Lawana Nani 139
139
LAWANA 139 (138)
Dawan diara sut tânka nu sa
Aiwani nani tâ brih ba wina. Debit lawana.
1Dawan, man bui yang tâinka plikram, bara ai kaikisma.
2Man, yang daukanki nani sut ba kaikisma;
yang kupi ra lukisna ba, man laih wina kaikisma.
3Man, yang impakanki nani sut ba kaikisma,
¡dîa daukisna ba sut sin kaikisma!
4Bîla kumi sin yang aisaia âpu sna,
bara man, Dawan, baha sut ba kat kaikisma.
5Tnaya kir kutbi ai brisma;
bara man mihtam ba, yang laila purara mangkisma.
6Sins lâka aihka painkira ba, yang sip alkras;
¡laih purara sa, baha yang sip alkras, baha tânka briaia!
7¿Yang ansara wamna man spiritkam âpu kabia ki?
¿Ansara sin yang plapamni,
bahara man ai kaikras kama ba?
8Yang kasbrika purara ba kat uli wamna sin,
kaiks man bahara sma;
yang tasba mununhta pali ra iwi wamna,
man sin bahara sma;
9yang tit bûi lalma tani ra pâlamna kaka,
apia kaka muna kabuka ra wih iwamna.
10Bahara sin man mihtam ni ai alkma;
¡mihtam aihkika ai alki ba ai swibia apia!
11Tihmia tara ra dimi yukuwaia sip katna kaka,
apia kaka ingni kir ai bri ba
tihmia daukaia sip katna kaka,
12tihmia ba man wina ai yukukaia apia kan,
tihmia ba ingni pali kaia kan kakna baku.
¡Tihmia tara bara ingni ba sim man wal kumi sa!#Jir 23.23-24; Em 9.2.
13Man bui sika, yang rayaki ba paskram
yang yaptiki biara ra katna ba wina.
14Yang mamyunamna,
man aihka painkira ai paskram bamna;
man warkkam nani ba diara aihka pain pali paskram sa bamna;
yang bui baha aihka kaikisni.
15Yang wîni man wina yukuwras kan,
yang na yukuwan natka ra ai paskan ba ra,
tasba tihu pali ba ra, ai paski kan piua ra.
16Man namkra nani ba ai kaikan
yang ai paski kan piua ra,
baha sut ba man wauhkamtaya ra ulban sa,
yang rayaki yua nani sin man pat kulki kaikram
baha nani kumi sin kau bal takras kan ba ra.
17Gâd, lukankam nani ba nahki tihu ba;
¡baha nani sut asla prakan ba sip kulki sakras!
18Yang baha nani ba kulkamna kaka,
âuya mâ nani wal kanra ailal kabia;
ban kra kulki tnata alkuna sa kaka,
man lika ban yang wal sma.
19Gâd, man bui
upla watawikira nani ba iki tiks,
bara yang wina laihura sâks upla âikra nani ba,
20witin bui man mampara saura aisisa,
bara waihlam nani ninam bahki ra mâkisa.
21Dawan, ¿yang misbara kaikisna apia,
baha nani man ra misbara mai kaiki nani ba ra?
¿Baha nani bahki mai kulki ba,
yang mapara buisni apia?
22¡Yang bahmuna nani ba kupi aiska ni misbara kaikisni!
¡Baha nani ba sin waihli kaikisni!
23Dawan, man tâinka pliki kaiks
bara kupi tânka ba sin kaiks:
yang kupi lukra ba dukiara traiki kaiks
bara lukanki nani ba sin.#Law 17.3; 26.2.
24Bara kaiks, yang kra saurka yabalka ra auna sa sapa,
bara ban kaia yabalka ra ai mangks.
Currently Selected:
Lawana Nani 139: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
