Mateusa 6

Yoyigava

1“Omu takamese, omu dire kurugana yirugana yeni yokukerera Karunga komeho zovantu, neisi mu pumbwa mfeto zaGuhyeni gemeguru. 2Ano nye nsenesi ono hare kugava sigava, wa ha si zigauka, moomu ava ninki vayilipaki monosinagoge nomononzira asi va gwanene po ekuto kovantu. Ame yosili nina kumutantera asi, vangesi nare va gwana mfeto zawo. 3Nye ove nsenesi to hara kugava sigava, kuwoko koge korumoho kwa ha diva eyi kuna kurugana kuwoko koge korulyo, 4sigava soge si kare mokahore‐hore. Ano Guho gemeguru, ogu a monene mehoramo, nga ku tengwida kuwoko.

Yekanderero

5“Nsenesi tomu kanderere, walye omu kara ngwendi vayilipaki, ava va hara kukanderera kansika monosinagoge noponompangwanzira, asi va moneke kovantu. Yosili nina kumutantera, vangesi nare va gwana mfeto zawo. 6Nye ove nsenesi to kanderere, zende o ka lizedilire monkondwa zonzugo, o ka hundire Guho ogu ga horama. Guho, ogu a monene mehoramo, nga ku rugwida kuwoko.

7“Nsenesi tomu kanderere, walye omu vhukisa nonkango dononzi ngwendi vapagani, yeeyi awo kugazara asi kuvazuvhira morwaunzi wononkango dawo. 8Walye omu va honene, yeeyi Guhyeni ga diva eyi mwa hepa, one mwa hana kuyimuhundira. 9Nsene tomu kanderere, omu kanderere ngesi asi:

‘Guhyetu gemeguru.

Edina lyoge ava li pongore.

10Uhompa woge au wize.

Mpango zoge ava zi zikise mo pevhu

ngwendi meguru.

11Tu pa naina nondya detu dankenye ezuva.

12O tu dongwenene po nonzo detu,

moomu atu dongwenene po nose wononzo detu.

13Walye o tu twara momaheteko,

nye o tu popere koudona.’

14“Yeeyi nsenesi mu dongwenena po vantu maunzoni gawo, Guhyeni gemeguru ngano nage nga mu dongwenena po aga geni. 15Ano nsenesi mu dira kudongwenena po vantu mauzoni gawo, Guhyeni gemeguru nage ngano kapi nga mu dongwenena po maunzoni geni.

Yediliro

16“Nsenesi tomu dilire nondya, walye omu ninki ngwendi vayilipaki, mu guve, yeeyi awo kukisumukisa yipara yawo asi vantu va va mone asi tava dilire. Yosili nina kumutantera, awo nare va tambura mfeto zawo. 17O dilire to romona mutwe goge nomagadi, to kuhu sipara soge, 18asi o dire kumoneka kovantu asi to dilire, nani o moneke kwaGuho, ogu a monene mehoramo. Ano Guho ogu a monene mehoramo, ngano nga ku rugwida kuwoko.

Yomalipongaikiro gemona

19“Walye omu lipongaikire emona pevhu, eli ali likana koyimbumburu nokonkerewe nokovawidi wokububagura monzugo va li vake. 20Nye omu lipongaikire emona meguru, omu mwa pira yimbumburu nonkerewe zokulizonagura, nomu mwa pira vawidi wokububagura, va li vake. 21Yeeyi oku aku kara emona lyoge, yiko kooko aku kara mutjima goge.

Uzera worutu

22“Ramba zorutu roge meho. Nsenesi meho goge ga kanguka, makura rutu roge mudima taru kara mouzera. 23Ano nye meho goge nsenesi ya yipa, rutu roge mudima taru kara momundema. Ano uzera womumoge nsenesi u sovagana, papi nye apa nau hura unene womundema?

Yosinka sokudira kuzira mo

24“Muntu simpe a vhuru kukerera ohekuru vavali, morwa na nyenga po gumwe, ta hara po mukwawo, ndi na korera kwagumwe, ta nusa po mukwawo. None nokuvhura si kukerera Karunga nomamona.

25“Yipo nye nina kutundira kumutantera asi: walye omu lipakere nomwenyo deni nomarutu geni sinka asi yisinke eyi nomu lya neyi nomu nwa, ndi asi yisinke eyi nomu dwara. Eh, nani mwenyo kapi gwa pitakana nondya, ndi ru kare rutu, kapi rwa pitakana yidwara? 26Komu tara si yidira: ayo kapi ayi kunu, kapi ayi zangura, hena kapi ayi pongaikire moyihete, nye Guhyeni gemeguru ta yi rere. Nani one kapi mwa yi pitakana mefumano? 27Ndi opo muna kara pokatji keni, yilye no ogu a vhuru morwasinka sendi kugwederera ko koukaro wendi kazuva kamwe?

28“Ano yisinke nye omu lipakerere sinka soyidwara no? Komu tara si tupu nombya domosanzara, omu adi kuru ado da hana kurugana ndi di tunge. 29Nye ame tani mu tantere asi, naSaromo si googu kapi nga dwara mountungi wendi mudima, a fane po nampili mbya zimwe. 30Ano Karunga, ogu a dwareke wayi ou au kara po naina mosanzara, nye mungura tava u paka mediko, ngapi nye omu na dira kumudwareka mu pitakane wayi, one vepurogona? 31Yipo nye nomu tundira kudira kulipakera sinka unene sokuninka asi yisinke eyi natu lya, ndi asi yisinke eyi natu nwa, ndi asi yisinke eyi natu dwara. 32Yininke nayinye eyi vapagani yiwo ava yi lipakere sinka. Guhyeni gemeguru ga diva asi nayinye eyi mwa yi hepa. 33Yipo nye nomu hovera tanko kupapara Untungi waKarunga neyi ga hepa ko kweni, ano yininke eyi nayinye ngano ngava yi mu gwederera po. 34Yipo nye nomu dilira kulipakera sinka kweyi yomungura, yeeyi olyo lyomungura nalyo nayalyo. Nkenye ezuva kwa kara nayalyo.

Currently Selected:

Mateusa 6: KWN

Highlight

Compare

Copy