Rô-ma 5

Athal jiơng di gruk mong yau kahanôt kaywa sagar

1Yau nan, tuk krung bihu mong yau kahanôt kaywa sagar, khol drei bihu yak yum#5:1 khol drei bihu yak yum: Dalam tha thanôn blah vak tangin nạn khol drei xang yak yum. thong Pô Lingik tapa di Pô khol drei nạn Pô Yê-su Krist. 2Nhơ di Bhô, khol drei kaywa sagar bihu yam tamư dalam karun hanim ni, nạn karun hanim bloh nhơ di nan khol drei dang kajap thong bui ôn thong pachôm bihu liêng xêh mưlang Pô Lingik. 3Ô kan nan, khol drei lijang bui ôn dalam raƀah raƀưp vơk, kaywa thau laic raƀah raƀưp pajiơng tabiak mưrat, 4mưrat jiơng tabiak gruk patia mưnuh, gruk patia mưnuh pajiơng tabiak pachôm, 5thong pachôm ôh ngak ka khol drei mưlau mưlit, kaywa di gruk anit ranam Pô Lingik tuh thaic tamư tian khol drei kaywa Pô Nưbi Ginrơh nạn Dê krung bihu ƀai brei ka khol drei.

6Dok di tuk khol drei dok kre yơ njaup pagôn Dê Krist ciup mưtai kaywa ra hu glaic. 7Biak kar ka thei ciup mưtai kala ka tha urang kahanôt, mưtak lô mưng hu urang khin mưtai kala ka tha mưnuix siam. 8Min Pô Lingik sahadah tian anit ranam Bhô jom thong khol drei, tuk khol drei dok nạn mưnuix glaic yơ Dê Krist krung hu mưtai kala ka khol drei. 9Yau nan urak ni khol drei krung hu nhơ di darah Bhô bihu mong yau kahanôt bloh, yơ ghat khol drei mưca bik nhơ di Bhô bloh bihu dong paklah truh binhôr dangih mưkek anưd Pô Lingik bik hơl. 10Kaywa mưyah tuk khol drei nạn ra thutruh bloh nhơ di gruk mưtai Anưk Bhô, khol drei bihu pabrai panôic thong Pô Lingik yơ laic haget urak ni krung bihu pabrai panôic pajơ, khol drei gilaic bik bihu dong paklah nhơ di gruk diup Anưk Pô thau kađơ. 11Ô kan nan, khol drei gilaic dok bui ôn dalam Pô Lingik kaywa Pô khol drei nạn Pô Yê-su Krist, nhơ di Bhô bloh urak ni khol drei tôk bihu gruk pabrai panôic.

A-đam thong Dê Krist

12Nan yơ, kaywa tha urang bloh danuh glaic krung hu tamư dalam dunya, thong kaywa danuh glaic mưng hu gruk mưtai, yơ gruk mưtai hu thik dar tal abih drei kaywa abih drei jang krung hu tanrok glaic. 13Kaywa danuh glaic krung hu dalam dunya dahlau di tuk hu hakum jakar, min tuk ô ka hu hakum jakar yơ danuh glaic ôh bihu hakê tal. 14Yau nan min, gruk mưtai krung hu pakrang mưng A-đam tal Mô-se, thong dôm urang ôh tanrok thubik tha glaic thong A-đam, nạn mưnuix ngak binguk thek ka Dê xang mưrai. 15Min danuh glaic ôh drơh yau gruk ƀai brei keramat. Mưyah kaywa glaic anưd ciêt tha urang bloh ralô urang xang mưtai yơ karun hanim Pô Lingik bik prong hơl, thong kaya alin kaywa karun hanim anưd tha urang nạn Pô Yê-su Krist gilaic bik dalah dalai ka ralô urang pakan vơk. 16Drap alin ni ôh drơh yau kamnat ywa danuh glaic anưd tha urang. Kaywa gruk bican inư ywa tha glaic krung hu ba tal gruk padok an; min gruk ƀai brei mưng Pô Lingik yơ hadei di ralô ƀang tanrok glaic gilaic ba tal gruk mong yau kahanôt. 17Mưyah ciêt ywa glaic tha urang, bloh tapa mưnuix nạn gruk mưtai krung hu pakrang yau halei, yơ lijang ciêt nhơ di tha Urang nạn Pô Yê-su Krist, bloh dôm urang tôk karun hanim thong kaya alin kahanôt ganap labeh labieng, mưca bik pakrang dalam gruk diup yau nan.

18Yau nan, kaywa gruk tanrok glaic anưd ciêt tha urang bloh abih drei gok padok an, yơ lijang yau nan, kaywa bruk ngak kahanôt anưd tha Urang bloh abih drei bihu mong yau kahanôt thong bihu liêng gruk diup, 19kaywa di gruk ôh pang tui anưd tha urang bloh ralô urang gilaic jiơng urang glaic, yơ lijang yau nan, kaywa gruk pang tui di anưd tha Urang bloh ralô urang mưca gilaic jiơng kahanôt.

20Hakum jakar krung hu mưrai ngak ka danuh glaic paƀlwak, min libik halei danuh glaic paƀlwak yơ karun hanim gilaic bik dalah dalai hơl. 21Yau nan, danuh glaic pakrang mưng gruk mưtai, dok karun hanim pakrang mưng gruk kahanôt piêh ba mai gruk diup rit rai tapa Pô Yê-su Krist, Pô khol drei.

Currently Selected:

Rô-ma 5: CJM2024

Highlight

Copy