Chibkees 23

Xalas Tuag has Anplahaas Yuab Aab Loz

1Xalas ua neej nyos taw is puas neez nkawd xyaa xyoo. 2Niz tuag tu qhais Kiliyas Alenpas (lossis yog Henploos), kwg nyos hub teschias Kana-aas, Anplahaas quaj ntsuag vid Xalas tuag liad.

3Anplahaas tso Xalas lus ceb tu qhais qhob chia kwg niz tuag qhai. Anplahaas ha muz cuag cob neeg Hitis has has tu cud tas, 4“Kud yog neeg txiab teschias luz nrug mej nyos hub na nyaz, thob mej muag is thaaj aab tu kud loz kud tuz puj.”#Hen 11.9,13; Tez 7.16

5Cud tes has tas, 6“Koj noog pes has tso. Koj yog is tug thiajcoj kwg muaj koos meej nyos nto moo lug tu hub pes na, ca ni coj koj tuz puj muz loz tu hub lus qhob tsua zoo tshaaj pliaz kwg pes muaj. Pes tuadtxhij puabtsig txaws sas muas is lus qhob tsua tu koj, koj ha taw chia loz koj tuz puj.”

7Ces Anplahaas txiad txhud cawg ntua qhais cud xusntag 8has has tas, “Yog mej txaws sas yuab ca kud loz kud tuz puj tu qhais na, thob mej paas has Xawhas tuz tus Efaloos, 9kuas niz muag lus Qhob Tsua Makepelas kwg nyos ze tu qhais niz thaaj tes tu kud. Thob kuas niz ca ni muas muag tuz nqai pub ntoos tu kud taasmeeg tu mej tuadtxhij qhais na, kud ha taw qhob chia loz tuag qhai luz ua kud tug.”

10Efaloos kuj nrug cob Hitis nyos ua ke qhais qhob chia saaslaaj kwg nyos qhais roojvaag nroog has, niz ha tes taasmeeg tu cob neeg kwg tuaj nyos qhais nrug hnob has tas, 11“Koj noog kud has, kud yiad muas taaznrhiab kud thaaj tes has lus qhob tsua kwg nyos tu hub pus hubtsig tu koj. Tid ntsej tid muag qhais kud yaad neeg, kud yiad muas pus tu koj, koj ha taw chia loz koj tuz puj.”

12Anplahaas txiad nyo haw ntshis hiad cob Hitis 13has has tu Efaloos tas, “Thob koj noog kud has has kuas tuadtxhij nrug hnob, kud yuab taaznrhiab koj thaaj tes. Thob koj txais cob nyaj kwg kud thed na muz, has kud yiad coj kud tuz puj tuaj loz tu hub.”

14Efaloos tes has tas, 15“Thaaj aab na, tuz nqai yog plaws puas daid nyaj, qhais koj has kud tsi muaj daastsi liad. Ca ni coj koj tuz puj muz loz tu hub.” 16Anplahaas zoo sas hlo has muas nyaj luz luj kuas txwd rias ni Efaloos taw has tu tuadtxhij nrug hnob liad, yog plaws puas daid nyaj kwg ntaws nqai is yaad ni tuz nqai kwg tej tus laag tus luad sib tod tej kas ntaag.

17Ted yog vid ni qhai, Efaloos thaaj tes hub Makepelas kwg nyos tu qhais Maales saas hnoostuaj kwg yog xaad taaznrhiab thaaj tes, lus qhob tsua has taaznrhiab tej ntoo kwg nyos tu hub thaaj tes thoos pliaz tu tej kwg nyos rias ntug tes, ha yog Anplahaas tug liad. 18Yog ni qhai, ha muas thaaj aab qhai ua Anplahaas tug tid ntsej tid muag cob neeg Hitis kwg tuaj kood saaslaaj qhai.

19Ces Anplahaas ha coj Xalas kwg yog niz tuz puj muz loz tu hub lus qhob tsua qhai, lus qhob tsua qhai nyos hub teschias Kana-aas. 20Yog ni qhai, cob neeg Hitis ha muas thaaj tes has lus qhob tsua kwg nyos tu hub muag tu Anplahaas ua chia loz tuag.

Currently Selected:

Chibkees 23: CQD2024

Highlight

Copy