Marukusa 14

Maliyongo gokudipaga Jesus

1Ako mazuva ko gavali, sipito soPaska, soNomboroto da hana Muhahu si sike, makura vapristeli wovanene novalirongi womatjangwa tava limberaike asi va kwate Jesus mokahore‐hore va mu dipage. 2Awo tava tanta asi: “Nye kapisi posipito, neisi nazi wiza mo ndjorongani momuhoko.”

Jesus tava mu gwaveke moBetani

3Apa ga kere Jesus moBetani monzugo zaSimoni goyingondwe, yipo ga mu wizilire mukadi nosipako sosiwa semanya, aso sina zura magadi gondiro goNarudisi. Makura ta si swikura, ta ga mu tjire komutwe gwendi, age pompanda ana kara. 4Vamwe ava va kere po, tava zuvhu nyengo, makura tava litantera‐tantere asi: “Eh, eyi vana kugahepekera ngesi gene aga magadi hena yinke? 5Nda ngano kwa ga randesa yimaliva yokupitakana ponodenali mafere gatatu, va yi pe vahepwe!” Awo makura tava yi mu kuyauka unene. 6Nye Jesus ta tanta asi: “Mu sigeni! Yinke muna kumuhepekera? Age kuna ruganene nge sirugana sosiwa. 7Owo vahepwe nawo ngomu kara nkenye apa. Sinene muna yi hara, kuvhura tupu mu va ruganene yoyiwa, nye ame kapi ngomu kara kumwe name nkenye apa. 8Age kuna rugana paapa ga hulira. Age kuna tjire magadi korutu rwange, a livinduke kuruwapaikira evhumbiko lyaro. 9Yosili nina kumutantera, nkenye oku ngava udisira Mbudi zoNgwa ezi mouzuni mudima, neyi ana rugana ngava ka yi sanseka po, va mu diworokere po.”

Judasa ta lizuvhu novapristeli wovanene yokuhorora Jesus

10Makura gumwe powo murongo navavali, edina lyendi Judasa Isikalyoto, ta zi kovapristeli wovanene asi a mu va horwere. 11Awo eyi kwa yi haferere, makura tava lizuvhu va mu pe yimaliva. Judasa makura ta papara evega lyewa a mu va horwere.

Jesus ta li murarero goPaska kumwe novarongwa vendi

12Mezuva lyokuhova lyosipito soNomboroto da hana Muhahu, apa ava dipaga nzwigona zoPaska, varongwa vendi kwa wizire kwaJesus, tava ya mu pura asi: “Kupi oku ono hara, tu ka ku wapaikire Paska?” 13Age ta tumu varongwa vendi vavali, ta va tantere asi: “Zendeni kositata, ako nomu ka gwanekera ko nomugara ogu ana simbi kavaza komema. Ka mu kwameni. 14Nkenye oku na ka za, makura tomu ka tantera nturagumbo asi: ‘Murongi kuna kutanta asi, nzugo ezi nani ya lira Paska kumwe novarongwa vange, zipi po?’ 15Age na ka mu likida nzugo zonene zekeguru vana wapeke, omo yimo nomu ka zi wapaikira.” 16Varongwa makura tava zi, tava ka yi gwana moomu ga va tanterere Jesus, makura tava wapaike nzwigona zaPaska.

17Eyi lina kugomboka, makura Jesus ta wiza novarongwa vendi murongo navavali. 18Hava za mokulya, makura Jesus ta uyunga asi: “Yosili nina kumutantera, mukweneni gumwe ogu tuna kulya nendi, na horora nge.” 19Makura vena tava tameke kuguva, tava mu puragere gumwe‐gumwe asi: “Nani panga, kapisi nyame?” 20Age ta va limburura asi: “Gumwe pone murongo navavali, ogu nani vereda nendi posiyaha. 21MunwaMuntu ngadi mu gwana nomfa moomu va di mu tjangera. Nye nane vakwetu ehudi lyomuntu ogu ana kuhorora MunwaMuntu mutupu omu! Muntu ogo ngano kapi va mu hampuruka, ngano hasa yiwa!”

