Chibkees 33

Yakhawj Ntsis Exaws

1Thaws Yakhawj pud Exaws has plaws puas tuz kwg nrug Exaws ua ke tuaj, niz txiad muas niz cob minyuas fais tu Le-as, Laxees has tu os tug nadyaw. 2Niz tso os tug nadyaw has ostug cob minyuas muz ua ntej, tso Le-as has niz cob minyuas tuaj nruasnraas, ces maad tso Laxees has Yawxej tuaj tod qaas kiag. 3Yakhawj muz ua cud ntej has niz txhud cawg ntua hub aab pe xyaa pes muz ti nkaws qhais niz tuz tijlawg. 4Tadsis Exaws dha ceeb nrooz muz cuag Yakhawj, puag nkaws has hna niz. Ostug os kwbtij sis qawg quaj. 5Thaws Exaws tsaa muag xaad niz pud deeb cob puj has cob minyuas qhai, niz txiad noog has tas, “Cob neeg kwg nrug koj luz na yog tuz twg?”

Yakhawj tes has tas, “Tijlawg, cob minyuas na yog Vaajtswb tuz kwg istxwd ua zoo kiag nkaws, pus tu kud.” 6Ces os tug nadyaw nrug ostug cob minyuas txaab zog luz has txhud cawg ntua pe, 7Le-as has niz cob minyuas maad luz, has thaws kiag Yawxej has Laxees maad ni txaab luz has txhud cawg ntua pe.

8Exaws rob noog has tas, “Ua ni paas kwg kud xus tuaj ntsis ne? Paas qhai yog tuz twg paas has?”

Yakhawj tes has tas, “Paas qhai yog kud muas tu koj, thob koj hlus kud.”

9Tadsis Exaws has tas, “Kud tuz kwb, kud ted muaj txaws kud liad, ca ni ceeb tej qhai tu koj nyaz.”

10Yakhawj has tas, “Tijlawg, yog koj txaws sas tu kud thob koj ca ni yuab tsi xod yig, ca ni txais tej kwg kud muas pus tu koj liad. Kud taw rob luz pud koj mas zoo kud sas npawd nkaws ni kud pud Vaajtswb ntaag, tu qhob nizna koj ua zoo kiag nkaws tu kud. 11Thob koj ca ni yuab tej kwg kud muas pus tu koj qhai, Vaajtswb hlus kud has niz pus txhua tsaab yaad kwg kud xaab yuab tu kud.” Yakhawj has tej luz mog luz muas thob muz txug thaws Exaws leez yuab liad.

12Exaws has tas, “Pes ca ni npaaj has siab keb muz. Kud yiad ua tuz coj mej keb muz.”

13Yakhawj tes has tas, “Tijlawg, koj yeej paws has tas kud cob minyuas tseed yaw muz tsi tawz ceeb, has kud txhiaj kud tej yaaj has tej tsaj txhu kwg muaj minyuas mog. Yog pes yiad muz ceeb nrooz, ntshai muz is hnoos nyaz kud tej tsaj yiad tuag taaz. 14Thob ca koj ua kud ntej muz, has kud yiad maaj maad rias koj qaas luz, kud tej tsaj txhu has kud cob minyuas muz tawz nyaab kud yiad muz ni qhai, txug thaws kud luz cuag taw koj hub teschias Edoos.”

15Exaws has tas, “Yog ni qhai, kud maad ni ca kud cob neeg os pes tug nrug koj.”

Tadsis Yakhawj tes has tas, “Tijlawg, tsi taaz koj yiad tso neeg paas kud, tsuab yog koj txaws sas tu kud nyaz ces taw liad.”#33.15 koj txaws sas tu kud nyaz ces taw liad; lossis yog has tas koj pud zoo. 16Yog ni qhai, hnoos qhai Exaws ha siab keb ua ntej rob luz tu teschias Edoos liad. 17Tadsis thaws Yakhawj muz txug qhais Xukaws, niz txiad ua tseb tu niz nyos has ua nkuaj kia niz cob tsaj tu qhais. Ted yog vid ni na ha muas thaaj chia qhai tis npe hu ua Xukaws.#33.17 Xukaws: Lus npe na luz Henplais txhais has tas, “tseb pheessuab.”

18Yakhawj rob qaas tid teschias Padaas Alaas luz txug tu hub lus nroog Sekhees kwg nyos hub teschias Kana-aas tsi ntsis keb nyuaj sas daastsi, has niz muz ua zoz nyos ze tu qhais ntug nroog Sekhees. 19Niz muas taw is puas daid nyaj yuab taw is thaaj aab qhais Sekhees vaid Hamawles cob xeesntxwz.#Yas 24.32; Yhs 4.5 20Yakhawj ha tees taw is lus thaaj tu qhais has tis npe hu ua Ees rias ni cob Yixalayees tuz Vaajtswb lus npe.

Currently Selected:

Chibkees 33: CQD2024

Highlight

Copy

Compare