१ तिमोथि 3
3
एल्डरसिक योग्यता
1यि बात साँच्चेक स्यो कि कुन्हुँ मानुकले मन्डलिक एल्डर बन लागि इच्छा कर्तो त ओक्र बिचार एक्दम अस्लि स्यो। 2तर उ एल्डर चाहिं निर्दोस, एगो मत्रे बहु भेल, आप्न मनका अधिनम राख सक्लाहार, समझदार, अरु मानुकसिस सम्मान पाइल, मेज्बानसिक सेबा-सत्कार कर्लाहार अनि मानुकसिका एक्दम अस्लिमे सिखाब सक्लाहार हब पर्तो। 3उ मध-रक्सि पिक नाइ मत्लाहार, झग्रा नाइ कर्लाहार, नम्र भइक रहलाहार, झनक्क नाइ पिटाइलाहार, सम्पतिक लोभ नाइ कर्लाहार, 4आप्न घर अस्लिमे चलाब सक्लाहार अनि ओक्र बेटा-बेटिस्या ओक्रा आदर कर्लाहार आ ओक्र आग्या मान्लाहार हब पर्तो। 5किरकि आप्न घर-परिबारका अस्लिमे चलाब नाइ सक्लाहार मानुकले केनामे पर्मेसोरक मन्डलिका सम्हाल सक्तो? 6उ लया बिस्वासि हब नाइ हेतो, नत्रे त उ घमन्डि भइक सैतानक जक्या सजाए पाइक नास हेतो। 7उ एल्डरले बिस्वास नाइ कर्ल मानुकसिस पनि मान-सम्मान पाइल रह पर्तो। एहेन रहतो त मत्रे मानुकस्या ओक्र निन्दा नाइ कर्तो अनि उ सैतानक जालम नाइ पर्तो।
डिकनसिक योग्यता
8एनाहिमे मन्डलिम सेबा कर्लाहार डिकनसब पनि इमान्दार आ आदर पाइलाहार लायकक हब पर्तो। ओकर्स्या झुठ नाइ बज्लाहार, नाइ मत्लाहार आ सम्पतिक लोभ नाइ कर्लाहार हब पर्तो। 9ओकर्स्या बिस्वासक गहिंर रहस्येका आप्न बिबेकम जोगाइक राख्लाहार हब पर्तो। 10डिकन बनस अगा ओकर्सिक जाँच् हउस। अनि ओकर्स्या निर्दोस ठहर्तो त मत्रे डिकन भइक सेबा करुस। 11एनाहिमे डिकनसिक बहुसब पनि आदर पाइलाहार लायकक, अरुक बद्नामि नाइ कर्लाहार, आप्न मनका अधिनम राख सक्लाहार आ सभे बातम बिस्वासिलो हब पर्तो। 12मन्डलिम सेबा कर्लाहार डिकन एगो मत्रे बहु भेल अनि आप्न बेटा-बेटि आ परिबारक अस्लिमे देख्भाल कर सक्लाहार हब पर्तो। 13किरकि डिकनस्या आप्न कर पर्लाहार सेबा अस्लिमे कर्तो त ओकर्सिक थुप्रे इज्जत हेतो। अनि ओकर्स्या खिरिस्ट येसुम कर्ल आप्न बिस्वासक बारेम पनि अरुका बिना डेराइक सुनाब सक्तो।
बर्कि रहस्येक बात
14हम झप्सिन तोरलग आइलाहार आस कर्ल स्यो तर यि चिठि हम यि कारन निख्ति स्यो कि, 15कहिं हम्रा आब लागि अबेर हेतो त तोरा यि बात थाहा हउस कि पर्मेसोरक परिबारम मानुकसिक चाल-चलन केहेन हब पर्तो कहिक। यि परिबार जिउँत पर्मेसोरक मन्डलि स्यो, जुन सत्येक खुटा आ जग पनि स्यो। 16साँच्चेक आपन्सिक बिस्वासक रहस्ये एक्दम बर्कि छो, कुन्हुँले एक्रा इन्कार कर नाइ सक्तो:
उ मानुक भइक पर्कट भेलो,
आ पबित्र आत्मास ठिक ठहर्लो।
अनि सोर्गदुतस्या ओक्रा देखल्को,
आ सभे जातक मानुकसिक बिचम ओक्र बारेम पर्चार भेलो।
सन्सारक मानुकस्या ओक्रा बिस्वास करल्को,
अनि उ महिमाम सोर्गम उठाइल गेलो।
Currently Selected:
१ तिमोथि 3: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
