Rô-ma 6

Rai diup xalih birau

(6:1 – 8:39)

Mưtai jom thong danuh glaic thong diup thong Dê Krist

1Mưca khol drei đôm habar? Khol drei kưk kakal diup dalam danuh glaic piêh karun hanim bihu dalah dalai habar? 2Kloh yom yau nan! Khol drei krung hu mưtai jom thong danuh glaic yơ ngak habar kưk kakal diup dalam danuh glaic bihu? 3Dei ai ôh thau laic abih khol drei jang krung hu ciup ƀap-tem dalam Dê Krist Yê-su, ar nạn ciup ƀap-tem dalam gruk mưtai Bhô ô? 4#Kôl 2:12.Lijang kaywa ƀap-tem, khol drei krung bihu dar tamư dalam gruk mưtai thong Bhô, piêh bloh yau Dê Krist nhơ di xêh mưlang Amư bihu diup vơk mưng lôg mưtai yau halei yơ khol drei lijang bihu diup dalam rai birau yau nan. 5Kaywa mưyah khol drei krung bihu ginum tha thong Bhô dalam gruk mưtai drơh yau gruk mưtai Bhô, yơ kardak khol drei lijang mưca bihu ginum tha thong Bhô dalam gruk diup vơk drơh yau gruk diup vơk anưd Bhô. 6Khol drei thau laic mưrôxak klak khol drei krung hu thubik gok pang đin tamư gai gan gak thong Bhô, piêh mưnuix#6:6 mưnuix: Dalam xap Hi-lap ar nạn rup pabhap. danuh glaic gok thubang, thong khol drei ôh dok ngak halun kloh ka danuh glaic vơk. 7Kaywa thei krung hu mưtai yơ bihu talơh taleh truh di danuh glaic. 8Min mưyah khol drei krung hu mưtai thubik thong Dê Krist yơ khol drei dial laic drei lijang mưca thubik diup thong Bhô. 9Khol drei thau laic Dê Krist krung hu diup vơk mưng lôg mưtai yơ mưca ôh tuk halei mưtai vơk; gruk mưtai ôh dok pakrang Bhô. 10Kaywa Bhô krung hu mưtai, nạn mưtai ka danuh glaic tha ƀang tal abih; min Bhô diup, nạn diup ka Pô Lingik. 11Yau nan, dei ai lijang xang hakê drei krung hu mưtai jom thong danuh glaic thong dok diup ka Pô Lingik dalam Dê Krist Yê-su.

12Yau nan, jôi lôi ka danuh glaic pakrang dalam rup pabhap bhian mưtai dei ai, ngak ka dei ai xang patui ragơh tathrưg nhu. 13Jôi limah mani drei ngak kaya angui xag mưjưy ka danuh glaic, min xang limah êng drei ka Pô Lingik yau dôm mưnuix mưng lôg mưtai diup vơk, thong limah rup pabhap drei ngak kaya angui kahanôt ka Pô Lingik. 14Kaywa danuh glaic mưca ôh dok pakrang dei ai ô, kaywa dei ai ôh dok di ala hakum jakar bloh dok ala karun hanim.

Halun kloh anưd gruk kahanôt

15Yau nan ka habar? Hu njaup kaywa khol drei ôh dok di ala hakum jakar, min dok ala karun hanim, nan khol drei mưca kưk tanrok glaic halei? Ôh bik yau nan! 16Dei ai ôh thau laic mưyah dei ai ba rup ngak halun kloh piêh pang tui mưnuix halei yơ dei ai njaup nạn halun kloh ka mưnuix drei pang tui ô? Ngan halun kloh ka danuh glaic ba tal gruk mưtai, ngan halun kloh ka gruk pang tui ba tal gruk kahanôt. 17Min đwa karun Pô Lingik, kaywa dei ai krung hu bhian ngak halun kloh ka danuh glaic bloh urak ni tapak tian pang tui tanut raxa gruk lang pato krung hu jao kloh ka dei ai, 18thong dei ai krung bihu lơh taleh truh di danuh glaic bloh, gilaic jiơng halun kloh ka gruk kahanôt. 19Kaywa rilo darah dei ai kre nan yơ dahlak đôm tui ganap mưrôxak. Dei ai krung hu limah rup pabhap drei ngak halun kloh ka gruk haruk haram thong gruk xag mưjưy dak pabūk yau halei, yơ urak ni, xang limah mani drei ngak halun kloh ka gruk kahanôt piêh bihu thrah nưbi yau nan. 20Tuk dok ngak halun kloh ka danuh glaic yơ dei ai bihu salalah jom thong gruk kahanôt. 21Tuk nạn dei ai mưk bihu athal jiơng haget bloh urak ni dei ai gilaic xang mưlau mưlit? Gruk taluic di dôm kabha nan nạn gruk mưtai. 22Min urak ni dei ai krung bihu lơh taleh truh di danuh glaic thong gilaic jiơng halun kloh Pô Lingik, yơ athal jiơng bloh dei ai bihu nạn gruk thrah nưbi, thong taluic bihu gruk diup rit rai. 23Kaywa jiên kong anưd danuh glaic nạn gruk mưtai, min gruk ƀai brei mưng Pô Lingik nạn gruk diup rit rai dok dalam Dê Krist Yê-su, Pô khol drei.

Currently Selected:

Rô-ma 6: CJM2024

Highlight

Copy