Chibkees 31

Yakhawj Tsib Tiad qhais Lanpaas

1Yakhawj hnob Lanpaas cob tus has tas, “Yakhawj taw muas txhua yaad kwg yog pes vaid ni tug coj muz taaz hubtsig liad. Niz muaj txaz npluanuj ted yog taw luz qhais pes vaid nkaws nyaz.” 2Has niz paws has tas Lanpaas tsi nrug niz sis rawg zoo ni istxwd muaj yaab taaz luz liad. 3Ces tuz Tswb ha has tu Yakhawj has tas, “Koj ca ni rob qaas muz tu tid koj vaid has koj cob kwbtij lus teschias. Kud yiad nrugnraid koj.”

4Yog ni qhai, Yakhawj ha tso neeg muz has tu Laxees has Le-as, kuas ostug tuaj ntsis niz tu tod tes kwg yog qhob chia cob tsaj nyos. 5Niz ha has tu ostug tas, “Kud paws liad has tas, mej vaid tsi nrug kud sis rawg zoo ni istxwd kwg niz ua tu kud luz liad, tadsis kud vaid tuz Vaajtswb yeej istxwd nrugnraid kud. 6Mes yeej paws zoo liad has tas, kud raw sas ntso ua hujlwd tu mej vaid kiag kud tuz daaz tuz zug ni. 7Txiad yog kud ted ua npawd ni qhai los niz tseed nyag has hloob txu kud tej nqai zug kawd zag liad. Tadsis Vaajtswb tsi pus niz ua phed tu kud. 8Thaws kwg Lanpaas has tas, ‘Muas cob tshis kwg txaij tej teeb ua nqai zug tu koj,’ ces cob tsaj txiad yug taw minyuas txaij taaznrhiab. Thaws niz has tas, ‘Muas cob tshis kwg txaij tej kaas ua nqai zug tu koj,’ ces cob tsaj txiad yug taw minyuas txaij ua tej kaas taaznrhiab. 9Vaajtswb taw muas cob tsaj qhai tshed tiad qhais mej vaid has coj luz tu kud.

10Thaws txug caij kwg cob tsaj sis phood kud txiad ua is zaaj npaw suab, kud pud cob lawz tshis kwg taastod phood mawd qhai yog cob txaij ua tej teeb has txaij ua tej kaas. 11Vaajtswb is tug tidtswb luz has tu kud hub zaaj npaw suab qhai has tas, ‘Yakhawj!’ Kud tes has tas, ‘Kud nyos qhais na.’ 12Niz has ntxib tas, ‘Koj nuad maj cob lawz tshis kwg taastod phood mawd qhai puabtsig yog cob txaij ua tej teeb has txaij ua tej kaas nyaz. Kud taastod ua kuas muaj tej na tshwdsid luz, tu qhob kud pud tej kwg Lanpaas ua tsi zoo tu koj. 13Kud yog tuz Vaajtswb kwg luz tshwd tu koj pud nraaz Npethees, qhais thaaj chia kwg koj muas lus poszes luz tees ua chia ncu txug kwg koj muas roj txibntoo laws tu saw ua khood fij has yog thaaj chia kwg koj cogluz tu kud ntaag. Nizna koj ca ni npaaj kuas txhij has rob qaas muz tu nraaz lus teschias kwg yug koj.’”#Chk 28.18-22

14Laxees has Le-as tes Yakhawj has tas, “Ws yeej tsi tshuab is yaad qustxeeg qusteg kwg ws vaid tseg tu ws nyos hub ws vaid tseb ni. 15Niz nuad ws is yaad ni yog neeg txiab teschias nyaz. Niz muas ws muag, has nizna niz muas tej nyaj kwg yog ws tej nqai qhai sib taaz hubtsig liad. 16Txhua yaad kwg Vaajtswb muas qhais ws vaid luz liad, puabtsig yog pes has pes tej minyuas tuz liad. Koj ca ni ua rias ni tuz Tswb taw has tu koj liad.”

17-18Yog ni qhai, Yakhawj ha siab has rob qaas muz cuag niz vaid tu nraag teschias Kana-aas. Niz muas niz cob minyuas has niz os tug puj nthe caij saw cob ntxhuab nrawqawd, has rias taaznrhiab niz cob tsaj muz ua niz ntej, has coj txhua yaad kwg niz khwb taw hub teschias Padaas Alaas luz. 19Lanpaas taastod muz txab plaws yaaj liad, ces thaws kwg niz tsi nyos hub tseb liad, Laxees txiad muz nyaz taw niz vaid cob mlod zub tseb coj muz liad. 20Yakhawj nyag keb tsib ntsag nti tsi qha tu Lanpaas paws has tas niz tsib muz liad. 21Yakhawj coj txhua yaad kwg yog niz tis has maaj ceeb nrooz muz hlaa tuz Dej Efalates has tawgkeb muz tu tid lus laaj roos Nkile-as liad.

