Chibkees 32

Yakhawj Npaaj Muz Ntsis Exaws

1Thaws Yakhawj taastod tawgkeb luz, Vaajtswb cob tidtswb saw ntuj luz ntsis niz. 2Thaws Yakhawj pud cob tidtswb qhai niz has tas, “Qhais na yog Vaajtswb lus yeej”; yog ni qhai, Yakhawj ha tis npe tu thaaj chia qhai hu ua Mahana-ees.#32.2 Mahana-ees: Lus npe na, luz Henplais txhais has tas, “os lus yeej.”

3Yakhawj tso neeg ua niz ntej muz has tu niz tuz tijlawg Exaws kwg nyos hub teschias Edoos. 4Niz kuas cob xaa xub muz has ni na tu Exaws: “Kud yog Yakhawj, yog koj tuz tusqhe kwg noog luz, thob has tu kud tuz tswb Exaws paws has tas kud muz nrug Lanpaas nyos taw nteb loo has taadsid na kud taastod rob qaas luz liad. 5Kud muaj nyuj, neez luab, yaaj, tshis, has qheb coos heeb. Kud muaj luz ni na luz thob koj kwg yog tuz tswb, kud ca sas ntsoob has tas koj yiad txaws sas tu kud.”

6Thaws cob neeg kwg xaa xub rob qaas luz cuag Yakhawj, cud has tas, “Pes ted muz cuag koj tuz tijlawg Exaws taaz liad, niz taastod npaaj siab keb tuaj toz koj liad ntaag. Niz coj taw plaws puas tuz neeg nrug niz tuaj.” 7Yakhawj ntshai heeb has nyuaj sas heeb ni. Niz ha muas niz cob neeg fais kag ua os paas, niz tseed muas niz cob yaaj, tshis, nyuj has ntxhuab fais ua os paas has. 8Niz xaab has tas, “Yog Exaws tuaj tua paas ua ntej los kuas paas ua qaas tsib taw kig.”

9Yakhawj ha thob Vaajtswb has tas, “Kud yiadkoos Anplahaas tuz Vaajtswb has kud vaid Ixaj tuz Vaajtswb, thob koj noog kud tej luz thob lawj! Tuz Tswb, koj has kuas kud rob qaas muz liad nraag kud lus teschias has kud cob kwbtij, has koj yiad puskeb taw zoo tu kud. 10Ted tsi tsidnyog koj hlus has ua ncaajnceeg tu kud kwg yog koj tuz tusqhe hlo ni. Thaws kud hlaa tuz dej Yawladees tuaj, kud tsi muaj daastsi ni, tsuas muaj tuas tuz paad nreg nyaz, tadsis nizna muaj os paas neeg has os paas tsaj coos heeb nrug kud rob qaas luz. 11Kud thob koj paas kuas kud kig qhais kud tuz tijlawg Exaws lawj. Kud ntshai heeb, kud ntshai nyos tsaad niz tuaj tua pes has ua tu pes rawg keb puadtsuaj, tsi has tej puj has minyuas hubtsig. 12Thob koj ncu ntsoob tej luz kwg koj cog tseg has tas, koj yiad puskeb taw zoo tu kud has pus kuas kud muaj xeesntxwz coos suab tsi txhas, is yaad ni tej suaszes nraag ntug habtxwb.”#Chk 22.17

