ख़ने आस किस्स गुट्ठी मोख़ना चरा ती आस तंग्हय कुलन उड़तआ बेद्दा लगियस, लेकिन नेकउम आस गे एन्दरा हूँ मला चिआ लगियर। 17आ बिरिम आस ही चेत खुल्लरा अउर आस बाचस, ‘एम्बस गुसन बग्गे नोकरर कुल उड़ना गुटी ओन्नर मोख़नर की हूँ एंगरई, लेकिन एन इसन किड़ा ती खेआ लगदन!’ 18अक्कू एन चोओन की बबस गुसन कालोन की बओन, ‘अना बबा, एन मेर्ख़ा अउर निंग्हय बिड़दो नू पाप नन्जका रअदन। 19अक्कू ती एन निंगदन बारना जोगे ही मलकन। औंगे एंगन निंग्हय ओरोत नोकर लेखा उइया।’ 20ताबसिले आस चोचस की तम्बस गुसन किर्रियस।
“लेकिन आस गेच्छम रहचस ख़नेम आस ही तम्बस आसिन इरियस, अउर आस ही जिया सोग्गे ती निन्दिया केरा अउर बुंगनुम केरस की आसिन ख़ुइच्चियस की चुंखियस। 21ख़ने तंग्दस आसिन बाचस, ‘अना बबा, एन मेर्ख़ा अउर निंग्हय बिड़दो नू पाप नन्जका रअदन। अक्कू ती एन निंग्हय निंगदन बारना जोगे मलकन।’ 22लेकिन तम्बस तंग्हय नोकररिन बाचस, ‘चाँड़ेम हुरमी ती बेस झुला ओन्दरआ अउर इसिन अत्तआ चिआ। इस ही ख़ेक्खा नू मुद्दी अत्तआ चिआ, अउर ख़ेड्ड नू जुतन अत्तआ चिआ, 23अउर मोटा जानबर ओन्दरआ की ख़ोता, अउर नाम ओनोत, मोख़ोत की रिझरओत! 24एन्देरगेका एंग्दस केच्चका रहचस, अउर उज्जका रअदस, इस एबसेरका रहचस, अक्कू ख़क्खरका रअदस।’ अउर अबड़र रिझरआ हेल्लरर।
25“आ बेड़ा आस ही कोहाँ तंग्दस ख़ल्ल नू रहचस, अउर आस एड़पा हेद्दे अड़सियस ख़ने आस अस्सना पाड़ना नलना मेन्जस। 26ख़ने आस ओरोत नोकरसिन मिख़ियस की मेन्जस, ‘इबड़ा एन्दरा मना लगी?’ 27ख़ने आस बाचस, ‘निंग्ड़िस बरचका रअदस, अउर निम्बस आसिन कोड़ेम-कोड़ेम ख़क्खियस ख़ने ओन्टा पोसका मोटा जानबरन ख़ोत्ताचस।’ 28इदिन मेन्जस की कोहाँ तंग्दस कयरारस, अउर भितरी कोरआ मला बिद्दियस। आस ही तम्बस उरख़स की आसिन बुझाबआ हेल्लरस। 29लेकिन आस तम्बासिन बाचस, ‘एःरा, एन इवंदा बछर गुटी निंग्हय सेवा नना लगदन, अउर इकला हूँ निंग्हय पेसकन मला एस्सकन रअदन, अन्नू हूँ एन एंग्हय संगेर गने रिरयारआ गे निन एंगा गे ओन्टा पठरु इकला हूँ मला चिच्चकय। 30लेकिन निंग्हय खुर्जिन भडुवा नलख ननुर गने मुन्जुस ई निंग्दस ही खतरी पोसका मोटा जानबरन ख़ोत्तकय!’ 31ताब तम्बस आसिन बाचस, ‘एःरा बेटा, निन तो सगरो एंग्हय गने रअदय, अउर एंग्हय हुरमी खुर्जी निंग्हय दिम हिके। 32लेकिन नमा गे खुसमारना अउर रिझिरना रहचा, एन्देरगेका ई निंग्ड़िस केच्चका रहचस, फेर उज्जका रअदस, अउर एबसेरका रहचस, ख़क्खरका रअदस।’”
Currently Selected:
लुकस 15: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
