Marukusa 12

Sifanekeso sovanasikunino sovhinyu wovadona

1Makura Jesus ta tameke kuvauyungira moyifanekeso asi: “Mugara gumwe kwa ruganene sikunino: ta tapeke mo yindjembere, ta si gumbu, ta simine mo ukameno, makura ta tungire mo ruhungu rokutakamesera. Makura ta si heheda vanasikunino, ta zi ugenda. 2Pokuzangura‐zangura ta tumu mukareli kovanasikunino, va ka mu pe ko yiyimwa eyi ya mu tumbukira. 3Nye vena tava mu kwata, tava mu toona, tava mu tumu a tengure ngorooro, age ga hana yuma. 4Mwenyasikunino makura ta tumu ko mukareli gumwe hena. Ogo tava mu boyagura nombore, tava mu swaura. 5Makura ta tumu ko hena gumwe, ogo tava ka mu dipaga. Nye kwa kweme hena vamwe wovanzi, vamwe kwa va toonene, ava vamwe tava va dipaga. 6Mwenyasikunino kwa kere hena nomuna gumwe gomugara, ogu ga here unene. Yige ga va tuminine poruhura, ta tanta asi: ‘Munwange ngava ka mu tetuka.’ 7Nye vanasikunino tava liyongo vene navene asi: ‘Ogu yige mupingi. Tu mu dipageni, makura upingwa wosikunino ngau kare wetu!’ 8Makura tava mu kwata, tava mu dipaga, tava ka mu zugumina kesinya kwina lyosikunino!

9“Omu nga ya rugana‐rugana mwenyasikunino nani ngapi? Age nga wiza tupu, makura ta dipaga vanasikunino, oso sikunino sovhinyu ta si gava kwavamwe. 10Nani kapi mwa resa nani nonkango edi va tjanga asi:

‘Emanya eli va zumba vatungi,

yilyo lina kara emanya lyemekovhu.

11Hompa yige ga yi rugana,

ose kuyimona asi sitetu!’ ”

12Makura awo tava hetekere ko asi va mu kwate, nye kwa tjilire vantu, yeeyi va yi kwete egano asi sifanekeso esi ga uuyungire yiwo sa tambere, makura tava mu sigi tava ka za.

Yomutero

13Kutunda opo makura tava mu tumine Vafalisayi nava wonkwaHerodesa vamwe va ka mu senzereke mononkango. 14Tava wiza va ya mu pure asi: “Murongi, ose twa diva asi ove o munasili, hena asi ove kapi o tetuka muntu, yeeyi kapi o tara sipa somuntu, nzira zaKarunga o rongo mosili. Ose kufuta tupu mutero kwahompa gwaRoma, ndi nokuwapa si? Atu fute ndi walye atu futu?” 15Nye nare ana diva uyilipaki wawo, ta va pura asi: “Eyi muna kusenzerekera nge hena yisinke? Komu retere nge si sene simaliva somutero, ni si tare.” 16Vena tava si mu retere. Makura age ta va pura asi: “Efano eli nani lyalye, neli edina lya kara po nani lyalye?” Awo tava mu limburura asi: “Lyahompa gwaRoma.” 17Jesus makura ta va limburura asi: “Omu futire hompa eyi ya tumbukira hompa, ano Karunga yeeyi ya tumbukira Karunga.” Makura awo tava mu tetuka unene.

Yevhumbuko lyovafe

18Kutunda opo Vasadukayi tava wizire Jesus, ava ava tanta asi evhumbuko lyovafe patupu. Makura tava mu pura asi: 19“Murongi, Mosesa kwa tu tjangera asi: ‘Nsenesi muntu ana fisa mukurwendi, nye age a sige mukadi ga hana vana, makura ogo mumbyamuntu yige kugusa mukadi, a retere ogo mukurwendi vana.’ 20Nye pwa kere vagara vatano‐navavali mezimo lyawo. Ano mbeli ga kwere mukadi, makura ta fu, age ga hana kupaka po muna. 21Sikwamambeli ta gusa mukadi, nye age ta fu, age ga hana kupaka po muna. Goutatu nage ngosikwawo. 22Navenye moutano‐nauvali wawo kwa kwere mukadi ogo, nye kapi va peke po vana. Va pwa navenye, mukadi nage ta limanesa ta fu. 23Pevhumbuko nye, apa ngava vhumbuka, ogo mukadi gwalye nga kara? Yeeyi moutano‐nauvali wawo mukadi ogo gwawo ga kere.”

