१ तिमोथि 2
2
पर्थनाक बारेम सिछ्या
1ओहेस आब् हम तोरा सभेस अगा यि कह स्यो कि सभे मानुकसिक लागि पर्मेसोरका पर्थना, बिन्ति, निबेदन आ धन्येबाद चर्हा। 2रजा आ सभे बर्कि हाकिमसिक लागि पनि पर्थना कर्। एना कर्ब त आपन्स्या ढुक्क भइक सान्तिस पर्मेसोरक भक्ति कर्ति आदरक जिबन जिअ सक्ब। 3एनामे पर्थना कर्लाहार काम एक्दम अस्लि स्यो। अनि आपन्सिक मुक्ति देल्हार पर्मेसोरका पनि यि मन पर्छो। 4किरकि सभे मानुकस्या मुक्ति पाउस आ सत्ये बातका बुझुस कहिक पर्मेसोरले चाहाछो। 5पर्मेसोर एकेगो छो अनि मानुकसिका पर्मेसोरसङ मिलाप कराइलाहार मानुक पनि एके जना छो, उ चाहिं खिरिस्ट येसु स्यो। 6उ सभे मानुकसिक छुट्कराक मोल तिर लागि बलि भेलो, जुन बातक गबाहि पर्मेसोरले ठिक समैम देल्को। 7एक्रे लागि पर्मेसोरले हम्रा दस्रो जातक मानुकसिका बिस्वास आ सत्ये बात सिखाब लागि पर्चारक आ पेरेरित बनाइल्को। हम साँच्चेक कह स्यो, ठक्ल नाइ स्यो।
8ओहेस हम यि चाहास्यो कि सभे ठावम मरदस्या बिना पिटाइक आ बिना बाद-बिबाद करिक आप्न पबित्र हाथ उठाइक पर्थना करुस। 9एनाहिमे जनिस्या पनि सुहाइलाहार आ आदर भेल्हार खालक नुङासब पिन्हुँस। अरुक ध्यान आप्नभर तान लागि केसक थुप्रे सिङ्गार करिक गर-गहना, हिरा, मोति आ महङ-महङ नुङासब नाइ पिन्हुँस। 10बरु पर्मेसोरक सेबा कर्लाहार जनिस्या अस्लि-अस्लि कामसब करिक आप्न जिबनका सिङ्गारुस। 11मन्डलिक सभे जनिसब अधिनम रहिक चुप-चाप सिखुस। 12तर जनिस्या मरदसिका सिखाइलाहार आ मरदसिक उप्रिम अधिकार चलाइलाहार कामक हम अनुमति नाइ देबो। ओहेस जनिसब चुप-चाप रहुस। 13किरकि पर्मेसोरले अगा आदमका बनाइल स्यो। अनि पछास हब्बाका बनाइल स्यो। 14दस्रो बात आदम सैतानक छलम पर्ल नाइ स्यो तर हब्बा सैतानक छलम परिक पर्मेसोरक बिरोधम पाप कर्ल स्यो। 15तर जनिसब नम्र, दयालु, पबित्र आ बिस्वासका नाइ छोरिक रहतो त ओकर्स्या बच्चाका जनम देतो तैयो मुक्ति पाइतो।
Currently Selected:
१ तिमोथि 2: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