13Niz ha pw is hmos qhais thaaj chia qhai, has niz ha xaib tej tsaj kwg niz muaj istxha coj muz pus tu niz tuz tijlawg Exaws ni na: 14Os puas tuz mawd tshis has neez nkawd tuz lawz tshis, os puas tuz mawd yaaj has neez nkawd tuz lawz yaaj, 15pes cawg tuz mawd ntxhuab nrug cob minyuas kwg tseed mog, plaws cawg tuz mawd nyuj has kawd tuz txib nyuj, neez nkawd tuz mawd neez luab has kawd tuz txib neez luab. 16Niz muas cob tsaj qhai fais ua tej paas has niz kuas niz cob tusqhe is tug muz nuad is paas. Niz has tu cud tas, “Mej ca ni muz ua kud ntej, is paas muz kuas nrug is paas kes tsiab.” 17Niz has tu thiaj tuz tusqhe has tas, “Thaws twg yog kud tuz tijlawg Exaws tuaj ntsis koj has niz noog has tas, ‘Koj tuz tswb yog tuz twg? Koj yiad muz qhob twg? Tuz twg yog tuz tswb cob tsaj kwg ua koj ntej na?’ 18Koj yiadtsud tes has tas, ‘Cob tsaj na yog koj tuz tusqhe Yakhawj ni. Niz kuas coj cob tsaj na luz pus tu Exaws kwg yog niz tuz tswb. Yakhawj tseed taastod luz ua pes qaas.’ ” 19Yakhawj has tu tuz tusqhe os has tuz tusqhe pes has tuadtxhij kwg niz tsaa luz nuad niz cob tsaj qhai is yaad nkaws has tas: “Thaws mej ntsis Exaws mej yiadtsud has tej luz na tu niz. 20Mej yiadtsud has tas, ‘Yakhawj kwg yog koj tuz tusqhe tseed ua pes qaas.’ ” Yakhawj xaab has tas, “Kud ted muas kud tej tsaj xaa ua ntej muz pus tu niz liad, ces thaws kud muz ntsis niz, tshe niz yiad zaad txid tu kud.” 21Yakhawj xaa tej khood pus qhai muz ua ntej, tadsis niz tseed rob pw is hmos qhais lus yeej qhai.

Yakhawj nrug Is tug Yias sis Qhaw qhais Peniyees

22Hmo qhai Yakhawj siab coj niz os tug puj, niz os tug nadyaw, has niz kawd is tug minyuas muz hlaa tuz Dej Yanpaws. 23Thaws niz xaa puj minyuas hlaa dhaw dej taaz, niz maad muas tej khood kwg yog niz tug xaa tusaas dej tid na hubtsig has, 24tadsis Yakhawj tuas tug tseed nyos tod qaas.

Ces txiad muaj is tug yiag luz nrug Yakhawj sis qhaw muz txug thaws pud keb txoog. 25Thaws tuz yiag qhai pud has tas niz yiad qhaw tsi yeej Yakhawj, niz ha ntaws Yakhawj lus ntsaad ua tu Yakhawj lus pos qej txhaa pluad plhuab. 26Tuz yias qhais has tas, “Hnoos ted yiad tiad, koj ca ni tso kud muz.”

Yakhawj tes has tas, “Kud yiad tsi tso koj muz txug thaws koj food kooshmoob tu kud taws.”#Haw 12.3-4

27Tuz yias qhais noog Yakhawj has tas, “Koj npe hu nyaab?”

Niz tes has tas, “Kud npe hu ua Yakhawj.”

28Tuz yias qhai has tas, “Koj lus npe yiad tsi hu ua Yakhawj ntxib liad. Tu qhob koj muaj peebxwd nrug Vaajtswb has nrug neeg sis qhaw, has ua tu koj yeej liad. Yog ni qhai, yiad muas koj lus npe tis hu ua Yixalayees.”#32.28 Yixalayees: Lus npe na has ni Henplais lu luz kwg has tas, “niz nrug Vaajtswb sis qhaw,” lossis “rawg Vaajtswb ntaws.”#Chk 35.10

29Yakhawj has tas, “Thob koj qha koj lus npe tu kud.”

Tadsis niz tes Yakhawj has tas, “Vid nicaaz koj xaab paws kud lus npe?” Ces niz txiad food kooshmoob tu Yakhawj.#Ctt 13.17-18

30Yakhawj has tas, “Kud ted pud Vaajtswb tid ntsej tid muag liad, tadsis kud tseed muaj sa nyos.” Yog ni qhai, Yakhawj ha tis npe tu thaaj chia qhai hu ua Peniyees.#32.30 Peniyees: Lus npe na lus suas has ni Henplais lu luz kwg has tas, “Vaajtswb lus ntsejmuag.” 31Thaws hnoos tiad tuaj Yakhawj ha siab keb hub Penuyees muz liad, has niz muz keb cegtiab pluab, tu qhob mos niz lus ntsaad heeb. 32Txiad yog naj hnoos nizna los Yixalayees cob xeesntxwz yeej tsi noj thooj nqaj qhais lus ntsaad qhai hlo ni, tu qhob Vaajtswb ntaws Yakhawj lus ntsaad liad.

Currently Selected:

Chibkees 32: CQD2024

Highlight

Copy

Compare