YISEWE 25
25
Yisewe yaSaromo simpe
1Eyi simpe yisewe yaSaromo eyi va pongaikire vantu vahompa gwaJuda Hisikiya.
2Ose tatu fumadeke Karunga kweyi ga horeka, tatu fumadeke ohompa kweyi vana kufaturura.
3Narumwe si asi o dive magazaro gahompa. Magazaro gendi kwa tu kara koure ngwendi ure weguru ndi nhiinhi zefuta.
4Gusa ko ruka kosisiliveli, makura muhambuli ta hambura sininke sosiwa unene. 5Gusa ko vagavindunge wovadona kosipara sahompa, makura epangero lyendi ngali divikwira uhungami walyo.
6Nsene to sikama kosipara sahompa, wa ha kambadara kumurundurura ove o limonekese unene. 7Sosiwa po sokukuzigida o kare pevega lyefumano kupitakana yokukutantera o gave evega kwagumwe ogu ga ku pita mekuto.
8Wa ha genderera kuza kepanguro, morwa sininke esi ono mono. Ano ndipo zimwe nsene tazi ku pe usima, ngapi nye omu no ninka?
9Nsene ove nomumaparambo goge kapi muna kulizuvha, yi liyongeni nyaamweni, mwa ha horora yihorekwa, 10neisi a diva nkenye ogu asi one kapi omu vhuru kuhoreka yihorekwa, one mu kare nye moukaro wonomuga.
11Nonkango edi vana uyunga nawa, kwa fana ngwendi siapere songorodo esi vana tura posiyaha sokulimbagura sosisiliveli.
12Ekorangedo eli a korangeda muntu ogu ga yi diva gumwe ogu ana hara kulipurakena, kwa kara nomulyo gomunene kupitakana potulinga tongorodo ndi urenga ou va rugana nongorodo zene‐zene.
13Ntumi zokulimburukwa kuhafesa mutumi gwazo, ngwendi mema gomatenda moupyu woposiruwo setezo.
14Vantu ava ava pingida yininke nye kapi ava yi sikisa mo kwa fana ngwendi maremo nompepo ezi za hana kureta mvhura.
15Elididimiko, kufundisa ko hompa, ano eraka lyombili tali tezagura po yisupa.
16Wa ha lihoka usi wounzi kupita pou ono hara. Ano usi wounzi kuvhura u ku rusise. 17Walye o dingura nkenye apa mumaparambo goge, neisi na ku roroka a ku nyenge.
18Ogu a tanta yimpempa, kwa fana ngwendi rufuro nomburo nosikutji sositwe.
19Kuhuguvara muntu gokudira kulimburukwa moudigu, kwa fana ngwendi gogu ana kukambadara kutakina nezego lyokukuka nokugenda nompadi zina songonyoka.
20Kudimbira muntu ogu ana kara moruhodi kwa fana ngwendi kuna gusa yikoverero yendi mezuva lyomufu, ndi ngwendi mungwa vana kugwaveka posironda.
21Nkore zoge nsene zina fu nzara, zi pa nondya zi lye, nsene zina fu enota zi pa ko yokunwa. 22Ove to nenepeke nomuga dendi, nye Hompa nga ku tengwida kuwoko.
23Rugambo kureta ehandu, moomu azi reta nawa nawa mpepo zokoMuzogo mvhura.
24Kutunga peguru lyonzugo hasa, kwa pitakana kutunga nomukadi gonompata membo limwe tupu.
25Kuzuvha mbudi zongwa zokutunda kosirongo sokoure, kwa fana ngwendi gogu ana kunwa mema gomatenda nsene enota lina ku reta mo.
26Muntu gomuwa ogu a ligava komuntu gomudona, kukudiworokesa runone runa nyata ndi etope lyouhungu.
27Kulya usi wounzi, kapisi nawa koge, yimo hena mokukambadara kulimonena efumano lyenene.
28Nsene kapi to vhuru kupangera ehandu lyoge, kutupu ko hena sirugana ngwendi sitata sa hana makuma esi sina zahamene yita.
Currently Selected:
YISEWE 25: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
