Mateusa 27

Jesus tava mu twara kwaPiratusa

1Ezuva apa lya sire, vapristeli wovanene nomasimbi goVajuda tava liyongo asi ngapi omu nava twaredesa Jesus konomfa. 2Makura tava mu twara, age moyipandeko, makura tava mu gava kwaPontiusi Piratusa, mupangeli gosirongo.

Nomfa daJudasa

3Judasa, muhoroli gwendi, apa ga mwene asi Jesus vana mu tokwere nomfa, makura malivero taga mu gwana. Yipo ga tengwidire nye yimaliva yosiliveli nomurongo ntatu kovapristeli wovanene nomasimbi, 4ta tanta asi: “Ame nina zono pokuhorora muntu ga hana nzo, va mu dipage.” Nye awo tava mu tantere asi: “Ose oyo mbili zayo zasinke? Oyo kutara kwanyamoge.” 5Makura Judasa ta ka zugumina yimaliva yosiliveli montembeli, ta ka lisina nongodi kositji.

6Vapristeli wovanene tava toragura yimaliva yosiliveli, tava tanta asi: “Eyi nokuwapa si kuyitura mosikesa semona lyontembeli, yeeyi ayo yimaliva yomponde.” 7Eyi va mana kuyiliyonga, makura tava randesesa ko epya lyomuhongi gerova, li kare evango lyokuvhumbika vanayirongo. 8Yipo nye ava li tumbwire epya eli dogoro nanaina asi ‘Epya lyoMponde’.

9Ngesi yimo da sikire mo nonkango domuporofete Jeremiya, edi ga uyungire asi: “Awo tava gusa yimaliva yosiliveli nomurongo ntatu, moomu va yi lizuvhire Vaisraeli, asi yimo na pita moomo. 10Makura tava yi gava, yi pite epya lyomuhongi gerova, moomu ga pangera nge Hompa.”

Piratusa ta puragere Jesus

11Jesus kwa sikamene kosipara somupangeli. Makura mupangeli ta mu pura asi: “Nyove hompa goVajuda ndi?” Jesus ta mu limburura asi: “To tanta.” 12Nye peheto lyovapristeli wovanene nomasimbi goVajuda, age nakumbutu si. 13Yipo ga mu pulire Piratusa asi: “Kapi ono kuzuvha ou usima wounene ngesi vana kukupa?” 14Nye Jesus nepuro limwe si ga mu limbwilire, dogoro mupangeli gosirongo tayi mu tetura unene.

Jesus tava mu tokwere nomfa

15Mwankenye sipito saPaska mupangeli nga hu kumangurura nkwate zimwe ezi va here vantu. 16Posiruwo oso awo kwa kere nonkwate zimwe ezi za zire nzaya, edina lyazo Barabasa. 17Piratusa makura ta pura mbunga, ezi za pongere po, asi: “Yilye ogu muna hara kumumangwilira, Barabasa ndi Jesus, ogu ava tumbura asi Kristusa?” 18Yeeyi age kwa divire asi awo kwa mu twarere Jesus kwendi morwamfudu.

19Age Piratusa haga hingilira posipundi sokupangwira, mukadendi ta mu tuminikida eraka asi: “Wa ha lipaka mogo muhungami, yeeyi ame monzodi zanaina kanyando nina mono mwarwendi.”

20Nye vapristeli wovanene nomasimbi tava zedagwire mbunga asi zi tumbure Barabasa, nye Jesus va mu dipage. 21Makura mupangeli ta va pura asi: “Pwava vavali yilyogu muna hara po, asi ni mu mangwilire?” Vena tava limburura asi: “Barabasa.” 22Piratusa ta va pura asi: “Ngapi nye omu nani mu rugana ogu Jesus ogu ava tumbura asi Kristusa?” Navenye tava zogomoka asi: “Va mu pampare kosilivandakano!” 23Mupangeli ta va pura asi: “Yisinke ga zona yoyidona?” Vena makura tava zogomoka unene asi: “Mu pamparesa kosilivindakano!” 24Makura Piratusa apa ga mwene asi neisi ana kutompora, ntudi kooko kuretesa po ndjorongani zi nenepe, ta gusa mema, ta kuhu mawoko gendi komeho zombunga, ta tanta asi: “Ame kutupu usima wohonde zogo muhungami. Eyi nyone yina tara.” 25Mbunga mudima tazi limburura asi: “Honde zendi ngava zi tu tondore kumwe novana vetu.” 26Makura Piratusa ta va mangwilire Barabasa, ano Jesus ta mu sepagwisa, makura ta mu gava, va ka mu pampare kosilivindakano.

Vakwayita tava swaura Jesus

27Kutunda opo vakwayita vaPiratusa tava twara Jesus mosinyanga somupangeli, tava mu pongaikire mbunga mudima zovakwayita. 28Awo makura tava mu hutura yidwara yendi, tava mu dwareke erwakani lyegeha, 29tava mu gangere nkata zomega komutwe, tava mu pe ruu mokuwoko kwendi korulyo. Makura tava mu twire nongoro, tava mu zoro oku tava ninki asi: “Moro, hompa goVajuda!” 30Makura tava mu fizagere mazeze, tava mu gusa ruu, tava ru mu toonesa momutwe. 31Eyi vana mana kumuzora nokumuswaura, tava mu hutura erwakani, tava mu dwareke hena yikoverero yendi. Makura ntani vana mu twara, va ka mu pampare kosilivindakano.

