Chibkees 21

Yug Ixaj

1Tuz Tswb food kooshmoob tu Xalas rias ni tej luz kwg niz taw cog tseg liad, 2Xalas ha xees tus has yug taw is tug tus tu Anplahaas thaws kwg Anplahaas lawz heeb liad. Tuz tus na yug rias ni lus caij kwg Vaajtswb teed tseg ca liad.#Hen 11.11 3Anplahaas ha tis tuz tus qhai lus npe hu ua Ixaj, 4ces thaws Ixaj hnoosnyood muaj yid hnoos, Anplahaas ha muas niz ua kebcai txab tia, rias ni Vaajtswb taw saadfwd tseg liad.#Chk 17.12; Tez 7.8 5Anplahaas hnoosnyood muaj is puas xyoo tu thaws yug Ixaj. 6Xalas ha has tas, “Vaajtswb taw muas txuj keb zoo sas has lus ntsejmuag rus#21.6 Rus: Ixaj lus npe, luz Henplais txhais has tas, “niz rus” (nuad 17.17-19). ntxhi tu kud. Txhua tuz kwg hnob zaaj na cud puabtsig zoo sas nrug kud rus.” 7Xalas has ntxib tas, “Tuz twg tseed yiad has taw tu Anplahaas tas, Xalas tseed tu tawz minyuas has los? Txiad ni qhai los kud ted yug taw is tug tus tu Anplahaas thaws niz hnoosnyood lawz heeb liad.”

8Tuz tus qhai luj hlus zoo, has hnoos kwg niz tseg taw mi liad, Anplahaas ha ua is rooj noj haws luj heeb.

Liab Hankas has Yisamayees Tsib

9Muaj is hnoos Hankas kwg yog neeg Izib tuz tus Yisamayees kwg niz yug tu Anplahaas, taastod ua si nrug#21.9 ua si nrug; lossis tso dlaaj tso rus nrug. Xalas tuz tus Ixaj.#21.9 Tej phaw qus txhais has tas, nrug Xalas tuz tus Ixaj; phaw Henplais tsi muaj cob luz na. 10Xalas pud ni qhai, niz ha muz has tu Anplahaas has tas, “Ca ni liab tuz ntxhais qheb na has niz tuz tus tsib muz. Tsi tsidnyog ca tuz puj na tuz tus taw koj tej qustxeeg qusteg is yaad ni, tsuas yog kud tuz tus Ixaj nyaz ha tsidnyog taw.”#Kal 4.29-30 11Zaaj na ua tu Anplahaas ntxhub sas heeb ni, tu qhob Yisamayees los yog niz tuz tus is yaad nkaws has. 12Tadsis Vaajtswb has tu Anplahaas has tas, “Koj tsi xod ntxhub sas txug tuz tus has tuz ntxhais qheb Hankas na hlo ni. Ca ni ua rias nraid ni Xalas has tu koj, tu qhob koj yiad muaj xeesntxwz coos luz qhais Ixaj rias ni kud taw cogluz tseg tu koj liad.#Loo 9.7; Hen 11.18 13Kud tseed yiad pus tu tuz ntxhais qheb qhai tuz tus kuas muaj tus coos heeb has cud yiad ua taw is yaad neeg. Niz los yeej yog koj tuz tus is yaad nkaws.”

14Hnoos tod qaas thaws siab ntxub Anplahaas ntid zaws mo has is hnaas tia dej muas tu Hankas kwb saw hawpwg. Anplahaas nthe hlo tuz tus tu Hankas ris tu saw nrawqawd has liab ostug tsib tiad muz. Hankas ha ua is sas muz has ncig muz ncig luz tod taj suaspuad Npesenpas. 15Thaws dej taaz liad, niz ha muas tuz minyuas tso pw tu hub is koog ntoo, 16has niz muz nyos nrug kes kwbyeez ni is ncua hneeb. Niz txiad xaab has tas, “Kud tsi xaab nuad kud tuz tus tu sab ni.” Thaws niz muz nyos qhais, niz txiad tsaa suas hlo quaj.

