I Kô-rinh-tô 15
15
V. Baak rêh kươi
(15:1-58)
Baak rêh kươi Yaang Krist ri
1Ơi oh bi, hei êch krơơ kươi aan oh bi Baak Sroong Klanh hei ja chhuôr u oh bi ja wơơt pơih, kot bei plah nha ta yoong khưng knông nei. 2Chkhôm Baak Sroong Klanh nei, oh bi kươt đoh kwaai mơq oh bi prap jap ntil hei ja chhuôr; mơq 'bưn, oh bi geh jơ kot 'bưn thlay.
3Hei ja chhuôr kươi aan oh bi ntil peh thlay đat pa hei ja dơơp pơih, nei laa Yaang Krist dol chhưt đươm dôih 'baap bơl bơn tênh baak Sm'bưt Brah. 4Pang ja dol rôôp; tơt nar pei, Pang ja rêh kươi tênh baak Sm'bưt Brah; 5u Pang ja lôh sot aan Sê-pha, ja nei aan phung jmơt baar du jơt jơng.#Mat 28:16-17; Mak 16:14; Lu 24:34,36; Ja 20:19. 6Ja nei, pôl di rbôông, Pang lôh sot aan huôih pram riêng oh bi; bôh ơk knông nak nei nar au nha rêh, dôh geh pal du bnih ja bêch hôm. 7Pang kot lôh sot aan Ja-kơ, kươi nei aan leq sêch bơl jơt jơng. 8Kươi leq, Pang kot lôh sot aan hei bei aan mbu koon lgơơch ndah sơp nar ei.#Kênh 9:3-6. 9Đươm hei laa 'bưn sơnơ đat knông nak bơl jơt jơng, 'bưn dip jah kươt khuôl laa jơt jơng, đươm hei ja nhôp kơt Phung Jrah Brah Ưn ri.#Kênh 8:3. 10Dôh chkhôm brêêng smlaang Brah Ưn ri baah hei kươt bei nar au, u brêêng smlaang Pang ri ươn hei 'bưn geh laa 'bưn preh. Mat baah kươi, hei lơh kaar ơk huôih leq sêch bơl bnih nday; dôh ơơn geh hei baah laa brêêng smlaang Brah Ưn ri gôq n'hai hei. 11Bei nei, paich hei paich bơl jơt jơng nei tôw lah ntil bơl hei chhuôr u laa ntil oh bi ja jơ.
Baak rêh kươi bnih chhưt ri
12Bei nei, mơq oh bi kươt iat chhuôr Yaang Krist ja rêh kươi a ktôk chhưt, nei a hay knông oh bi geh bnih leet mor laah bơl bnih chhưt 'bưn rêh kươi? 13Mơq bnih chhưt 'bưn rêh kươi nei Yaang Krist kot ja 'bưn rêh kươi. 14U mơq Yaang Krist ja 'bưn rêh kươi nei baak chhuôr bơl hei ri laa 'bưn thlay, u chưt jơrnơ oh bi ri kot 'bưn preh. 15Mơq bnih chhưt a ngan 'bưn rêh kươi nei bơl hei dol mơq bei lơh ndraanh lhiat teq u Brah Ưn; đươm bơl hei ja lơh ndraanh laah Brah Ưn ja lơh Yaang Krist rêh kươi, knông jơl nei Pang 'bưn lơh Yaang Krist rêh kươi. 16Đươm mơq bnih chhưt 'bưn rêh kươi nei Yaang Krist kot 'bưn rêh kươi. 17U mơq Yaang Krist 'bưn rêh kươi nei chưt jơrnơ oh bi ri kot 'bưn thlay, u oh bi nha gôq knông dôih 'baap nơơm. 18Bei nei, bơl bnih bêch knông Yaang Krist phrui dol saap luôch. 19Mơq kơndưng bơl bơn ri knông Yaang Krist chong ndroong teq u baak rêh au ei, nei knông leq sêch jôm bnih, bơl bơn laa bơl bnih khuit khwait huôih leq.
