Vafilipi 2

Honeneni Kristusa

1Ukaro weni mwaKristusa nye wa pama ndi? Eharo lyendi kumuhengagwida ndi? Mwa kara momalikwatakano noMpepo ndi? Nye mwa kara tupu nonkedi nonkenda kovakweneni ndi? 2Nsene ngoso, sikisilireni mo ehafo lyange pokukara mutjima gumwe nemeharo limwe negazaro limwe nositambo simwe. 3Walye omu rugana yuma mokulitara pwaamweni ndi mokupapara efumano lyomawoko‐woko. Nye omu linunupike, tomu tara vakweneni asi va mu pita mekuto. 4Walye omu lipakere mbili nyamweni nyonelike, nye omu pakere hena novakweneni mbili. 5Magazaro gokufana ngesi yigo nye nomu kara‐kara nago mokatji keni, moomu ga kere nago Jesus Kristusa.

6Jesus nampili ngomu ga kere moukaro waKarunga,

kapi ga sininikire mononkondo asi a hetakane naKarunga.

7Nye age kwa linunupikire,

makura ta fana ngwendi musigona,

kumutara muntuuntu.

8Age kwa linunupikire,

ta limburukwa dogoro konomfa,

nda dogoro nokonomfa dokosilivindakano deedi.

9Mokonda zeeyi, Karunga yiyo ga mu zerura unene,

age yiyo ga mu ruka edina

lya pitakana madina nagenye,

10asi navenye va twire edina lyaJesus nongoro,

nava vemeguru nava vepevhu nawa wokonhi zevhu.

11Nkenye muntu a tongonone

asi Jesus Kristusa Hompa,

mokuyererepeka Karunga Guhwe.

Paimeni ngwendi nombungururu mouzuni

12Yipo nye vakwetu one ava na hara, moomu omu limburukwa narunye kwange, kapisi tanko ponili ntani, nye unene paapa ani pili po, kovekedeni nye mokuruganena eparu lyeni noutjirwe nekankamo. 13Yeeyi Karunga yige a rugana mweni, mu kare neharo nononkondo dokusikisa mo eyi ga panga.

14Nayinye omu yi rugane mwa hana mavhunguto ndi esinganyeko. 15Omu kare vakuhuki novahungami, mu kare vana vaKarunga mwa hana sipo mokatji kovantu ava va penga, awo hena va puka, mu paime mokatji kawo ngwendi nombungururu edi adi minikire mouzuni. 16Nonkango domwenyo di kwateni mawoko gavali, ame ngani ka likangangere po mEzuva lyaKristusa asi, kapi na nyandera ndi ni rugane mawoko‐woko.

17Nampili va zumbe nge ni kare nzambo zepuro lyeni noukereli weni, hawe, yilyo sa ehafo lyomu lyokuhafa kumwe neni namuvenye. 18Ehafo lyeni yimo nye ngorooro nali kara lyokuhafa kumwe name.

Timoteusa naEpafuraditusa

19Ame nina huguvara mwaHompa Jesus asi ngani vhura kumutumina usimbu Timoteusa, nkumwe ngayi ya koreke nge yokuyazuvha omu muna kerere. 20Timoteusa yige gelike thi ga konda nge sininga, age hena yige nga ya mu pakera mbili nawa‐nawa. 21Ano navenye kuna kupapara uwa wavene, kapisi waJesus Kristusa. 22Nye kudidimika kwendi mwa ku diva mokurugana kumwe name yoMbudi zoNgwa moomu ga likara muna naguhwe. 23Ame kuna huguvara kumutuma kweni usimbu‐simbu, sinene tupu na diva asi ngapi omu nava rugana nge. 24Na huguvara hena mwaHompa asi ngani mu myaukira usimbu name.

25Ame kuna gazara asi yiwa kutuma mukwetu Epafuraditusa kweni. Age murugani, age hena mukwayita mukwetu. One kwa mu tuminine nge a ya kwafe nge moruhepo rwange. 26Age kuna mu diworoka unene namuvenye, age hena yina mu guvike eyi mwa mu zuvha asi ta vere. 27Yosili ka verere unene, nkare a fe, nye Karunga ana mu fire nkenda, hawe, name hena, asi eguwo lyange lya ha vhuka unene. 28Ame kuna kumumutumina usimbu, mu ya mu mone, makura mu ya hafe, ano ame name makura eguwo lyange li tunde nge. 29Mu tambureni nehafo lyenene mwaHompa. Vantu wokufana ngoso mwa fira kuvafumadeka. 30Age momu‐momu nkare a fire sirugana saKristusa, mokukwafa nge mweyi nkare yi mu tjindire one.

Currently Selected:

Vafilipi 2: KWN

Highlight

Copy