I Kô-rinh-tô 14

Baak smlaang mor pal til baak êêng u mor grnưt noor

1Phrui tênh nduul baak srlanh; phrui kmbưng pal baak smlaang wêêng yaang, đat laa baak smlaang mor grnưt noor. 2Đươm bnih mor pal til baak êêng 'bưn mor n'hai koon bnih, baah mor n'hai Brah Ưn mơ 'bưn 'bơơn gưt kươt, đươm bnih nei mor pal ntil chmlih chmleek knông Brah Wêêng. 3Nha bnih mor grnưt noor nei mor n'hai koon bnih jah ta kơldơk, nđum nđiêng u trôih trôl. 4Bnih mor pal til baak êêng ta kơldơk êêng chhak nơơm, dôh bnih mor grnưt noor ta kơldơk Phung Jrah. 5Hei êch kơndưng leq sêch oh bi kot mor pal til baak êêng, dôh leet êch kmbưng dươn oh bi mor grnưt noor huôih. Bnih mor grnưt noor nei prêh thlay huôih bnih mor pal til baak êêng, dơơn lah geh bnih rơih, jah Phung Jrah kươt ta kơldơk. 6Ơi oh bi, mơq hei lôh u oh bi, mor n'hai pal til baak êêng, u mơq baak mor hei ri 'bưn geh baak tơrsau ơơn, 'bưn geh gưt jhai ơơn, 'bưn geh baak grnưt noor ơơn, 'bưn geh baak kne ơơn nei geh thlay ơơn aan oh bi? 7Leq dơng ot drôw 'bưn wêêng, bei tơrnêt paich dinh dut, mơq 'bưn sot baak êêng, lơh bei êch gưt kươt baak tơrnêt paich dinh dut? 8Mơq kmbuôt teh baak 'bưn srlah srlom nei 'bơơn a kươi riêp ta lơh? 9Oh bi kot bei nei, mơq lpiat 'bưn mor pal ntil awap gưt kươt nei lơh bei êch bu nday gưt ntil oh bi mor? Đươm oh bi dơơn mor wưu wao. 10Knông swich teh au geh ơk ntil baak, jôm ntil baak kot geh rpach. 11Bei nei, mơq hei 'bưn gưt rpach baak nei ri nei bnih mor baak nei a kươi mơq hei laa bnih nggoor agaih, u hei kot mơq bu laa bnih nggoor agaih. 12Oh bi kot bei nei, đươm nh'hit nh'hiêr pal baak smlaang wêêng yaang, oh bi phrui wơng joi aan kươt ngroh ngri pal baak smlaang nei jah ta kơldơk Phung Jrah.

13Nei mơ, bnih mor pal til baak êêng, phrui r'bon dan jah rơih kươt baak nei. 14Đươm mơq hei r'bon dan drơơl pal til baak êêng nei chưt kmlơt hei r'bon dan, dôh chưt gơrninh hei 'bưn pơih kươt kat kao hao play ơơn. 15Bei nei hei phrui lơh ơơn? Hei a kươi r'bon dan dơng chưt kmlơt, dôh kot r'bon dan dơng chưt gơrninh; hei a kươi tapơt dơng chưt kmlơt, dôh kot tapơt dơng chưt gơrninh. 16'Bưn dơơn, mơq ay pơt wơơl dơng chưt kmlơt nei lơh bei êch bơl bnih rơi gôq iat awap mor “A-men” n'hai baak or ay ri kươt, mơq bu 'bưn gưt ay mor ơơn? 17Paich baak or ay ri klanh ngan, dôh 'bưn ta kơldơk aan bnih nday. 18Or Brah Ưn, hei mor kươt pal til baak êêng ơk huôih leq sêch oh bi. 19Đươm bei nei, knông Phung Jrah, hei n'hop n'hal mor pram baak dơng chưt gơrninh jah kne bnih nday, huôih laa leq ban baak dơng pal til baak êêng.