Brah Jê-sus Krist, play tơơm baak rêh kươi ri
20Dôh bei au, Yaang Krist ja a ktôk chhưt rêh kươi, Pang laa play tơơm bơl bah bêch ri. 21Đươm bei mbu bnih baah geh baak chhưt nei kot chkhôm mbu bnih baah geh baak rêh kươi a ktôk chhưt. 22Bei knông A-đam, jôm bnih kot chhưt; Kot bei nei, knông Yaang Krist, jôm bnih kot a kươi rêh kươi. 23Dôh jôm bnih tênh lneh êêng nơơm ri: Yaang Krist laa play tơơm; tơt nar Yaang Krist lôh sot, bơl bnih pơơn teq u Pang a kươi rêh kươi. 24Ja nei baak ptut a kươi lôh, laa plah Pang ndơơp kươi nggoor aan Brah Ưn laa Bươp, di kươi Pang ja kluôch leq jôm dang kmheng kan bôôk, jôm ch'bap kmheng, jôm kmlang. 25Đươm Pang phrui kan ttih, aan tơt khal Brah Ưn “dơih jôm kmang a teh jơng Pang.” 26Bơl kmang ptut dol kluôch laa baak chhưt. 27Đươm Brah Ưn ja dơih “mrơk 'bơk chhư chôh a teh jơng Yaang Krist.” Dôh tơt mor “mrơk 'bơk chhư chôh a teh jơng Yaang Krist” nei srlah srlom 'bưn kơơp leq Yaang dơih mrơk 'bơk chhư a teh jơng Pang. 28Khal mrơk 'bơk chhư ja chôh Pang nei bei au nơơm Pang laa Koon kot chôh Yaang Krist ja lơh aan mrơk 'bơk chhư chôh nơơm, jah Brah Ưn lơh jôm baak knông jôm bnih.
29Mơq 'bưn bei nei bơl bnih dơơp bap-tem tơh aan bnih chhưt kơp ndưng ơơn? Mơq bnih chhưt ngan 'bưn rêh kươi nei a hay bu nday leet dơơp bap-tem tơh aan bu? 30A hay nơơm bơl hei bêl ơơn kot phrui a mơp n'hai ap êêng? 31Ơi oh bi, hei rdang n'hai baak chhưt rêêng nar!#15:31 hei rdang n'hai baak chhưt rêêng nar: Paich laa hei chhưt rêêng nar. Hei mor bei nei đươm baak ha uôt hei ri teq u oh bi knông Yaang Krist Jê-sus, Brah bơl bơn. 32Mor tênh ndroong koon bnih, tuul ôp hei kươt thlay ơơn mơq hei ta lơh n'hai mrơk 'bơk chhư kraanh tu Ê-phê-sô? Mơq bnih chhưt rêh kươi, nei bơl bơn
“Phrui sôông, phrui ôn ơơi,
Đươm nar ôi bơl bơn a kươi chhưt!”
33Oh bi njrang bu lhiat:
“Gnasaal ap lơh khuich chưt kmlơt klanh.”
34Phrui rngơq u khơơm lơh dôih hôm, đươm m'baak bnih knông oh bi 'bưn gưt Brah Ưn. Hei mor bei nei jah oh bi prêêng mat.
Chhak jan rêh kươi
35Dôh geh bnih a kươi mor: “Bnih chhưt rêh kươi bei êch? Bu pơih chhak jan baah plơq kươi?” 36Bnih ndrơơi tôw ơi! Griêng ơơn ay siêm, mơq noor leq 'bưn chhưt haanh, nei 'bưn rêh kươi kươt. 37Pai griêng ay siêm, 'bưn geh đươm lah gui chhak a kươi hoon, dôh snôk dơơn laa mlơm grap, bei grap ba uôi paich pal ntil grap nday. 38Brah Ưn ươn grap til đi ntil grap tênh rnđêch Pang êch, jôm ntil grap til di gui chhak êêng. 39'Bưn geh jôm pêêk pai kot bei gơna; pêêk pai koon bnih ri êêng, pêêk pai pi mrơk ri êêng, pai chum ri êêng, pai ka ri êêng. 40Kot geh ơp gui chhak pơơn teq u trôôk n'hai gui chhak pơơn teq u teh; dôh chring chraang pal gui chhak ri pơơn teq u trôôk êêng u chring chraang pal gui chhak pơơn teq u teh ri. 41Chring chraang mat nar ri êêng; chring chraang mat khay ri êêng; chring chraang pal smanh ri êêng; chring chraang smanh au ri n'hai chring chraang smanh tôw ri kot êêng.
