Mateusa 7

Yipangura yongenderera

1“Walye omu genderere kupangura, Karunga nage nga dire kumupangura. 2Yeeyi ngava mu pangwisisa koyipangura yeeyi omu pangwisa nayo. Si kare sihetekeso esi omu hetekesa, yiso ngava mu hetekesesa none. 3Yinke yokuzigira kavambi meho lyamukweni, ano ove wa hana kumona nkambo ezi zina vindama meho lyoge? 4Ndi ngapi no tantera mukweni asi, ‘Siga nge ni ku guse kavambi oko kana kara meho lyoge,’ nye ove nyamoge kuna ku vindama nkambo meho lyoge? 5Ano ove muyilipaki, hova tanko kuligusa nkambo ezi zina vindama meho lyoge, ntani nye no wapa kugusa kavambi komeho lyamukweni.

6“Walye omu pe nombwa eyi ya pongoka. One hena walye omu zugumine makwarara geni yinguru, neisi ngayi ga lyatanga nomakondo gayo, yi piruke yi mu lipapagwire po.

Yehundiro

7“Omu hundire, makura ngava mu pe; omu ngongore, makura ngava mu zegwilire. 8Yeeyi nkenye ogu a hundire kutambura, ogu a papara kugwana, ano ogu a ngongora kumuzegwilira. 9Ndi opo muna kara pokatji keni, yilye ogu a ninki, nsene munwendi ta mu hundire mboroto, makura age ta mu pe emanya? 10Ano eyi na mu hundira mfi, ta mu pe ezoka? 11Sipona nye nyone vadona mwa diva kupa vana veni yoyiwa, ngapi nye omu na dira kupitakana Guhyeni gemeguru mokuvapa yininke yoyiwa ava ava mu hundire?

12“Nkenye eyi mwa harera vantu asi ava yi mu ninke, none omu yi va ninke, yeeyi eyi yiyo azi tanta Veta nomatjangwa govaporofete.

Evero lyenunu

13“Omu hwililire mevero lyenunu, yeeyi evero kwa nenepa, ano nzira kwa ngwanyunuka, ezi azi twara kokudona. Sinzi sovantu yimo ava gendi. 14Nye evero ko enunu, ano nzira kwa likokera, ezi azi twara komwenyo, ano ava ava zi gendi vasesu.

Sitji noyiyimwa yaso

15“Omu tjire vaporofete woyimpempa, ava ava mu wizire monomudwaro dononzwi, ano nye monda zawo mambungu aga aga kwata, taga papagura. 16Koyiyimwa yawo yiko ngomu va divira. Eh, muroworowo kugunyanga komega? Ndi ekuzu kulinyanga kengamwe? 17Yimo nye ngorooro asi yimi nkenye sitji sosiwa yiyimwa yoyiwa, ano sitji sosidona yiyimwa yoyidona asi yimi. 18Sitji sosiwa kapi asi vhuru kuyima yiyimwa yoyidona, ano si kare sitji sosidona, kapi asi vhuru kuyima yiyimwa yoyiwa. 19Nkenye sitji esi sa ha yimi yiyimwa yoyiwa, ngava si teta, makura tava si zugumine momundiro. 20Yipo nye ngomu va divira koyiyimwa yawo.

Hana kara, ni mu dive

21“Kapisi nkenye ogu a tantere nge asi, ‘Hompa, Hompa’, yige nga za moUntungi weguru. Ano nye ogu nga za mo, googu a sikisa mo mpango zaTate gemeguru. 22Mezuva olyo wovanzi ngava tantera nge asi, ‘Hompa, Hompa, nani kapisi medina lyoge ngatu porofetere, yiyo ngatu tjidire mo nompepo donondona oku tatu ruganene yitetu medina lyoge?’ 23Makura ame ntani ngani va dukwira asi, ‘Ame one ha na kara, ni mu dive. Ligoreni nge mu ze kwi, one ava omu vatuka Veta!’

Vatungi wononzugo vavali

24“Ano nye nkenye ogu a purakene kononkango dange edi, makura ta di sikisa mo, kwa lifana nomunandunge ogu ga tungilire nzugo zendi pemanya. 25Makura eyi zina mbanduka mvhura zonomugedi, ekundungu li zi kundungire, nye azo zandjikiti morwakuzitungira kwazo pemanya. 26Ano nye nkenye ogu a purakene tupu kononkango dange edi, nye age ga hana kudisikisa mo, kwa lifana negova eli lya tungilire nzugo zalyo pomuheke. 27Makura mvhura zonomugedi tazi mbanduka, ekundungu tali zi kundungire, makura tazi mbandauka, nye embandauko lyazo enene lya kere.”

Mbunga tazi tetuka

28Apa ga mene Jesus kuuyunga nonkango edi, mbunga kwa tetukire unene erongo lyendi. 29Yeeyi age kwa va rongere nononkondo, kapisi ngwendi valirongi vawo womatjangwa.

Currently Selected:

Mateusa 7: KWN

Highlight

Compare

Copy