Jesus tava mu pampara kosilivindakano

32Pokupwaga mo mositata makura tava gwanekere nomugara gomoKirene, edina lyendi Simoni. Yige va kanderekedere, a simbe silivindakano saJesus. 33Makura tava siki kevango eli ava tumbura asi Gorogata, kuninka asi Evango lyoYikora. 34Tava mu pe vhinyu zokuvhonga nonyangwe asi a nwe. Eyi ga zi makera, ururu, ta nyoka kuzinwa.

35Eyi vana mana kumupampara kosilivindakano, yikoverero yendi makura tava yi ligavere pokuyininkira fungu‐fungu. 36Kutunda poyo tava mu hingilire, va mu kungamene. 37Porweguru lyomutwe gwendi tava tura po sitjangwa sononkango dousima wendi asi: “Ogu yige Jesus, hompa goVajuda.” 38Age kwa mu pamparere kosilivindakano kumwe novamahaka vavali, gumwe korulyo, ogu mukwawo korumoho rwendi.

39Varupitanzira kwa mu swauwire oku tava puku nomutwe dawo, tava tanta asi: 40“Nyove asi wa here kuzungurura ntembeli, makura o zi tungurure momazuva gatatu. Lipopera nyamoge nye no! Nsenesi o MunwaKarunga, liturura ko nyamoge kosilivindakano oko!” 41Vapristeli wovanene novalirongi womatjangwa nomasimbi nawo kwa mu zorere asi: 42“Age nga popere vakwawo, ngapi omu yina kumuvhura yokulipopera mwene. Nsenesi sili age hompa goVaisraeli, a tunde ko ntaantani kosilivindakano no, makura ngano nose natu mu pura! 43Age kwa huguvara Karunga. Karunga a mu popere nye ntaantani, nsenesi sili ga mu hara no. Yeeyi age no kwa tente asi, ‘Ame ni MunwaKarunga.’ ” 44Novamahaka, ava va pamparere kumwe nendi kosilivindakano, nawo yimo ngorooro va mu swawire.

Nomfa daJesus

45Kutunda pomutwekatji dogoro kositenguko lya kere po ekurundema mosirongo mudima. 46Moyiha yovili zautatu Jesus makura ta zigire nezwi lyenene asi: “Eli, Eli, lama sabaktani?” kuninka asi, ‘Karunga gwange, Karunga gwange, yisinke yokusigilira nge?’ 47Apa va yi zuvhire vamwe ava va kere po, tava tanta asi: “Eliya ana kuzigida.” 48Naruvali si gumwe pena nare ana nyoroka, ta gusa sisampo, ta si zaveke si nane vhinyu zoururu, ta si tura koruu, makura ta si mu kandwisire, a si mu nwise. 49Vena pena asi: “Sigeni tu tare, mpamwe na ya mu kwafa Eliya.” 50Jesus ta zigire hena nezwi lyenene, makura nare guna pu mo. 51Va tare ko, emukehe lyokuteta ntembeli monda lina tauka pavali kutunda keguru dogoro pevhu. Evhu kuna kukankama, mamanya kuna kugagauka, 52nontoko kuna kuzeguruka, sinzi sovapongoki ava va fire, nare kuna kuvhumbuka. 53Ava va tundire monontoko, konyima zevhumbuko lyaJesus tava zi mositata sokupongoka, va ka limonekese kosinzi sovantu.

54Apa ga yi mwene mupitisili govakwayita efere novakwayita vendi, ava va kungamenene Jesus, yekankamo lyevhu noyininke eyi ya horaukire po, tagu va pwaga, tava tanta asi: “Nani yosili, MunwaKarunga ga kere.” 55Pwa kere vakadi wovanzi koure, awo kuna kutara. Awo kwa kweme Jesus kutunda koGalireya, va mu kwafe. 56Pokatji kawo kwa kere po Mariya Mangadarena, naMariya zinyaJakopo naJosefa, nazinyavana vaSebede.

Jesus tava mu vhumbike

57Kongurova tapa wiza mugara gongawo gomoAremateya, edina lyendi Josefa. Nage murongwa gwaJesus ga kere. 58Age kwa zire kwaPiratusa, a ka mu hundire simpu saJesus, makura Piratusa ta ninki va ka mu pe simpu. 59Josefa ta gusa simpu, ta si dingire mekehe lyepe lyezera, 60ta si tura montoko zendi zompe, ezi ga litjokwerere mwene memumanya. Makura ta sindumwine ko emumanya lyenene kevero lyontoko, ta ka za. 61Mariya Mangadarena naMariya mukwawo nawo yipo va kere, kwa hingilire mondunga zontoko.

Vanomeni wontoko

62Ezuva eli lya kweme kezuva lyomaliwapaiko, vapristeli wovanene noVafalisayi kwa wizire va ya ponge pwaPiratusa, 63tava tanta asi: “Muhona, ose tuna diworoka eyi ga uyungire mupukisi ogu pouzuni wendi asi, ‘Ngapa pita mazuva gatatu, makura tani vhumbuka.’ 64Ano gava nye eraka, va ka nomene ntoko dogoro nemezuva lyautatu, neisi mpamwe ngava mu vaka mo varongwa vendi, ngava ya tantere mbunga asi, ‘Age kuna vhumbuka koufe.’ Makura yimpempa yokuhulilira ngano ngayi donapa nye unene, kupita yomuhowo.” 65Piratusa ta va limburura asi: “Vanomeni wowo, zendeni mu ka nomene ntoko moomu mwa divira.” 66Awo makura tava zi, tava ka tura ko sinongweneso kemanya lyontoko, makura tava sigi po vanomeni.

Currently Selected:

Mateusa 27: KWN

Highlight

Compare

Copy