Vafilipi 1

Ekundo

1Mbilive ezi kuna kutunda koPaurusa naTimoteusa, vakereli vaJesus Kristusa, zi ze kovapongoki navenye mwaJesus Kristusa, ava mwa kara moFilipi, nokovapitisili nokovakwafi wonombungakriste. 2Karunga Guhyetu naHompa gwetu Jesus Kristusa va mu fire nkenda oku tava mu pe mbili!

Paurusa ta kandererere Vafilipi

3Ame kupandura Karunga gwange apa ani mu gazara namuvenye. 4Narunye nsene tani mu kandererere, ame kumukandererera nehafo. 5Yeeyi twa likwateseni moyirugana yoMbudi zoNgwa, ha mwa tundira petameko dogoro nantaantani ngesi. 6Ano yangesi ame na yi diva nawa‐nawa asi, Karunga ogu ga tameka yirugana yendi yoyiwa mweni, nga yi sikisa mo mEzuva lyaJesus Kristusa. 7One kwa za nge komutjima, yiyo nye ya wapera nge kumugazadara ponkedi ezi. One kwa gwana nkenda kumwe name, apa ani kara monomango ndi pokugava undipo nopokukoreka Mbudi zoNgwa. 8Nye Karunga yige ndipo zange kweyi nina kuuyunga asi, na mu diworoka unene namuvenye norutjima romwaJesus Kristusa.

9Ame kuna kumukandererera asi, eharo lyeni ngano tali vhuka unene mediwo nomoukonentu naunye, 10asi mu wape kuhorowora yoyiwa po, mu kare muna kuhuka, one hena ngomu pire usima kovantu mEzuva lyaKristusa. 11Va mu zwide yiyimwa youhungami, eyi ayi tundilire mwaJesus Kristusa, asi Karunga a yererepe, age a fumanene po.

Mwenyo gwange Kristusa

12One vakwetu, ame kuna hara mu dive asi, eyi ya horokera nge, ayo mpito zongwa zokuhanesa Mbudi zoNgwa. 13Yangesi yina divikwa kovanomeni navenye womombara nokovantu navenye asi, ame kwa mangere nge morwaKristusa. 14Ekaro lyange monomango lya huguvaresa vakwetu wovanzi mwaHompa, va kare nomupampi mokuuyunga nonkango daKarunga va hana woma.

15Vamwe sili kuudisa Kristusa nesupa nonomutangu, nye vamwe negano lyewa. 16Ava ava yi rugana neharo lyewa, va diva asi, Karunga kwa tulira nge po asi ni gave undipo woMbudi zoNgwa. 17Vamwe kapi ava udisa Kristusa ponkedi zongwa, nye monomutangu. Awo kwawo asi tava gwederere ko koudigu wange womodorongo.

18Nayimwe si tupu oyo, sinene tupu tava udisa Kristusa nononkedi nadinye, nampili negano lyewa ndi negano lyedona. Ame yangesi kuyihafera, nye ngani yi hafera hena nokomeho. 19Yeeyi na diva asi, ngayi genda nge monaruwa morwamakanderero geni nosikwafa soMpepo zaJesus Kristusa. 20Eyi na ndindire po unene neyi na huguvara yeyi asi, narumwe si ame kufisa nge nomuga, nye eyi ngani kerera mupampi ngwendi mwanare, yiyo eyi asi Kristusa a fumane morutu rwange, ni paruke ndi ni fe. 21Yeeyi Kristusa eparu lyange, nomfa ngadi tungika nge. 22Kombinga zimwe, nsene ni kara nomwenyo, ame kuvhura kutwikira yirugana yange yomulyo. Nye asi ni dive ko nye eyi nani horowora, hawe tumbu! 23Ame kuna kara nye pokatji kahayinsika: kuna hara unene asi ni fe, makura ngani kare naKristusa, yeeyi eyi yiyo yiwa po nye unene. 24Nye eyi yokukara nomwenyo, nayo kuyihepa unene mwarweni. 25Ame kuna yi huguvara unene eyi, yiyo nye na divire asi ngani kara po, ngani kare kumwe namuvenye, mu ze komeho mepuro, mu li hafere. 26Ntani ngomu lifumadekera po unene mwaJesus Kristusa mwarwange, nsene ngani wiza hena kweni.

27Simwe selike po yiso esi asi, ukaro weni u lize noMbudi zoNgwa zaKristusa. Ntene ngani wiza kweni ndi ngani dire kuwiza, ngano ngani ya mu gwane, ndi ngani ya mu zuvhe asi tomu lizi mutjima gumwe, asi tomu rwire epuro lyokupura Mbudi zoNgwa nompepo zimwe tupu. 28Hena asi kapi gwa mu tororokwa, mu tjire nonkore deni. Yeeyi kwawo uradi weni yiso sidiviso sezonauko, kweni sezowoko, moomu a yi rugana Karunga. 29One mwa gwana nkenda zokukerera Kristusa, kapisi pokumupura kwelike, nani nye nopokumunyandera. 30None mwa kara moyita. Ayo yita eyi ngomu mono nge tani yi ru, ayo yiyo nina kurwa nelyezuva, moomu muna kuzuvha.

Currently Selected:

Vafilipi 1: KWN

Highlight

Copy