Chibkees 22

Vaajtswb Kuas Anplahaas Muas Ixaj Fij

1Taw is ntus tod qaas na Vaajtswb txiad sid Anplahaas sas. Vaajtswb hu Anplahaas has tas, “Anplahaas!” Anplahaas tes has tas, “Kud nyos qhais na.”

2Vaajtswb has tas, “Koj ca ni coj koj tuas tug tus Ixaj kwg koj hlus tshaaj pliaz, muz tu pez teschias Mawliyas. Koj ca ni muas niz tua hliab fij pus tu kud saw lus roos kwg kud yiad qha tu koj.”#2 Xvn 3.1

3Hnoos tod qaas thaws siab ntxub Anplahaas siab luz txab tiaz npaaj coj muz hliab khood fij, muas tiaz led tu niz tuz neez luab thuj, coj Ixaj has coj niz os tug tusqhe nrug niz muz. Cud txiad siab keb muz tu pez qhob chia kwg Vaajtswb taw qha tu Anplahaas liad. 4Thaws cud muz taw pes hnoos ke liad, Anplahaas tsaa qhobmuag nuad pud thaaj chia kwg Vaajtswb qha tu niz tseed nyos kes. 5Ces niz txiad has tu os tug tusqhe has tas, “Mej nrug tuz neez luab nyos qhais na. Kud tuz tus has kud yiad muz pehiad Vaajtswb nyos tu pez, thaws ws pehiad taaz, ws maad rob qaas luz.”

6Anplahaas muas cob tiaz kwg yiad hliab khood fij tu Ixaj kwb, Anplahaas coj rag has hluabtiaz, ces ostug txiad muz tu pez roos liad, 7Ixaj has tas, “Vaid!”

Anplahaas tes has tas, “Tus, koj has daastsi?”

Ixaj noog has tas, “Vaid, kud pud koj muaj hluabtiaz has muaj tiaz, tadsis tuz minyuas yaaj kwg yiad coj muz tua hliab fij nyos qhob twg?”

8Anplahaas tes has tas, “Vaajtswb yiad muas is tug minyuas yaaj tu ws.” Ces ostug os txibtus txiad ua ke tawgkeb muz liad.

9Thaws ostug muz txug qhais qhob chia kwg Vaajtswb qha tu Anplahaas liad, Anplahaas ha tees taw is lus thaaj has muas tiaz tso tu saw lus thaaj qhai. Niz ha muas niz tuz tus paab has coj muz tso tu saw cob tiaz, saw lus thaaj.#Yak 2.21 10Ces Anplahaas txiad khiad nkaws rag luz yiad nkawg Ixaj. 11Taadsid qhai tuz Tswb tuz tidtswb hu tiag ntho saw ntuj tuaj tu Anplahaas has tas, “Anplahaas, Anplahaas!”

Anplahaas tes has tas, “Kud nyos qhais na.”

12Tuz tidtswb has tas, “Tsi xod tua tuz mitus ko has tsi xod ua nyaab tu niz hlo ni, nizna kud paws has tas koj yeej noog luz has fwd Vaajtswb heeb, tu qhob koj tsi khubxid koj tuas tug tus, koj zoo sas hlo coj tuaj pus tu kud.”

13Anplahaas tig hlo nuad puagncig, niz pud is tug phia yaaj kug kaig qhais is xyub hmaas. Anplahaas ha muz muas luz tua hliab fij tu Vaajtswb hloob niz tuz tus chia.#Hen 11.17-19 14Anplahaas ha tis npe tu qhob chia qhais hu ua, “Tuz Tswb npaaj tseg.”#22.14 npaaj tseg; lossis Tuz Tswb pud. Has txiad yog naj hnoos nizna los neeg tseed pheej hu has tas, “Saw tuz Tswb lus roos kwg niz npaaj tseg.”#22.14 npaaj tseg; lossis ted pud liad.

15Tuz Tswb tuz tidtswb rob hu saw ntuj tuaj tu Anplahaas kua zag os has tas, 16“Kud cogluz luz qhais kud lus npe, kud yiad food kooshmoob nplua mag tu koj, tuz Tswb yog tuz has ni na. Tu qhob koj taw ua rias ni kud has has koj tsi khubxid koj tuas tug tus kwg koj muas fij tu kud. 17Kud ha cogluz tseg tu koj has tas, kud yiad pus koj muaj xeesntxwz coos npawd ni tej hnoosqus saw nruas ntug, lossis npawd ni tej suaszes nraaz ntug habtxwb. Koj cob xeesntxwz yiad ntaws yeej cud cob yeesncuas.#Hen 6.13,14#Hen 11.12 18Has kud yiad food kooshmoob qhais koj cob xeesntxwz muz tu txhua yaad neeg kwg nyos hub qaas ntuj na, vid koj noog kud luz.”#Tez 3.25 19Anplahaas ha rob qaas luz tu nraaz niz os tug tusqhe, has cud rob luz tu nraaz Npesenpas kwg yog Anplahaas qhob chia nyos liad.

Nahaws Cob Xeesntxwz

20Taw tsi nteb luz tod qaas na muaj neeg muz qha tu Anplahaas has tas, “Milekas yug taw yid tuz minyuas tu koj tuz kwb Nahaws.” 21Uxes yog tuz tus hlus, Npuxes yog tuz kwb, Kemuyees kwg yog Alaas vaid, 22Khexes, Haxaws, Piledas, Yilafes, has Npethu-ees. 23Npethu-ees yog Lenpekas vaid. Milekas yug taw yid tuz tus na tu Nahaws kwg yog Anplahaas tuz kwb. 24Nahaws tuz nadyaw Lehumas, yug taw Tenpas, Nkahaas, Tahases has Ma-akas.

Currently Selected:

Chibkees 22: CQD2024

Highlight

Copy