20Ơi oh bi, teq u baak gưt jhai, khơơm but bei koon drêên; dôh teq u ntil ap, phrui but bei koon drêên. Teq u baak gưt jhai, phrui but bnih ttih raap. 21Knông ch'bap geh 'bian:

“Brah lah: Hei a kươi lah n'hai raih au rlach bơl bnih mor pal til baak êêng,

U ndôi wiêm bnih daak gaaih; paich bei nei, bu a kươi 'bưn sang iat Hei.”

22Nei mơ, pal til baak êêng 'bưn dip laa chmlih aan bnih jơ, baah aan bnih 'bưn jơ; dôh baak grnưt noor 'bưn dip laa chmlih aan bnih 'bưn jơ, baah aan bnih jơ. 23Bei nei, jơl leq Phung Jrah pôl pơrgum kươi, leq sêch kot mor pal til baak êêng, baah geh bnih ngrơơi u bnih ndah jơ chwaat mưt nei bu 'bưn mor laah oh bi wơơng laang? 24Dôh mơq leq sêch kot mor grnưt noor, baah geh bnih 'bưn jơ u bnih ngrơơi chwaat mưt nei bu a kươi dol ndit u pơrkat đươm leq sêch pal baak grnưt noor. 25Pal ntil lhơp knông nuih bu kươt preeng phaal; bu a kươi kun saak u teh smbah Brah Ưn, u tơmbơh laah:

“Brah Ưn a ngan plah gôq lwah oh bi.”

Rngap knông bêl pơrgum

26Ơi oh bi, phrui lơh bei êch au? Tơt oh bi pơrgum kươi, bnih nei geh ndroong tapơt sm'bưt tư wơơl, bnih nei geh baak kne, bnih nei geh baak tơrsau, bnih nei geh pal til baak êêng, bnih nei geh jhai rơih pal til baak êêng. Phrui lơh leq sêch jah ta kơldơk Phung Jrah. 27Mơq geh bnih mor pal til baak êêng, nei dơơn but baar paich pei du laa leq duq. Jôm bnih mor tênh lneh, u phrui geh bnih jhai rơih. 28Mơq 'bưn geh 'bơơn rơih nei bnih mor phrui iat rngơt knông Phung Jrah, u dơơn mor n'hai chhak nơơm u teq u Brah Ưn. 29Kot dơơn geh baar paich pei du mor grnưt noor ei, nha bơl bnih nday nei krơơ ntil bu mor. 30Dôh mơq geh 'bơơn gôq nei pơih kươt baak tơrsau nei bnih plah mor phrui iat rngơt. 31Đươm jôm bnih knông oh bi awap tawai mor grnưt noor jah jôm bnih kot kươt riên, jôm bnih kot kươt trôih trôl. 32Chưt kmlơt bơl grnưt noor ri phrui chôh bơl grnưt noor. 33Đươm Brah Ưn 'bưn dip laa Brah Ưn baak pơrsup ri, dôh baak sroong boong ri.

Bei knông leq sêch Phung Jrah bơl koon sơih ri, 34dơur phrui prap iat rngơt knông Phung Jrah. Bu 'bưn kươt ch'bap mor, dôh phrui chôh bei ch'bap ja kne. 35Mơq êch wơng gưt ntil ơơn, bu phrui ôp sai klau nơơm a nhi; đươm dơur mor lwah Phung Jrah laa ntil prêêng mat.#14:35 Knông m'baak plơơp 'bian ti lah, pal ndroong 34-35 kươt dơih a kươi ndroong 40. 36Geh lah baak Brah Ưn lôh kơrmuôl a oh bi, paich dơơn lôh u êêng oh bi laang?

37Mơq 'bơơn gênh nơơm laa grnưt noor, paich geh pal baak smlaang wêêng yaang, nei bnih nei chkhôm gưt laah, ntil ơơn hei 'bian aan oh bi au, laa rmaanh Brah ri. 38Mơq 'bơơn mơq rơơi ntil au nei khơơm agleng tơt bu.

39Nei mơ, ơi oh bi, phrui êch kơndưng baak smlaang mor grnưt noor, u khơơm pơrkhaang kaar mor pal til baak êêng. 40Dôh phrui lơh ơp ntil di ndroong ta dip u tênh lneh.

Currently Selected:

I Kô-rinh-tô 14: SBL2024

Highlight

Copy