YISEWE 26
26
1Efumano kapi lya wapera egova, ngwendi moomu ayi kara yikuruterengenze pokurombo ndi mvhura posiruwo setezo.
2Mafingiliro kapi ga ku retere simpagwa, nsene kapi ono ga liruganene. Ago kwa fana ngwendi yidira eyi ayi tuka, yi tembere ko nye mpaga.
3Wa hepa kusepura nkambe, to tura sitoma sindongili, to toona egova.
4Nsene to limburura epuro lyougova, ove kwa govapara nawa‐nawa ngwendi muntu ogu ana li pura.
5Limburura epuro lyougova nougova, makura ogu ana li pura a dimburure asi age kutupu ko nondunge moomu a gazara.
6Nsene to tumu mbudi negova, nyaamoge ono kundembura ko mbadi, to lipaparere udigu.
7Egova kuvhura li ruganese sisewe, moomu a vhuru kuruganesa muntu gosirema maguru gendi.
8Kufumadeka egova kwa fana kutura emanya mosizugumisiso.
9Egova kutemwinina nonkango dounongo, ado kukudiworokesa muntu gonkorwi ogu a kambadara kudura rwiga mokuwoko kwendi.
10Mugavi goyirugana ogu a kutu egova eli ali mu wizire, ta koresa tupu nkenye ogu komutjima.
11Egova eli ali rugana yininke yimwe yougova sikando sauvali, kwa fana ngwendi mbwa zina kutengwira poyirusi yazo.
12Egova lyenene hasa, kupitakana ogu a gazara asi age munandunge, age nye ga hana kukara nado.
13Yinke a dilire muntu goudwa kutunda membo? Eyi a tjira nani yinke? Vanyime ndi?
14Muntu goudwa kuligumagwira mombete. Age kapi a zi koure a pitakane peligumagwiro lyomuvero komakandura.
15Vantu vamwe kwa dwapa unene kutura yilya motuna twawo vene.
16Mugara goudwa kugazara asi age munandunge unene kupitakana vantu vatano‐navavali ava ava vhuru kugava nokonda donongwa pamagazaro gawo.
17Kulitura monompata da hana si sininke soge kwa fana ngwendi to zi konzira, to nyangura kutwi kombwa.
18-19Muntu ogu ta pukisa gumwe, makura ntani ana kuyidivisa asi age kuna danauka tupu, kwa lifana nomugara gomarayi ogu ana kudanauka noyirwiso yonomfa.
20Yitare nsene patupu, mundiro kudima; ano nsene patupu yikavauka, nomutangu kapi tagu horoka po hena.
21Makara gokuhwamekesa kutweresa yitare. Ano yitare kuvengaukisa mundiro. Valihadagwisi kukeresa po nomutangu.
22Yimpempa kwa tovara! Ee, ngapi tupu nye omu twa hara kuyimina?
23Nonkango donompyu edi adi horeke eyi ono kugazara nawa‐nawa kwa fana ngwendi sisiliveli sene‐sene esi sina kara mokayiga kerova kombiliha.
24Muyilipaki kuhoreka nyengo zendi konhi zononkango dendi donongwa. 25Nonkango dendi kuvhura di kare donongwa, nye wa ha di pura, yeeyi mwenyo gwendi kuna zura nyengo. 26Age kuvhura a rundurure nyengo zendi, nye nkenye eyi nga mona yininke yoyidona eyi a rugana.
27Vantu ava ava tegere vakwaawo yiraha, vene ava likwata. Ano ava ava simi makero, tava gwire mo.
28Ove kunyenga muntu pokuhara kumuzuvhisa kukora komutjima. Nonkango doyimpempa kapi adi reta yapeke, nye ezonauko lyelike.
Currently Selected:
YISEWE 26: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
