Vafilipi 3

Uhungami wosili

1Pokuhulilira vakwetu, hafereni mwaHompa! Ame nokufa si unye wokumutjangwilira eyi na mu tjangerere nare, yeeyi ayo kumukoreka. 2Kotokereni varugani veyi yoyidona, nombwa odo, ava navenye ava geragura marutu. 3Yeeyi ose nyose veyi yovamba zene‐zene, ose ava atu kerere Karunga moMpepo, tatu likangangere mwaJesus Kristusa, kapisi atu huguvara vamba zorutu, 4nampili ni kare nokonda zokuhuguvara yininke yangoso. Nsene pweli ogu ga huguvara eyi yovamba, ame na mu pita. 5Ame kwa rugana nge yovamba ezuva lyautano‐nautatu, kwa tunda momuhoko goVaisraeli, ezimo lyange lyonkwaMbenyameni, kwa hampuruka nge morudi roVahebeli. Ame kwa kere ni Mufalisayi, ogu ngani sikisa mo Veta nawa‐nawa. 6Ame kwa kere ependa mokuhepeka mbungakriste, ano yokusikisa mo uhungami wopaVeta, naka si na zonene po. 7Ano yininke nayinye eyi na kere nayo, ntene tani yi teda ntaantani, hawe, ayo yininke ya hana edumba morwaKristusa. 8Nye yooyo sa yelike, hawe, nayinye yosili omu nina kuyitara, ayo yininke yomawoko‐woko tupu, ntene ni yi faneka nokudiva Hompa gwange Jesus Kristusa. Mwarwendi ame yiyo nye na yi nyokekera yininke nayinye eyi. Ame kuna yi nyokere asi ni kongwere po Kristusa, 9ni kare mwendi. Kapi na hungama mwanyamwange morwamokulimburukwa koVeta. Nye na kara nouhungami morwepuro lyokupura Kristusa. Uhungami ou kwa tunda kwaKarunga mokonda zepuro. 10Eyi yina koro nge po unene yokudiva Kristusa nokukoneka nonkondo devhumbuko lyendi, ame hena na hara ni nyande kumwe nendi, ngano ni mu fane nomonomfa dendi. 11Nampo name ngani ka sika ko kevhumbuko lyovafe.

Kudukira kositambo

12Ame kapi nina kutanta asi, yangesi nina yi kongwa ndi asi na sikilire mo. Nye tani yi dukire ngani yi gwane yi kare yange, yeeyi Jesus Kristusa nage ga gwana nge. 13Ano vakwetu, ame kapi nina kugazara asi nina yi gwana nare! Nye simwe selike sesi asi, na divara yanare yiyo nina kukondjera yokomeho. 14Kuna kuduka nina vyukilire kositambo, nkumwe ngani ka gwane mfeto ezi ga zigidira nge Karunga mwaJesus Kristusa.

15Ano natuvenye ava tuna sikilire mo, atu tedeni ngoso. Ntene tomu gazara moyininke yimwe namopeke, Karunga nga yi mu horwera poruzera. 16Sosinene po, tu kwameni nzira ezi tuna gendi dogoro ntaantani.

17Vakwetu, omu honene nge namuvenye. Ose twa mu pa sihonena sosiwa, nye omu honene ava ava si kwama. 18Yeeyi wovanzi ava ngani mu tantere rorunzi, nantaantani tani va mu tantere noruhodi, kuna kara nye nonkore dosilivindakano saKristusa. 19Nye uhura wawo ezonauko, yeeyi mazimo gawo yige karunga gwawo. Awo kuna kulikangangera yifisanomuga. Awo kugazara yininke yepevhu yelike. 20Ose vanaUntungi weguru, omu nga tunda Muzowoli, Hompa Jesus Kristusa, ogu tuna kundindira a ya tu parure. 21Age nga ya sitununa marutu getu gokuzonauka, ga fane rutu rwendi rouyerere, pokuruganesa nonkondo edi a vhuru kupangeresa nayinye.

Currently Selected:

Vafilipi 3: KWN

Highlight

Copy