Murarero gokupongoka gwaHompa

22Hava za mokulya, Jesus ta gusa mboroto, ta pandura Guhwe, ta zi bamagura, a zi pe varongwa vendi, ta tanta asi: “Guseni mu lye, oru yiro rutu rwange.” 23Makura ntani ana kugusa hena nkinda, ta pandura Guhwe, ta zi pe varongwa vendi, vena makura tava nwaanwa mo navenye. 24Age makura ta va tantere asi: “Ezi yizo honde zange zEgwanekero lyepe, ezi ngazi tjikangera wovanzi. 25Nye ame tani mu tantere asi, kutunda pwanaina kapi hena ngani nwa yoyiyimwa eyi yoyindjembere, dogoro nekezuva eli ngani ka yi nwa yoyipe moUntungi waKarunga.” 26Makura tava dimbi rusumo rwehamberero, tava zi koNdundu zoMauzwe.

Jesus ta horora epatano lyaPeturusa

27Makura Jesus ta va tantere asi: “Masiku ganaina one namuvenye tomu ka limbilirwa mwarwange, yeeyi kwa tjanga asi: ‘Ngani dipaga musita, makura siunda sononzwi ngasi lihane.’ 28Nye apa ngani vhumbuka koufe, ngani hove kweni kuza koGalireya.” 29Peturusa makura ta mu limburura asi: “Nampili navenye va limbilirwe mwaroge, ame nampili kuna manga, asi ni limbilirwe mwaroge!” 30Jesus makura ta mu limburura asi: “Yosili nina kukutantera asi, masiku aga ganaina sikondomboro aso sa hana kuziga ruvali, ove nare ono patana nge rutatu.” 31Peturusa ta mu tantere nouradi asi: “Ame nampili ngano kufa, kufa tupu noge, nokukupatana si ame.” Varongwa navenye nawo yimo va uyungire.

Jesus ta kanderere moGesemani

32Kutunda opo tava zi nye pevega lyedina Gesemani. Makura Jesus ta tantere varongwa vendi asi: “Hingireni paapa, tanko ni ze, ni ka kanderere.” 33Makura ta gusa po oPeturusa naJakopo naJohanesa, a ze nawo. Makura ta tameke kukara neguwo nompwagetjima. 34Ta va tantere asi: “Mwenyo gwange yilyo sa eguwo lyomu, nda ngwendi ni fe. Kareni paapa oku tomu vangara.” 35Kwa zaaza ko tupu ta gu pevhu, makura ta kanderere asi ngano yokuvhura, siruwo esi ngano si mu runduke. 36Makura ta uyunga asi: “Tate, yininke nayinye koge ove kuvhura. Gusa nge nkinda ezi, zi tunde nge. Nye kapisi moomu nina panga ame, hawe, moomu ono panga ove.”

37Makura ta zi kovarongwa vendi, a ka va gwane awo vana rara. Ta pura Peturusa asi: “Simoni, nani ove kuna rara? Nani kapi ono vhuru kuvangara nampili karuwogona? 38Vangareni oku tomu kanderere, mu dire kugwira meheteko. Mwenyo ago mureru, kupura usimbu. Nye rutu kapi rwa paka nonkondo.”

39Kutunda opo ta zi hena, ta ka kanderera nonkango doodo. 40Eyi ga tengura, kuyavagwana hena vana rara, morwa nompofu nonzi da va kwete. Kapi va divire asi ngapi omu nava mu limburura.

41Ta wiza hena rwautatu, ta va tantere asi: “Hamwa rarera, mu pwizumuke. Makura nye, siruwo sina siki mo. Tareni, MunwaMuntu tava mu gava momawoko govananzo. 42Pindukeni, tu zeni! Tareni, ogu ana kuhorora nge, pepi ana kara.”

Jesus tava mu kwata

43Makura naruvali si, Jesus haga za mokuuyunga, Judasa gumwe po powo murongo navavali, ana pumike ko kumwe nombunga zonene zina kara nomafuro nonomuramu, vana va tumu vapristeli wovanene novalirongi womatjangwa nomasimbi. 44Muhoroli gwendi kwa uyungire nawo, ta va tantere sidiviso esi asi: “Googu tupu nani ka ncumita, yige googo. Mu kwateni, mu mu tware oku tomu mu nomene nawa‐nawa.”

45Judasa eyi ga wiza, nare ana zire Jesus, ta uyunga asi: “Murongi.” Makura ta mu ncumita. 46Vena nare vana ya mu rambere. 47Ano gumwe gwava va sikamene nendi, ta pweza mo efuro lyendi, ta kamuna ko kutwi komukareli gomupristeli gomunene, ta ku tete ko. 48Jesus makura ta va tantere asi: “One kuna wiza ngwendi vava vana wizire munamahaka nonomfuro nonomuramu, mu ya kwate nge. 49Ame si nkenye ezuva kumwe neni ngatu kareni montembeli oku tani rongo, nye kapi mwa kwete nge nye. Nye kuna kuyininkira asi matjangwa ga sike mo.” 50Kutunda opo navenye tava mu sigi, tava tjira.

