Marukusa 13

Jesus ta uyunga yehanaguro lyontembeli

1Apa ga pwagere Jesus montembeli, murongwa gwendi gumwe ta mu tantere asi: “Murongi, ko tara tupu aga mamanya nonzugo kounene!” 2Nye Jesus ta mu tantere asi: “To mono tupu nonzugo edi dononene? Yosili, kapi ngapa kara emanya limwe kontunda zekwawo, nagenye ngaga zunguruka.”

Yomalilimbo nomahepeko

3Jesus apa ga hingililire poNdundu zoMauzwe a livyuke nontembeli, makura tava mu pulire oPeturusa naJakopo naJohanesa naAndiliyasa kompengi asi: 4“Tu tantera asi ezuvake ngayi horoka yene eyi, noyidiviso mukwasinke ngayi kara po, nsene ngava yi sikisa mo nayinye eyi?”

5Makura Jesus ta tameke kuvaronga asi: “Nomeneni asi pa ha kara muntu gokumupukisa. 6Vanzi ngava wiza medina lyange, tava ya tanta asi, ‘Nyame Kristusa.’ Nye awo ngava pukisa vantu wovanzi. 7Ano nye apa ngomu zuvha yokuhamena yirwanangana nonomukukumo doyita, ya ha mu tukukisa. Morwa yiyo kuwiza, nye kapisi yiwo uhura. 8Morwa nomuhoko ngadi likataukira?-?kataukira, ano ga kare mauntungi nago ngosikwawo. Evhu ngali kankama komavega peke‐peke, ako hena ngaku kara nonsinge. Nye nayinye eyi etameko tupu lyomaudigu.

9“Ngomu kare ntani nyamweni nerungararo, morwa ngava mu twara konombangwiliro, ngava mu toona monosinagoge, tava mu twara komeho zovapangeli nohompa mwarwange, mu va gavere undipo morwarwange. 10Nye Mbudi zoNgwa yizo ngava hova tanko kuziudisira nomuhoko nadinye. 11Nye apa ngava mu kwata va ka mu tware kombangwiliro, nokulivinduka si kumupwaga, asi ngapi omu nomu ka uyunga. Nye eyi ngomu gwana pokaruwo kooko, yiyo ngomu uuyunga yooyo, morwa kapisi nyone wokuuyunga, Mpepo zoKupongoka. 12Mukurwamuntu nga gava mumbyendi va ka mu dipage, ano a kare guhyamuntu nage nga gava munwendi, makura vana ngava di vyuka vakurona vawo, va va dipage. 13Nye one ko, ngava mu nyenga navenye morwarwange. Nye ogu nga didimika dogoro nokouhura, yige nga paruka.

Ezonauko lyenene

14“Nye apa ngomu mona ezonauko lyenene mevango eli lya dira kuwapera — muresi a kwate egano lyeyi eyi yina hara kutanta — makura ava va kara moJudeya, ngava tjwayukire konondundu. 15Ogu nga kara peguru lyonzugo, ga ha humburuka a ka hare yininke monzugo zendi. 16Ano ogu nga kara mepya, ga ha tengura kembo a ka hare sikoverero sendi. 17Ani name, vakwetu, vakadi ava ngava kara nezimo, nava ngava zamweka momazuva ogo! 18Nye kanderereni asi etau lyeni ngali dire kukara pokufu. 19Makura ntani nye ngapa kara udigu wounene, ou wa dilire kukara po kutunda apa ga sitire Karunga uzuni dogoro nokwanaina, wangoso kapi hena ngau kara po rumwe. 20Nye ngano mazuva ogo kapi ga ga supipika Hompa, ngano nomuntu si gumwe nga yoworoka. Nye mazuva ogo, Karunga kwa ga supipikira morwavahoroworwa vendi.

21“Nsenesi muntu nga mu tantera asi, ‘Tareni, Kristusa gogo!’ ndi asi, ‘Gogwina,’ mwa ha yi pura. 22Yeeyi ngapa kara oKristusa woyimpempa novaporofete woyimpempa, nye awo ngava rugana yidiviso noyitetu yoyinene. Nsenesi ngano kuvhura, novahoroworwa vaKarunga ngano nawo ngava va pukisa. 23Ano omu vangarare! Eyi nayinye kuna yi mu tantere, ayo ya hana kuhoroka.

Ewizo lyaMunwaMuntu

24“Tupu ngau pwa udigu womazuva ogo, makura ezuva tali sovagana, ku kare kwedi, kapi ngaku gava site sako hena. 25Ano nombungururu ngadi gwa ko keguru, di kare nonkondo deguru, ngadi linyunganga. 26Makura ntani nye ngava mona MunwaMuntu ta wiza, age momaremo, nononkondo dononzi nouyerere. 27Makura nga tuma vaengeli vendi, ngava ya pongaike vahoroworwa vendi momaruha gane gouzuni, kutunda kouhura wevhu dogoro nokouhura weguru.

Sifanekeso soukuzu

28“Kositji soukuzu lirongereni ko sifanekeso esi asi: nsenesi nomutayi daso dina tarara, yihako yaso ayo kuna kupumina, muna diva nye asi kurombo pepi. 29Napaapa yimo ngorooro, nsenesi ngomu mona yininke eyi, ngomu dive nye asi yina siki, pevero ana kara. 30Yosili nina kumutantera asi, vantu ava vantaantani kapi ngava lipwira po, ayo yininke nayinye eyi ya hana kuhoroka. 31Eguru nevhu ngali haga po, nye nonkango dange narumwesi ngadi haga po.

Nagumwe si ga diva ezuva novili

32“Nagumwe si ga diva asi ezuva nosiruwo apa ngasi sika mo, novaengeli si vemeguru noMuna si, ntudi Guhya ntani. 33Rungarareni, one mu vangarare, yeeyi kapi mwa diva apa ngasi sika mo siruwo. 34Ayo kwa lifana nomuntu ana kuza ugenda, a sige embo lyendi, makura ta pe vakareli vendi epangero, nkenye ogu ta mu pe sirugana sendi, ano mutakamesi gepevero ta mu tantere a vangare. 35Vangarareni nye, yeeyi kapi muna diva asi mwenyembo siruwoke nga wiza, ndi ngurova ndi pokatji komasiku ndi paapa ayi zigi yikondomboro ndi ezuva tali si. 36Nsene a wiza hararasi, neisi a ya mu gwana muna ponyoka. 37Eyi nina kumutantera, kuna kuyitantera navenye asi, vangarareni!”

Currently Selected:

Marukusa 13: KWN

Highlight

Compare

Copy