१ तिमोथि 1
1
1आपन्सिका मुक्ति देल्हार पर्मेसोर आ आस देल्हार खिरिस्ट येसुक आग्या अन्सार खिरिस्ट येसुक पेरेरित हम पावलले 2बिस्वासम हम्र साँच्चेक बेटा तिमोथिका यि चिठि निख्ति स्यो।
आपन्सिक पर्मेसोर बाप आ प्रभु खिरिस्ट येसुले तोरा किर्पा, दया आ सान्ति दिउस।
झुठा सिछ्याक बारेम चेताबनि
3हम माकेडोनिया पर्देस जाइ लग्ल खुमा तोरा एफिसस सहरेम रह कहिक बिन्ति कर्ल छल्यो। आब् हम फेरि कह स्यो, तुइं ओहेलग रह आ झुठा सिछ्या सिखाइलाहार्सिका एहेन गलत बात नाइ सिखा कहिक करा आग्या धि। 4ओकर्सिका कल्पना करिक बनाइल खिसा आ कह्याहु नाइ ओराइलाहार पुर्खासिक बंसाबलिसिम नाइ अल्झ कहिक आग्या धि। किरकि एहेन बातस त बाद-बिबाद मत्रे हब्छो। अनि पर्मेसोरम बिस्वासि भइक जिबन जिअ लागि कथ्यो सहयोग पनि नाइ कर्छो। 5हम्र देल आग्याक उदेस्ये चाहिं सभे बिस्वासिसब सुद्द मन, अस्लि बिबेक आ छल नाइ भेल बिस्वासस आइल मयाँम बह्र्ति जो कहिक स्यो। 6किरकि कुन्हुँ-कुन्हुँ मानुकसब यि बातसिका छोरिक बेकारक बातम अल्झल छो। 7ओकर्स्या पर्मेसोरक नियम सिखाइलाहार गुरु बन त चाहाछो। तर ओकर्स्या आप्ने बज्ल बात आ कथिक बारेम सिखाइति स्यो कहिक ओकर्स्या आप्नि बुझ नाइ सक्छो।
8तर आपन्सिका त थाहा छो कि पर्मेसोरक नियमका अस्लिमे पालन कर्ब त उ एक्दम अस्लि स्यो कहिक। 9आपन्सिका एहो थाहा छो कि नियम धर्मि मानुकसिक लागि नाइ स्यो तर यि त अधर्मि, नियम पालन नाइ कर्लाहार, पर्मेसोरका नाइ मान्लाहार, पापि, अपबित्र, असुद्द, आप्न बाप-मतारका मार्लाहार, खुनि, 10बेभिचारि, मरदले मरदसङ आ जनिले जनिसङ बिह्या कर्लाहार्सिक लागि, मानुक बेच्लाहार, ठक्लाहार, झुठा किर्या खाइलाहार आ अस्लि बातक बिरोध कर्लाहार्सिक लागि बन्ल स्यो। 11यि सिछ्या आपन्सिका आसिक देल्हार धन्ये पर्मेसोरक महिमित खुसिक खबर अन्सार छो, जुन खुसिक खबर सुनाब लागि हम्रा जिम्मा देल छो।
पावलका पर्मेसोरक किर्पा
12हम्रा सक्ति देल्हार खिरिस्ट येसु आपन्सिक प्रभुका हम धन्येबाद देस्यो किरकि ओइले हम्रा बिस्वासिलो सम्झिक आप्न सेबा कर लागि चुनल्को। 13हबक त हम अगा प्रभुक निन्दा कर्लाहार, बिस्वासिसिका सताइलाहार आ अप्मान कर्लाहार मानुक छल्यो। तर उ सभे काम हम प्रभुका नाइ चिन्हिंक अन्जानम कर्ल कारनस प्रभुले हम्रा दया करल्को। 14अनि आपन्सिक प्रभुले हम्र उप्रि झन आरो थुप्रे किर्पा करिक खिरिस्ट येसुम भेल बिस्वास आ मयाँस भोरल्को। 15यि बात साँच्चेक आ एक्दम बिस्वासिलो छो कि खिरिस्ट येसु पापिसिका बचाब लागि यि सन्सारम आइल स्यो। अनि उ पापिभोरिम सभेस बेसि पापि चाहिं हम स्यो। 16तर हम्र उप्रि यि कारन दया करल्को कि हम्र जक्या सभेस बेसि पापिका खिरिस्ट येसुले आप्न पुरा सहनसिलता देखाब सकुस, ताकि ओक्र उप्रिम बिस्वास करिक कह्याहु नाइ ओराइलाहार जिबन पाइलाहार्सिक लागि हम एगो उदाहरन बन सकुँ। 17आब् जुग-जुग तलिक रहलाहार रजा, कह्याहु नाइ मोर्लाहार आ आपन्स्या देख नाइ सक्लाहार एगो मत्रे पर्मेसोरका आदर आ महिमा सब्दिन हब्ति रहुस। आमेन।
18ए हम्र बेटा तिमोथि, तोर बारेम जुन बातसब अगमबानि करिक अगाहि कहल छो, ओहे अन्सार हम तोरा यि आग्या देस्यो कि तुइं उ बातसिका अस्लि लराइ लर लागि हथियारक रुपम चला। 19उजुमा तुइं बिस्वासम जोर्गर भइक रह्य आ अस्लि बिबेक नाइ गुमाह्य। किरकि कुन्हुँ-कुन्हुँ मानुकसब बिबेकले कहल बात नाइ मानिक बिस्वासस पछा हट्ल छो। 20ओकर्सिभोरिम हुमेनियस आ अलेक्जेन्डर स्यो। ओकर्स्या पर्मेसोरक निन्दा कर छोरुस कहिक हम ओकर्सिका सैतानक हाथम सुम्पि देल स्यो।
Currently Selected:
१ तिमोथि 1: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
