लुकस 17
17
पाप अउर छेमा
(मत्तिस १८:६-७, २१-२२; मरकुस ९:४२)
1ओन्द उल्ला येसुस तंग्हय चेलारिन बाचस, “मानिम आलरिन पाप नन्तअना परिक्छा गुट्ठी बरओ। लेकिन ओहरे, नेख़ाय ती अबड़ा बरई! 2ओन्टा आलस ई सन्निर ख़द्दर लेखा आलर ती एकअम ओर्तोसिन पाप नन्तअना ती, अन्ने आलस गे तो आस ही ख़ेसेर नू जतन हेआकी समुन्दर नू हेबड़ना चिअना होले दव मनो। 3औंगे होसियार रआ!
“अगर एंगन पत्तऊ आलर निंग्हय बिड़दो नू मलदव ननोर होले, आर ही मलदव नलखन एदआ चिआ। 4आ आलस उल्ला नू बग्गे बेर निंग्हय बिड़दो नू पाप नन्दस की हुरमी बेर निंग्हय गुसन बरदस की ‘एंगन छेमा नना चिआ’ बअदस होले, आसिन छेमा नना चिआ।”
येसुस पत्तअना ही पत्त नू सिखाबअदस
5ख़ने बारहो मुध चेलर उर्बासिन बाचर, “उर्बायो, एम्हय पत्तअनन बड़ियर नना चिआ।”
6उर्बास आरिन बाचस, “निम्हय गने राई ही ओन्टा दाना लेखा हूँ पत्तअना रहचका होले निम ई तुँती मन्नन, ‘निन चड़रअय की समुन्दर नू इदरअय कलय’ बओर होले आद निम्हय पेसकन मनओ।”
नोकरस ही नलख
7“मानआ होआ का, निम्हय मझही ती नेकउम तंग्हय नोकरस ख़ल्ल ती नलख नन्दस की महले मेढ़हो मेन्तआदस की बरदस होले, ‘चाँड़े बरा अउर ओक्का की मन्डी ओना’ बअदर दरा? 8मुन्दा आसिन एन्ने बअदर, ‘एंग्हय खतरी मन्डी सपड़आ, अउर एंग्हय ओन्ना-मोख़ना मला मुन्जरना गुटी एंग्हय तेतर-सुसर नना। अदिही ख़ोख़ा निन हूँ ओनके मोख़के।’ 9आ नोकरस उरुबस ही पेसका लेखा नलख नन्जस बअदस की उरुबस आस गे धन्यवाद चिओस दरा? मानिम मला चिओस! 10एन्नेकी निमरिन पेसका हुरमी नलख मुन्जका ख़ोख़ा एन्ने बअके, ‘एम तो नोकर लेका हिक्दम, एम तो निन बाचका नलखन लेका नन्जका रअदम।’”
येसुस दस कोढही रोगियरिन कोड़े नन्दस
11येसुस यरुसलेम काला लगियस ख़ने, सामरिया अउर गालिल प्रदेस ता सिमाना ती मन्जस की काला लगियस। 12ख़ने आस ओन्टा पद्दा नू कोरआ लगियस ख़ने कोढही रोग लक्का दस गोड़े आलर आसिन ख़क्खियर। 13गेच्छम इज्जर#१७:१३ गेच्छम इज्जर कोढही रोग लक्का आलर नन्नर हेद्दे मला काला पबआ लगियर बअना मोसास ही व्यवस्था नू टुड़रकी र' ई। लेविर १३:४६ नू एःरा। की अबड़र चिच्चियारर की बाचर, “अना, येसू उर्बायो, एम्हय मइयाँ सोग्गे नना।”
14ख़ने येसुस आरिन इरियस की बाचस, “कला, निम अपनेम यहुदी नैगरिन एदआ।” अउर अबड़र कानुम-कानुम कोड़े मन्जर केरर।#लेविर १४:१-३२
15अबड़र कोड़े मन्जका कत्थन अख़चका ख़ोख़ा आर मधे ती ओर्तोस तान कोड़े मन्जकन अख़चस की जोरसे चिच्चियारनुम धर्मेस ही महबा नन्नुम किर्रियस। 16अउर येसुस ही ख़ेड्ड नू खत्तरस की धन्यवाद चिच्चस। आस सामरी#१७:१६ सामरी सामरिर हूँ यहुदिर ही ख़द्दर दुम रहचर, लेकिन आर बिदेसिर गने बेन्जरका रहचर। आर यहुदिर लेखा यरुसलेम नू धर्मेस ही ओहमा मला नना लगियर। यहुदिर सामरिरिन हिंड़आ लगियर अउर सामरिर धर्मेस ही आलर मलनर बआ लगियर। रहचस। 17ख़ने येसुस बाचस, “कोड़े तो दसो गोड़े मन्जर। होले अबड़ा नौ गोड़ेर एसन रअनर? 18ई सामरिस लेका किर्रोसबरओस की धर्मेस ही ओहमा ननोस, एन्दरा दोसरर ने हूँ मला मन्जर दरा?” 19ख़ने येसुस आसिन बाचस, “चोआ की कला, निन पत्ताचकय, आदिम निंगन कोड़े नन्जा।”
