Rô-ma 4

Krơh sagar Ap-ra-ham

1Yau nan, mưca khol drei đôm Ap-ra-ham, muk kei ka nôk rilo darah anưd khol dahlak krung hu tôk bihu haget?#4:1 Yau nan... bihu haget? Dalam tha thanôn blah vak tangin nạn Yau nan, mưca khol dahlak đôm Ap-ra-ham, muk kei khol dahlak, krung hu tôk bihu haget tui rilo darah? Dalam tha thanôn blah vak tangin pakan nạn Yau nan, mưca khol drei đôm haget ka Ap-ra-ham, muk kei ka nôk rilo darah anưd khol dahlak? 2Mưyah Ap-ra-ham krung bihu mong yau kahanôt kaywa bruk ngak yơ ong hu gađi gadha piêh mưyeh drei, min di anak Pô Lingik ôh njaup yau nan. 3#Ga 3:6.Kaywa Agal Nưbi đôm haget? “Ap-ra-ham dial Pô Lingik, thong nhơ di nan ong bihu hakê nạn kahanôt.” 4Jom thong mưnuix ngak bruk, jiên kong ôh bihu mưda yau karun hanim, min xang hakê nạn thre; 5dok thong mưnuix ôh ngak bruk, min dial tamư Dê mong yau kahanôt ka mưnuix hu glaic#4:5 mưnuix hu glaic: Dalam xap Hi-lap nạn asebe hu ar nạn ra ôh hôic taka di Pô Lingik. yơ sagar anưd urang nan bihu mưda yau kahanôt. 6Ywa nan ka, tuk đôm tal hanim siam mưnuix bihu Pô Lingik hakê nạn kahanôt ôh kaywa bruk ngak, Đa-vit đôm:

7“Phôl ka mưnuix halei xuk xwel bihu ampun,

Danuh glaic bihu pacang padaup!

8Phôl ka mưnuix bloh Pô ôh hakê nạn hu glaic!”

9Nan yơ hanim siam nan ciêt piêh ka dôm urang ciup khao tan min ngan lijang brei ka dôm urang ôh ciup khao tan gêk? Kaywa khol drei đôm nạn kaywa sagar, Ap-ra-ham bihu hakê nạn kahanôt. 10Min ong bihu mưda yau kahanôt yau halei? Dahlau ngan hadei di tuk ciup khao tan? Ôh njaup nạn hadei min nạn dahlau di tuk ciup khao tan. 11Ong hu tôk habang khao tan yau twak tamtra anưd gruk kahanôt bloh ong krung bihu kaywa di sagar mưng tuk ong ô ka ciup khao tan. Yau nan ong gilaic jiơng amư abih mưnuix dial ôh khao tan, khol nhu lijang bihu mưda yau kahanôt, 12thong lijang ngak amư dôm mưnuix ciup khao tan, nạn dôm mưnuix ô kan ciup khao tan ô, min dok tui nưm sagar bloh Ap-ra-ham, muk kei khol drei, krung hu mưng dahlau di tuk ciup khao tan.

Panôic he Pô Lingik bihu ngak tapa sagar

13 # Ga 3:29. Panôic he ka Ap-ra-ham thong talei pajeh ong bihu tôk mưk dunya ngak dit diya, ôh njaup mưrai mưng hakum jakar min nhơ di gruk kahanôt anưd sagar. 14#Ga 3:18.Mưyah nhơ di hakum jakar bloh bihu liêng dit diya yơ sagar gilaic jiơng ôh hu hanim thong panôic he lijang lihik thunit. 15Kaywa hakum jakar ba tal gruk dangih mưkek, min libik halei ôh hu hakum jakar yơ lijang ôh hu gruk tanrok glaic.

16 # Ga 3:7. Nan yơ, kaywa sagar bloh panôic he ywa karun hanim bihu tôk khik ka abih talei pajeh Ap-ra-ham, ô kan ka talei pajeh ala gon hakum jakar min ka abih talei pajeh sagar anưd Ap-ra-ham, lijang nạn muk kei abih khol drei, 17yau hu panôic vak: “Ita krung hu padang anưk ngak amư anưd ralô paran.” Di anak Pô Lingik, Dê ong krung hu dial, nạn Dê ƀai brei gruk diup ka ra mưtai, thong iêu dôm kabha ôh hu yau krung hu. 18Ong krung hu pachôm kanê ôh dok gađi gadha piêh pachôm; ong jang dial bloh gilaic jiơng amư ralô paran, tui yau panôic krung hu bican thong ong laic: “Rai pajeh hư mưca yau nan.” 19Ong ƀôh rup pabhap drei nje karang kaywa krung hu jek tha rituh thun, thong ƀôh Sa-ra ôh mưda mưnưk bihu vơk, min sagar ôh bik trun. 20Ong ôh lôi ka tian ôh dial ngak ka drei kalman panôic he Pô Lingik, min bik kati katang thong tahamid Pô Lingik, 21Ong dial kardak laic Pô Lingik hu gon xagta piêh ngak dôm haget Bhô krung hu he. 22Ywa nan ka, sagar ong bihu hakê nạn kahanôt. 23Min kanen: “Sagar ong bihu hakê yau kahanôt” ôh njaup ciêt bihu vak vơk ka tha drei ong 24min lijang ka khol drei gêk. Sagar mưca bihu mưda yau kahanôt ka khol drei, dôm urang dial di Dê krung hu ngak ka Pô Yê-su, Pô khol drei, diup vơk mưng lôg mưtai, 25Bhô krung hu gok mưk jao piêh ciup mưtai kaywa di danuh glaic khol drei, thong diup vơk piêh khol drei bihu mong yau kahanôt.

Currently Selected:

Rô-ma 4: CJM2024

Highlight

Copy