51Mumatigara gumwe, ogu ga dwere sikoverero simwe tupu sokonhi sosizera, kwa kweme Jesus. Awo kwa hetekere ko asi va mu kwate, 52nye gwina ta va sigire sikoverero, ta ka duka ngorooro rutu‐rutu.

Jesus komeho zosigongi somasimbi

53Kutunda opo Jesus tava mu twara komupristeli gomunene. Makura vapristeli navenye wovanene nomasimbi novalirongi womatjangwa tava mu pongere. 54Nye Peturusa kwa mu kwama‐kwamene, age ana mu linapa, dogoro monda zerombe lyomupristeli gomunene. Makura ta hingire kumwe novakareli komundiro, a lidurure. 55Vapristeli wovanene nosigongi nasinye somasimbi tasi hara‐harere Jesus umbangi woyimpempa, va wape kumudipaga, nye naumwe si woowi va mwene. 56Morwa sinzi sawo yimpempa va uyungire, yeeyi maumbangi gawo kapi ga lizire.

57Vamwe kwa katukire tupu, tava mu uyungire yoyimpempa, tava tanta asi: 58“Ose twa mu zuvhire, ta tanta asi, ‘Ame ntembeli ezi va tungisa komawoko, kuzizungurura tupu, makura ni tungire po hena nkwawo momazuva gatatu tupu, ezi va dira kurugana nomawoko.’ ” 59Nampili yooyo maumbangi gawo kapi ga lizire mumwe tupu.

60Kutunda opo mupristeli gomunene ta sikama pokatji kawo, ta pura Jesus asi: “Ove nelimbururo si lyeeyi nani kweyi vana kukurundaika ava vantu?” 61Nye age teete zendi nelimbururo si lyeeli ga geve. Mupristeli gomunene ta tengwire mo hena kumupura asi: “Nani ove nyove Kristusa, MunwaKarunga ogu ga fumana ndi?” 62Makura Jesus asi: “Nhi, nyame, nye one ngomu mona MunwaMuntu, age ana hingire korulyo rwaKarunga Munankondo nadinye, age ta wiza pomaremo geguru.” 63Mupristeli gomunene kwa yi zuvha tupu, makura ta taura yikoverero yendi oku ta uyunga asi: “Umbangi wosinke hena natu hepeni? 64Eswaurokarunga muna li lizuvhire ko sa nyonevene? Ngapi nye omu muna kugazara?” Makura navenye tava mu tokwere usima wokumutwaredesesa konomfa.

65Vamwe po nare vana tameke kumufizira oku tava mu kudumike komeho, tava mu toona nononyongo. Ntani vana kumutantera asi: “Tanta ogu ana kutoona asi yige yilye.” Makura vakareli nawo tava mu toona momudona.

Peturusa ta patana Jesus

66Age Peturusa haga kerera mosinyanga somonda, tapa wiza mukareli gomukadi gomupristeli gomunene. 67Kwa mwene tupu Peturusa, age ta lidurura, ta mu tara, ta tanta asi: “Nove pwaJesus Munasareta wa kere.” 68Nye gwina ta patana, ta tanta asi: “Kapi na yi diva, hena kapi na kwata egano eyi ono kutanta.” Kutunda opo ta pwaga peharango lyoponze, makura sikondomboro tasi zigi. 69Mukarelikadona eyi ga ya mu mwene hena, ta tantere ava va sikamene po asi: “Mugara ogu nage kwawo ga hamene.” 70Nye gwina simpe kuna kupatana. Konyima zokaruwogona ava va sikamene po, tava tantere Peturusa asi: “Yosili nove kwawo wa hamena, yeeyi nove o Mugalireya, noruuyungo roge naro taru litanta.” 71Gwina kutunda opo hena ta lifingilire oku ta gana asi: “Mugara ogo muna kuuyunga, ame ndangame ni mu dive.” 72Kutunda opo sikondomboro aso tasi zigi rwauvali. Nani Peturusa haga yi kwatera eyi ka mu tantere Jesus asi, “Sikondomboro aso sa hana kuziga ruvali, ove nare ono patana nge rutatu.” Makura kutunda opo ta tende mo a lire.

Currently Selected:

Marukusa 14: KWN

Highlight

Compare

Copy