Lanpaas Riad Yakhawj

22Taw pes hnoos tod qaas muaj neeg muz qha tu Lanpaas paws has tas Yakhawj ted tsib liad. 23Niz ha txhij niz cob neeg nrug niz muz riad Yakhawj qaas taw xyaa hnoos, cud ha riad cuag Yakhawj tu qhais lus roos Nkile-as. 24Hmo qhai Vaajtswb luz has tu Lanpaas hub nruas npaw suab has tas, “Koj ceebfaaj tsi xod muz txos Yakhawj hlo ni.” 25Yakhawj ha tsaa tseb ntaws su saw laaj roos, Lanpaas has niz cob neeg kuj tsaa tseb ntaws su tu saw lus roos Nkile-as qhai has.

26Lanpaas has tu Yakhawj has tas, “Vid nicaaz koj nyag keb tsib tiad qhais kud has coj kud os tug ntxhais tsib is yaad ni tej puj kwg lag ntez taw hub tshaab rog luz? 27Vid nicaaz koj ua sas dus nyag keb tsib ntsag nti tsi qha tu kud paws? Yog koj qha kud paws, kud yiad xaa koj siab keb luz qhais keb zoo sas nrug tej suas hu nkawj lodzed has nkawj nogncaas. 28Koj txiad tsi pus kud hna kud cob xeesntxwz has kud os tug ntxhais ua keb sis ncaid ni. Qhob kwg koj ua taaz luz qhai mas yog ruag kiag nkaws ni! 29Kud muaj cuaskaab yiad ua tu koj rawg keb puadtsuaj taw, tadsis naag hmo koj vaid tuz Vaajtswb luz txwb tsi pus kud ua nyaab tu koj hlo ni. 30Kud paws qhob kwg koj tsib, tu qhob koj maaj rob qaas muz txug tseb heeb, tadsis vid nicaaz koj nyag kud cob mlod luz liad has?”

31Yakhawj tes has tas, “Tu qhob kud ntshai nyos tsaad koj coj koj os tug ntxhais tsib tiad qhais kud muz, mas kud ha tsi qha tu koj. 32Tadsis yog koj nrhab taw pes cob qhais na tuz twg taw coj koj cob mlod luz liad, ca ni muas tuz qhai tua laidtaa. Pes cob neeg puabtsig nyos qhais na nrug ua tidkhiab, tshias txhua yaad kwg yog koj tug coj hubtsig rob qaas muz.” Yakhawj tsi paws has tas Laxees yog tuz nyag Lanpaas cob mlod qhai luz.

33Lanpaas ha muz tshias hub Yakhawj tej tseb ntaws taaz, ces niz maad muz tshias hub Le-as lus tseb ntaws, has hub os tug ntxhais qheb os lus tseb ntaws, tadsis niz nrhab tsi taw niz cob mlod qhai ni. Ces niz maad muz tshias hub Laxees lus tseb ntaws. 34Laxees yeej taw muas cob mlod kwg zub tseb qhai has niz muas qhwb ntsias tu hub lus nraa ntxhuab has niz nyos zawdtsiaz saw. Lanpaas muz tshias thoos pliaz hub cob tseb ntaws, tadsis niz nrhab tsi pud cob mlod qhai ni. 35Laxees has tu niz vaid tas, “Vaid, thob koj tsi xod chid tu kud, qhob kwg kud tsi muaj cuaskaab luz siab qhais koj xusntag, ted yog kud taastod coj khawsduag.” Lanpaas nrhab kiag, tadsis tsi pud niz cob mlod qhai ni.

36Yakhawj chid heeb tswj tsi taw niz lus sas ni liad. Niz ha noog npaw tiaz vog has tas, “Kud taw ua txhud koj daastsi? Kud taw ua txhud txuj cai twg ha ua tu koj muaj cai tuaj riad kud txug qhob na? 37Nizna koj ted tshias taaz kud tej khood hubtsig liad, koj puas pud muaj is yaad khood twg kwg yog koj ni? Ca ni muas rhu tiad luz tso taasmeeg tu koj cob neeg has kud cob neeg pud, has ca cud txabtxid tu ws os tug na nuad tuz twg ha ua yog. 38Kud nrug koj nyos taw neez nkawd xyoo, ua tu koj tej yaaj tej tshis fuadvaad tsi tu ncua, has kud yeej tsi taw tua koj tej yaaj is tug noj ni. 39Thaws kwg is tug yaaj twg rawg tsaj qud tud liad, kud yeej thed tuz qhai hubtsig tu koj. Kud tsi taw coj luz qha tu koj tu qhob tsi yog tid kud. Koj tseed yuad kuas kud thed tej tsaj kwg tusnyas nyag nruas hnoos has hmo ntuj liad hubtsig tu koj. 40Ntaw zag kud tib tshaab ntuj kug thaws nruas hnoos has tib no thaws tsaws ntuj. Kud tsi taw zoo pw tsawg zawg hlo ni. 41Yeej zoo ni na luz taw neez nkawd xyoo kwg kud nrug koj nyos. Kud ua hujlwd kawd plaws xyoo luz hlub koj os tug ntxhais, has raw xyoo luz tu koj cob tsaj nkaws nyaz. Ua npawd ni qhai los koj tseed hloob has txu kud tej nqai zug kawd zag liad. 42Yog kud vaid tuz Vaajtswb, Anplahaas has Ixaj tuz Vaajtswb, tsi nrugnraid kud nyos, ntshai koj ted muas kud xaa rob qaas tez dias tez nplag liad. Tadsis Vaajtswb pud kud tej keb nyuaj sas has tej hujlwd kwg kud taw ua taaz luz liad, naag hmo niz ha taw luz txabtxid.”

