YISEWE 27
27
1Walye o litangere ezuva lyomungura, yeeyi kapi ono diva eyi nayi horoka po kutunda pwanaina.
2Vakweni va fumadeka — nampili vanayirongo, nye wa ha lifumadeka nyaamoge.
3Mukumo gemanya nogu gomuheke nokuguheteka si noudigu ou a reta muntu gomugova.
4Ehandu tali nenepa, tali zonagura, nye nokuliheteka si nesupa.
5Kupukurura muntu moyitarameho yendi hasa, kupitakana pokumugazaresa asi ove kapi o mu pakere mbili nampili nakauke.
6Mukweni nsene ta ku zuvhisa kukora komutjima, nawa tupu. Nye nkore nsene tazi kambeke mawoko gazo komapepe goge, zi tara nawa!
7Ove nsene ono kuta, to nyoka yinsira yousi, nye nsene zina ku kwata nzara, nondya doururu kudizuvha utovara.
8Muntu ogu a henze pembo, kwa lifana nosidira esi sina tundu posikorogo saso.
9Magadi gomurora noyitutumikidiso yedumba lyewa, kuhafesa mwenyo. Nye udigu kuzonagura mbili zomagazaro goge.
10Walye o divara vakweni ndi vakwawo woguho. Nsene una ku gwana udigu, wa ha pura ekwafo lyamunwanyoko. Mumaparambo goge ogu mwa likundama nendi kuvhura kukukwafa kupitakana munwanyoko ogu ga kara ure.
11Munwange kara munongo, makura ame tani hafa. Ame ngani limburura nkenye ogu nga pa nge usima.
12Vantu wonondunge kudimburura yimpagwa nsene tayi wiza, makura tava yi vanda. Nye vantu wokupira nondunge, awo kuvyukilira mo tupu, moruhura ntani nye vana kulivera.
13Munayirongo nsene ta gava erwakani lyendi li kare sipateko seyi ana hehera, li gusa. Gusa li kare sidiviso nsene kapi wa mu diva.
14Ove to gwana efingo kwamukweni, nsene to mu pindura ngurangura zonene nekundo lyezwi lyenene.
15Mukadi ogu ga hara nompata, kwa lifana nomata aga aga hona ezuva lyomurokwa. 16Ngapi nye omu no vhura kumumweneka? Wa hetekera ko tupu rumwe kumwenekeda mpepo ndi kukambadara kufungatera mugwawo gomuwa.
17Vantu kulironga‐ronga vene navene ngwendi moomu asi twepeke sivera sikwawo.
18Nsene to fire sinka sitji soukuzu ngo lya ko ekuzu lyako. Ano mukareli ogu a fire sinka hekurwendi ngava mu fumadeka.
19Sipara samoge ono kumona momema. Ano nyamoge ono kulimona momutjima.
20Magazaro gopantu kwa fana ngwendi sirongo sovafe; amo kwa kara mo narunye evega lyovantu wovanzi.
21Mundiro, kuheteka ngorodo nosisiliveli. Ano mauyungo govantu nago kuvhura kugaheteka.
22Nampili o toone mugova dogoro ta hara kufa, kapi to vhuru nampili nakauke kutoona ugova wendi u tunde mo mwendi.
23Lisa nonzwi doge noyimuna yoge moomu wa vhulira, 24yeeyi asi emona kapisi lyokukarerera. Ano di kare nomuhoko nado ngadi haga po. 25Wayi wokukuna to pongaike nokuteta wayi wokonondundu, ano wayi woupe awo kuna kukura. 26Ove kuvhura kurugana mudwaro gonohuki dononzwi doge, makura to randa epya noyimaliwa eyi ono gwana apa ono randesa yikombo yoge. 27Ano yikombo yokuhupa po ngayi ku pa masini pepata lyoge novakareli woge wovakadona.
Currently Selected:
YISEWE 27: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
