I Kô-rinh-tô 16

VI. Pak ptut

(16:1-24)

Kaar ta pơrgum

1Teq u kaar ta pơrgum prak kơrđaih aan bơl koon sơih nei oh bi phrui lơh tênh hei ja liêu troong aan pal Phung Jrah kwaal Ga-la-ti.#Rô 15:25-26. 2Laap rêêng nar ptơơm rthôl, jôm bnih knông oh bi, tênh lpat bơn na ri, phrui ơn di bôh; khơơm kơp tơt hei lôh mơ ta pơrgum. 3Tơt lôh, hei a kươi maanh bơl bnih pa bnih oh bi jơ liêu khaak hei ri u griêng tkôm oh bi ri tơt nggoor Jê-ru-sa-lem. 4Mơq sau chkhôm hei phrui han, nei bơl bnih nei a kươi pôl han n'hai hei.

Riêp ơơm Phao-lô ri

5Hei a kươi lôh nhjook oh bi rlach Ma-sê-đô-ni-a, đươm hei êch rlach Ma-sê-đô-ni-a.#Kênh 19:21. 6Hei a kươi gôq kươi n'hai oh bi, awap sơp leq khal chaal puh, jah oh bi ndơơp hei han tơt ktôk êch hei êch han. 7Mơq Brah aan ch'bap nei wưt au hei 'bưn dơơn êch a mơp oh bi lơ troong han ei, dôh kơndưng a kươi gôq kươi n'hai oh bi di rbôông. 8Dôh hei a kươi gôq lơơi Ê-phê-sô aan tơt ryơơng Pram Rthôl,#Kênh 19:8-10. 9đươm di lpôông ttih ngwi u waat pơn ja pơơk lôh aan hei, paich a nei nha ơơm ơk baak ta wal.

Pn'ak n'hai chah nhjook

10Mơq Ti-mô-thê geh lôh, phrui pơrkhom jraih aan bu nei mơq sau rhông rhơi lwah oh bi, đươm bu nei kot lơh kaar aan Brah bei nơơm hei ei.#I Kô 4:17. 11Bei nei, khơơm 'bơơn mơq rơơi bu nei. Phrui jraih bu nei han sroong boong, jah bu nei plơq siq n'hai hei; đươm hei plah cham bu nei pôl n'hai bơl oh bi nday.

12Nha teq u oh bi bơl bơn laa A-pô-lô, hei ja pơrkhom ndit bu nei han u bơl oh bi nday lôh nhjook oh bi, dôh nar au bu nei ndah êch han. Đươm bei nei, khal geh jơl bu nei a kươi han.

13Oh bi phrui kah rngeh, phrui ta yoong khưng knông chưt jơrnơ, phrui khwaan u moh dang. 14Jôm ntil oh bi lơh, phrui lơh knông baak srlanh.

15Ơi oh bi, hei nha di baak pn'ak nha, oh bi gưt nhi nak Sê-pha-na laa pal play tơơm tu kwaal A-chai; bu ja leq chưt jraih kaar bơl koon sơih.#I Kô 1:16. 16Hei buôi oh bi phrui chôh bơl bnih bei nei, u leq bơl bnih pôl kro rngiêl n'hai bu. 17Hei broh đat đươm Sê-pha-na, Phôt-tu-na u A-chai-kơ lôh u đau; bu ja rmal kươi baak khwaq mat oh bi ri; 18đươm bơl bnih nei ja lơh ngech rngeh chưt kmlơt hei ri kot bei oh bi ri. Phrui gưt peh thlay bơl bnih bei nei.

19Pal Phung Jrah tu kwaal A-si-a chah nhjook oh bi, A-ki-la, Pê-rit-sin u Phung Jrah pơrgum kươi knông nhi bu piyơ baak nhjook oh bi knông Brah.#Kênh 18:2. 20Leq sêch oh bi a au chah nhjook oh bi. Phrui pơih phêp jrah baah chah nhjook ta chah.

21Nơơm hei, Phao-lô, ti hei 'bian êêng baak chah nhjook oh bi.

22Mơq geh 'bơơn 'bưn đing srlanh Brah nei phrui dol a-na-them!#16:22 A-na-them: lah di baak pơđaai sa. Ma-ra-na-tha!#16:22 Ma-ra-na-tha: Knông baak A-ram, Ma-ra-na-tha rơih lah: “Brah lôh!” paich laa: “Brah ơi! Phrui dan lôh!” 23R'bon dan brêêng smlaang Brah ri laa Brah Jê-sus gôq n'hai oh bi! 24Baak srlanh hei ri gôq n'hai leq sêch oh bi knông Yaang Krist Jê-sus.

Currently Selected:

I Kô-rinh-tô 16: SBL2024

Highlight

Copy