Yakhawj has Lanpaas sis Has Hud

43Lanpaas tes Yakhawj has tas, “Os tug ntxhais na yog kud os tug, ostug cob minyuas los yeej yog kud tug, has tej tsaj na los puabtsig yog kud ni. Txhua yaad kwg koj qhobmuag pud qhais na puabtsig yog kud tug. Tadsis hnoos na kud yiad ua caaz taab taw kud os tug ntxhais has ostug cob minyuas keb, 44kud ha npaaj sas yiad nrug koj sis has kuas hud nyaz. Ca ws khiad poszes luz tees ua is qhob chia ncu txug ws cob luz cog tseg na.”

45Yog ni qhai, Yakhawj ha khiad taw is cob poszes luz tees ca ua lus cid ncu txug. 46Yakhawj ha has kuas niz cob neeg muz khiad poszes luz tees ua is piag ca. Ces cud txiad raw mo noj ua ke nyos qhais piag poszes qhai is saas. 47Yog ni qhai, Lanpaas ha tis npe tu piag poszes qhai hu ua Yenkas Xahaduthas,#31.47 Yenkas Xahaduthas: Lus npe na luz Ala-mais txhais has tas, “piag poszes kwg ua lus cid tu ws ncu ntsoob.” Tadsis Yakhawj tis npe tu piag poszes qhai hu ua Nkale-es.#31.47 Nkale-es: Lus npe na luz Henplais txhais has tas, “piag poszes kwg ua lus cid tu ws ncu ntsoob.” 48Lanpaas has tu Yakhawj has tas, “Piag poszes na yiad ua lus cid ncu txug ws tej luz cog tseg.” Ted yog vid ni na ha tis npe tu thaaj chia qhai hu ua Nkale-es. 49Lanpaas has ntxib tas, “Thob kuas tuz Tswb tsodkwd ws thaws ws sis ncaid is tug muz nyos tu is qho liad.” Yog ni qhai, ha muas thaaj chia qhai tis npe hu ua Mixepas.#31.49 Mixepas: Lus npe na luz Henplais txhais has tas, “yog qhob chia kwg nuad ntsoob.” 50Lanpaas tseed has ntxib tas, “Yog koj tsidtxod kud os tug ntxhais lossis muz yuab nadyaw, txiad yog kud tsi paws txug tej kwg koj ua qhai los xij, kuas koj ncu ntsoob has tas Vaajtswb yeej nuad ntsoob ws os tug hubtsig. 51Qhais na yog cob poszes kwg kud saw luz tees nruasnraas qhais koj has kud, has qhais na yog tuz ncej zes kwg ua lus cid cogluz tseg ca. 52Piag poszes has tuz ncej zes na, yog ua lus cid kwg ncu ntsoob ca. Kud yiad tsi hlaa piag poszes na tuaj tua koj, has koj yiad tsi hlaa piag poszes na lossis tuz nce zes kwg yog lus cid ncu txug na tuaj tua kud ni. 53Ca Anplahaas tuz Vaajtswb has Nahaws#31.53 Anplahaas … Nahaws: Anplahaas yog Yakhawj yiad, has Nahaws yog Lanpaas vaid tuz Vaajtswb ua tuz txabtxid tu ws os tug hubtsig.” Ces Yakhawj ha tuab Vaajtswb tuz kwg niz vaid Ixaj pehiad lus npe cogluz tseg. 54Yakhawj ha muas is tug tsaj luz tua fij tu saw lus roos qhai, has niz hu taaznrhiab niz cob neeg luz noj. Tod qaas kwg cud noj mo taaz liad, cud tseed rob pw is hmos saw lus roos qhai ntxib has. 55Hnoos tod qaas thaws siab ntxub Lanpaas ha muz hna niz cob xeesntxwz has niz os tug ntxhais has food kooshmoob tu cud taaz, ces niz txiad ncaid cud rob qaas muz tseb liad.

Currently Selected:

Chibkees 31: CQD2024

Highlight

Copy

Compare