धर्मेस ही राजी ही बरना
(मत्तिस २४:२३-२८, ३७-४१)
20ओन्द उल्ला यहुदी बअना फरिसिर येसुसिन धर्मेस ही राजी इकला बरओ बाचर की मेन्जर ख़ने, येसुस आरिन एन्ने बाचस, “धर्मेस ही राजी आलर अख़ना लेखा मला बरओ। 21ने हूँ धर्मेस ही राजिन ‘एःरा, इसन र' ई!’ का ‘असन र' ई!’ बआ पोल्लोर। एन्देरगेका एःरा, धर्मेस ही राजी निम्हय मझही नुम र' ई।”
22ताब आस चेलारिन बाचस, “एकअम एन्ने बेड़ा बरओ का, धर्मेस तय्यका एन आल तंग्दस राजी नन्जका ओन्द उल्लान एःरा ओंगना होले हूँ मनो पहें बआ की निम बओर, लेकिन निम एःरा पोल्लोर। 23आ बेड़ा आलर निमरिन बओर, ‘एःरा, आस इसन रअस!’ या ‘एःरा, आस असन रअस।’ लेकिन आसिन एःरा गे निम आर ही ख़ोख़ा-ख़ोख़ा अम्मके बोंगा। 24एन्देरगेका एकन्ने बिजली मेर्ख़ा ही ओन्द कोड़ा ती आ कोड़ा गुटी लौकारनुम बिल्ची, अन्नेम धर्मेस तय्यका एन आल तंगदन बरना उल्ला नू हूँ अन्नेम एथरओन। 25लेकिन एन्ने मन्ना ती अगू एंगा गे बग्गे दुक्खे खेपआ पड़ारओ अउर अक्कू ई जाती ता आलर एंगन मला इन्झरओर।
26“ढेर बछर पहेला नुह बअना आलस ही बेड़ा नू मन्जका लेखा, धर्मेस तय्यका एन आल तंगदन किर्राकी बरना बेड़ा नू हूँ अन्नेम मनोन।#सिरजन ६:५-८; मत्तिस २४:३७-३९ 27नुहस कोहाँ डोंगा भितरी मला काना गुटी आलर पहले ता लेखम ओना लगियर, मोख़ा लगियर, बेंजरआ लगियर। आ बिरिम कोहाँ बढ़ही बरचा अउर आरिन पिटया।#सिरजन ७:६-२४
28“लोतस ही बेड़ा नू हूँ अन्नेम मन्जकी रहचा। आलर ओना लगियर, मोख़ा लगियर, ख़ेदा-बिसा लगियर, इद्दआ लगियर, एड़पा कमआ लगियर।#सिरजन १८:२०—१९:२५ 29लेकिन एका उल्ला लोतस सदोम ती उरख़स, अउलम मेर्ख़ा ती चिच्च अउर गन्धक पोस्सा की अबड़ा होरमारिन पिटया। 30अन्नेकिम आलर मला सपड़ारका बेड़ा नू धर्मेस तय्यका एन आल तंगदन एथरओन।
31“अउला ने एड़पा बाहरी मन्दस, आस तंग्हय चिज गुट्ठी होआ गे एड़पा भितरी मला काला नेकआ। अन्नेम ख़ल्ल नू रउर हूँ किर्रा की मला बरआ नेकआ। 32लोतस ही आलिन सुरता नना#१७:३२ लोतस ही आलिन सुरता नना धर्मेस लोतसिन अउर आस ही आलिन सहर ती बोंगा अउर किर्रर मला एःरा बाचका रहचस। लेकिन आस ही आली किर्रर इरिया एन्देरगेका तान अम्बका खुर्जी समान गुट्ठी नू अदी ही जिया लक्की रहचा। औंगे धर्मेस अदिन बेक ही खुटी कमचस चिच्चस।!#सिरजन १९:२६ 33ने तंग्हय जियन बछाबआ बेद्दस आस अदिन एबसओस, लेकिन ने तंग्हय जियन एबसदस आस अदिन ख़क्खदस।
34“धर्मेस तय्यका एन आल तंगदन फेर किर्रोन की बरओन होले दुई गोड़े आलर खटिया नू बिड़रका मनोर। धर्मेस ओर्तोसिन होओस अउर दोसरस अम्बरओस। 35दुई गोड़े मुक्कर सँगेम जता नू अन्न कसते लक्का मनोर। ओरोत होरओ अउर दोसरा अम्बरओ। 36[दुई गोड़े आलर ख़ल्ल नू मनोर, ओर्तोस होरओस, दोसरस अम्बरओस।”]#१७:३६ एकअम-एकअम लिखरका पच्चा बाइबल गुट्ठी नू ई पद मल्ला।
37ख़ने येसुस ही चेलर आसिन मेन्जर, “उर्बायो, ई कत्था एकसन मनो?”
येसुस बिड़दाचस की बाचस, “एकसन मरी र' ई, असन गिधही गुट्ठी बरई बअना कहावत लेखा मलदव आलर गुसन दन्डे बरओ।”
Currently Selected:
लुकस 17: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
