Mateusa 8

Jesus ta verura munayingondwe

1Apa ga humburukire Jesus kondundu, mbunga zonene tazi mu kwama. 2Makura muntu goyingondwe ta mu wizire, ta mu twire nongoro, ta ninki asi: “Hompa, nsenesi o yi panga, ove kuvhura kuverura nge.” 3Jesus makura ta gonyonona kuwoko kwendi, ta mu gumu, ta ninki asi: “Nina yi panga, veruka!” Naruvali si nare ana veruka koyingondwe yendi. 4Jesus makura ta mu tantere asi: “Tara, wa ha ka yi tantera muntu. Nye ove zende o ka lilikide komupristeli, o ka gave nzambo, ezi ga paka po Mosesa, zi ka kare umbangi wawo.”

Jesus ta verura mukareli gomupitisili govakwayita

5Apa ga zire Jesus moKaperenaumu, mupitisili govakwayita vefere makura ta mu wizire, ta ya mu kanderere asi: 6“Hompa, mukareli gwange monzugo ana rara, uvera womondambo ana kuvera, nye age yiko sa kukora kwapa ana kuzuvha.” 7Jesus ta mu tantere asi: “Nani za, ni ka mu verure.” 8Mupitisili govakwayita vefere makura ta mu ninki asi: “Hompa, ame kapi na wapera asi ove o hwilire monzugo zange. Nye uyunga tupu nkango, makura mukareli gwange a veruke. 9Yeeyi nampili ngomu na kara name mepangero, nye nsenesi ni tantera gumwe povakwayita ava va kara mepangero lyange asi, ‘Zende,’ ta zi, ano ni tantere mukwawo asi, ‘Wiza,’ ta wiza, ano ni ninke mukareli gwange asi, ‘Rugana esi,’ ta si rugana.” 10Apa ga yi zuvhire eyi Jesus, ta tetuka, makura ta tantere vantu ava va mu kweme asi: “Yosili nina kumutantera: muntu gepuro lyokuhura apa kapi na mu gwana simpe moIsraeli. 11Nye ame tani mu tantere asi, koUpumezuva nokoUtokero ngaku tunda wovanzi, ngava ya hingire kumwe naAbirahamu naIsaka naJakopo moUntungi weguru. 12Nye owo asi yiwo venyaUntungi weguru, ngava va tjidira mekurundema lyoponze. Yimo ngamu ka kara siliro nomalikwetjo gomazego.” 13Makura Jesus ta tantere mupitisili govakwayita vefere asi: “Zende, yi ku horokere moomu ono yi pulire.” Makura mukareli gwendi ta veruka movili zoozo.

Jesus ta verura vantu wovanzi

14Eyi ana wiza Jesus monzugo zaPeturusa, ta gwana ngumweyi zaPeturusa age ana rara, ta vere morutu. 15Jesus ta mu kwata kokuwoko, upyu makura tau mu sigi. Ta katuka, ta va ruganene ezumbu.

16Eyi lya gomboka, tava mu retere wonompepo donondona wovanzi. Makura ta tjidisa mo nompepo konkango zendi, ta verura vaveli navenye, 17asi yi sike mo eyi ga uyungire muporofete Jesaya asi: “Age kwa likambeka upiranonkondo wetu, yiyo ga simba mauvera getu.”

Varongwa wokudira kusikilira mo

18Apa ga mwene Jesus mbunga zonene zina mu umbilikida, yipo ga pangere asi va mu rutise mesinya mwina lyekurudiva. 19Makura mulirongi gumwe gomatjangwa ta mu hedere, ta mu pura asi: “Murongi, ame nyove na hara ni ku kwame nkenye oku no za.” 20Makura Jesus ta mu tantere asi: “Vambanze nomakero gawo, yi kare yidira nayo noyikorogo yayo, nye MunwaMuntu kapi ga paka oku na sateka mutwe gwendi.” 21Ano murongwa gwendi gumwe ta mu tantere asi: “Hompa, siga nge tanko, ni ze ni ka horeke otate.” 22Nye Jesus ta mu limburura asi: “Kwama nge, siga vafe va horeke vafe vakwaawo.”

Jesus ta mwenekeda ekundungu

23Apa ga peramene Jesus mowato, varongwa vendi tava mu kwama. 24Makura va tara ko, ekundungu lyenene lina pinduka mediva. Wato taga u yambere mankumpi, nye Jesus kwa rere. 25Varongwa vendi makura tava mu zire, tava mu pindura asi: “Hompa, tu popera, tatu fu!” 26Jesus makura ta va limburura si: “Yisinke guna kumupwagera, one vanepurogona?” Ta pinduka, ta kava ekundungu nekurudiva, makura tali litura teete. 27Vantu makura tava tetuka, tava tanta asi: “Ogu hena muntu musinke, ogu azi pura mpepo nekurudiva.”

Jesus ta verura wonompepo donondona

28Jesus apa ga sikire mesinya mwina lyediva, mosirongo soVagadara, vagara vavali wonompepo donondona, ava va pwagere monontoko domamanya, tava mu simbagwire. Awo kwa lipirwire momudona, nagumwe si nga gendi nzira ozo. 29Makura tava zigire asi: “Ose noge hena pwasinke, ove MunwaKarunga? Kwa wizira oku o ya tu hepeke, aro ruveze rwetu rwa hana kusika mo ndi?” 30Awo utanga wounene woyinguru tau li, una va linapa nakauke. 31Nompepo donondona tadi mu ninki asi: “Nsenesi to tu tjida mo, tu siga nye tu ka hwilire moyinguru oyo.” 32Makura age ta di tantere asi: “Zendeni!” Makura ado tadi pwaga, tadi ka hwilira moyinguru. Va tara ko, utanga woyinguru kuna kundandumukira mekurudiva, tau fu mema.

33Vasita tava duka. Eyi vana wiza mositata, tava sanseke nayinye neyi ya horokerere wonompepo donondona. 34Makura sitata mudima tasi tjapuruka si simbagwire Jesus. Eyi vana mu mono, makura tava mu ninki asi ga ha kara momukunda gwawo.

Currently Selected:

Mateusa 8: KWN

Highlight

Compare

Copy