17Vaajtswb hnob tuz minyuas qhai lus suas quaj, has Vaajtswb tuz tidtswb ha has saw ntuj tuaj tu Hankas has tas, “Hankas, koj ntxhub sas ua daastsi? Tsi xod ntshai. Vaajtswb ted hnob koj tuz tus lus suas quaj liad. 18Ca ni siab tseez muz, has tsheb hlo niz puag ua tuaszoo ntxaz niz. Kud yiad pus kuas niz muaj xeesntxwz fuadvaad coos muz ua taw is yaad neeg.” 19Ces Vaajtswb ha qhes Hankas lus qhobmuag, has niz pud is lus qhobdej. Niz ha muz cug dej ntid pub nkaws tu hub lus hnaas tia has muas isntsis tu tuz tus haws. 20Vaajtswb yeej nrugnraid tuz tus qhais muz txug thaws niz luj hlus liad, niz nyos hub lus taj suaspuad Palaas, has niz yog is tug kwg txiaj tua nqaj heeb. 21Niz nad muz yuab taw cob neeg Izib is tug ntxhais luz tu niz ua puj.

Anplahaas has Anpimelej sis Cogluz

22Thaws lus sijhiad qhai Vaajntxwb Anpimelej nrug Fikawles, tuz thiaj kwg nuad niz cob tusrog tuaj, has has tu Anplahaas tas, “Vaajtswb yeej nrugnraid koj nyos has paas koj ua txhua yaad hubtsig.#Chk 26.26 23Yog ni qhai, kud thob cogluz tseg taasmeeg Vaajtswb has tas, koj yiad tsi daag kud, kud tej minyuas, lossis kud tej xeesntxwz hlo ni. Kud ted yeej ua zoo tu koj liad, yog ni qhai, koj yiadtsud taw cogluz ua zoo tu kud has lus teschias kwg koj nyos na.”

24Anplahaas tes has tas, “Kud txaws sas cogluz ni qhai ntaag.”

25Anplahaas nthe tu Anpimelej txug lus qhobdej kwg Anpimelej cob tusqhe tuaj txees taw liad. 26Anpimelej tes has tas, “Kud tsi paws has tas yog tuz twg txees. Koj yeej tsi taw qha zaaj na tu kud ni, yog thiaj zag kwg kud taw hnob koj pab txug zaaj na nyaz.” 27Ces Anplahaas muas tuz puab yaaj has nyuj pus tu Anpimelej, ces ostug ha sis cogluz. 28Anplahaas muas xyaa tuz minyuas yaaj cais tiad hub niz paas tsaj, 29has Anpimelej noog has tas, “Vid nicaaz koj ua ni qhai?”

30Anplahaas tes has tas, “Ca ni txais yuab xyaa tuz minyuas yaaj na muz. Qhob kwg kud ua ni na, yog ua kuas koj nrug leez paws has tas kud yog tuz khiaj lus qhobdej na ntaag.” 31Yog ni qhai, ha hu qhob chia qhai ua Npesenpas,#21.31 Npesenpas: lus npe na luz Henplais txhais has tas, “Lus Qhobdej Sis Cogluz,” lossis “Lus Qhobdej Xyaa Tuz Yaaj” (nuad 26.33). tu qhob ostug taw sis cogluz tu qhais thaaj chia qhai.

32Tod qaas kwg ostug cogluz nyos qhais Npesenpas taaz liad, Anpimelej has Fikawles ha rob qaas muz tu teschias Filitees liad. 33Ces Anplahaas txiad cog is tsos ntoo tamalis tu qhais thaaj chia Npesenpas qhai has pehiad tuz Tswb kwg yog Vaajtswb tuz muaj sa nyos muz istxhis. 34Anplahaas nyos hub teschias Filitees taw nteb heeb.

Currently Selected:

Chibkees 21: CQD2024

Highlight

Copy