24Makura Jesus ta va tantere asi: “Kapisi yipo nye mwa pukira opo, mu dire kudiva matjangwa nononkondo daKarunga? 25Morwa vafe apa ngava va pindura koufe, nokukwara si hena, ngava kara tupu ngwendi vaengeli vemeguru. 26Ano yombinga zovafe asi ngava vhumbuka, kapi mwa resa nani mobuke zaMosesa yokuhamena sihwa sokuhwama, esi ga uyungisisire Karunga Mosesa asi: ‘Ame ni Karunga gwaAbirahamu, ni Karunga gwaIsaka, ame hena ni Karunga gwaJakopo.’ 27Ano Karunga kapisi Karunga govafe, age Karunga govanamwenyo. One nani kwa lipuka momunene.”

Sipango sosinene po

28Mulirongi gomatjangwa gumwe kwa hedere ko, makura ta zuvhu omu vana lipatana‐patana, ta mono hena asi Jesus ana va limburura nawa. Makura ta mu pura asi: “Sipangoke sosinene po kwanayinye?” 29Jesus ta limburura asi: “Sipango sosinene po yiso esi asi, ‘Israeli, purakena Hompa Karunga gwetu, yige Hompa gelike a huru. 30Ano o hare Hompa Karunga goge nomutjima goge nagunye, nomwenyo goge nagunye nonondunge doge nadinye nononkondo doge nadinye.’ 31Sauvali sa hura po sesi asi, ‘O hare mukweni moomu wa lihara nyamoge.’ Kutupu hena sipango esi sa pitakana eyi.” 32Makura mulirongi gomatjangwa ta tanta asi: “Uhunga murongi, eyi ono uyunga yosili, asi Karunga gumwe tupu ga kara, patupu hena gumwe ogu ga mu fana. 33Hena kuhara Karunga nomutjima nagunye nonondunge nadinye nomwenyo nagunye nononkondo nadinye, hena kuhara mukweni moomu wa lihara nyamoge, kwa pitakana nonzambo nadinye dokuswakerera nononzambo nonkwawo.” 34Apa ga mwene Jesus asi ana limburura panondunge, ta mu tantere asi: “Ove kapi ono kara ure noUntungi waKarunga.” Kutunda opo nagumwe si hena ga hetekere ko kumupura.

Yokuhamena Mesiyasa

35Haga za Jesus mokuronga montembeli, ta tanta asi: “Ngapi nye omu nava tanta‐tanta valirongi womatjangwa asi Kristusa MunwaNdafita? 36Morwa Ndafita mwene Mpepo zoKupongoka za mu uyungisire asi:

‘Hompa Karunga kwa tanterere Hompa gwange asi:

Hingira korulyo rwange,

dogoro noku ngani pake nonkore doge

ulyatero wonompadi doge.’

37Ndafita mwene kumutumbura asi ‘Hompa’, ngapi hena omu na kara age asi Munwendi?”

Jesus ta rondora varongwa vendi morwavalirongi womatjangwa

Mbunga zonene kwa kere neharo lyokupurakena Jesus.

38Jesus haga za mokuronga, ta va tantere asi: “Omu likunge kovalirongi womatjangwa, ava va hara kugendagura momarwakani gomare, va tokomena emororo pomarandero, 39noyipundi yekuto yomosinagoge neyi yomoyipito. 40Awo kulya po emona lyovafisavaya vawo oku tava lipaka kukanderera siruwo sosire. Nye ngava gwana mpanguro zondigu‐ndigu.”

Sigava somukadi gokufisa yendi

41Makura Jesus ta ka hingira a livyuke nosikesa soyimaliva yonzambo, a tare vantu omu vana kutura mo yimaliva mosikesa. Ano nongawo dononzi tava tura mo yimaliva yoyinzi. 42Nye pwa wizire mukadi gokufisa yendi gomuhepwe, ta tura mo tusenda tuvali. 43Jesus makura ta zigida varongwa vendi, ta va tantere asi: “Yosili nina kumutantera asi, mufisayendi ogu gomuhepwe yige ana gava po yoyinzi, kupita navenye ava vana tura mo mosikesa sonzambo. 44Yeeyi navenye ava vana gava, kuna yi gusa popanene, nye age kuna yi gusa pouhepwe wendi, a yi gave moomu ga yi wekera, eyi nkare yi mu parure moukaro wendi.”

Currently Selected:

Marukusa 12: KWN

Highlight

Compare

Copy