42Baak rêh kươi bơl bnih chhưt ri kot bei nei. Chhak jan siêm u teh lah luôch lêêk, dôh rêh kươi laa 'bưn luôch; 43ja siêm laa pnjrơm, dôh rêh kươi laa a sroh; ja siêm laa lhok lhơơi, dôh rêh kươi laa moh dang; 44ja siêm laa chhak jan pêêk pai, dôh rêh kươi laa chhak jan laa wêêng yaang. Mơq ja geh chhak jan pêêk pai nei kot geh chhak jan wêêng yaang. 45Bei geh baak 'bian:
“Bnih ptơơm, A-đam ja but mbu bnih geh baak rêh,” dôh A-đam ptut kươi laa wêêng ươn baak rêh.
46'Bưn geh koon bnih wêêng yaang lôh noor baah lah koon bnih êêng ơơm; kươi nei laa koon bnih wêêng yaang. 47Bnih ptơơm a steh baah lôh nei pơơn teq u teh; bnih ttal baar lôh a trôôk. 48Bơl bnih pơơn teq u teh nei bei bnih sot a teh; bơl bnih pơơn teq u trôôk nei bei Yaang lôh a trôôk. 49Bei bơl bơn ja aanh ruup gui bnih ri sot a steh nei bơl bơn a kươi kot aanh#15:49 bơl bơn a kươi kot aanh: Knông m'baak plơơp 'bian ti lah bơl bơn phrui aanh. ruup gui Yaang ri lôh a trôôk.
Baak pơrgơl u jn'ah ptut kươi
50Ơi oh bi, hei êch mor laah, pai u mhaam 'bưn geh a dơơn nggoor Brah Ưn kươt; baak rnđơơih luôch lêêk 'bưn geh dơơn baak 'bưn rnđơơih luôch lêêk kươt. 51Au, hei tơrsau aan oh bi di baak chmlih chmleek: Bơl bơn a kươi 'bưn bêch laang, dôh leq sêch a kươi kươt pơrgơl#I Tê 4:15-17. 52knông rbôông, knông 'bleh mat, teq u plah baak kmbuôt ptut. Đươm kmbuôt a kươi khôm, bnih chhưt a kươi rêh kươi, 'bưn geh luôch lêêk hôm, n'hai bơl bơn a kươi kươt pơrgơl. 53Đươm pêêk pai rnđơơih luôch lêêk au phrui dook pơih pêêk pai 'bưn rnđơơih luôch lêêk; pêêk pai rnđơơih chhưt au phrui dook pơih pêêk pai 'bưn rnđơơih chhưt. 54Khal pêêk pai rnđơơih luôch lêêk dook pơih pêêk pai 'bưn rnđơơih luôch lêêk, pêêk pai rnđơơih chhưt dook pơih pêêk pai 'bưn rnđơơih chhưt nei khal nei a kươi dip plak baak ja 'bian:
“Baak chhưt dol luônh saap knông baak jn'ah.”
55“Ơi baak chhưt, baak jn'ah may ri a êch?
Ơi baak chhưt, gneng khih may ri a êch?”
56Gneng khih baak chhưt ri laa dôih 'baap, kmlang dôih 'baap ri lah ch'bap. 57Dôh or Brah Ưn ja ươn bơl bơn baak jn'ah chkhôm Brah bơl bơn laa Brah Jê-sus Krist. 58Bei nei, ơi oh bi êch srlanh hei ri, phrui jap juôn, khơơm pndrơm, phrui lơh kaar Brah ndroong ngroh ngri, đươm gưt laah baak kro oh bi ri knông Brah 'bưn geh laa 'bưn preh laang.
Currently Selected:
I Kô-rinh-tô 15: SBL2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
