Mateusa 28

Evhumbuko lyaJesus

1Eyi lina piti Esabata, monongura dezuva lyomuhowo kosivike, oMariya Mangadarena naMariya mukwawo kwa menekere, va ka tare ko kontoko. 2Makura tapa katuka ekurukankamo lyevhu, yeeyi muengeli gwaHompa kwa tundire meguru, ta hedere ko, a sindumune ko emumanya, makura ta hingire po. 3Yimoneka yendi kwa lifene nosite soruvadi, ano yikoverero yendi yatooto ngwendi yiterengenze. 4Nye vanomeni kwa fililire mo situtu morwautjirwe nompwagetjima.

5Nye muengeli ta tantere vakadi asi: “Mwa ha tjira. Nina diva asi one Jesus muna kupapara, ogu kava pamparere kosilivindakano. 6Age omu mutupu mo, ana vhumbuka moomu ga tente. Komu wiza si, mu ya tare evango eli ka rere Hompa. 7Zendeni nye usimbu mu ka divise varongwa vendi asi: ‘Age ana vhumbuka koufe. Tareni, age ta mu hovere kuza koGalireya. Kwina yiko nye ngomu ka mu monena.’ Kwateni eyi nina mu tantere.” 8Makura tava tundu po pontoko, awo vana pipi noutjirwe, oku hena vana hafa unene, va ze va ka sansekere varongwa vendi.

9Va tara ko, Jesus ta wiza, ta va simbagwire, ta uyunga asi: “Morokeni!” Makura tava mu hedere, tava mu kwata konompadi, tava mu tongamene. 10Jesus ta va tantere asi: “Mwa ha tjira! Zendeni mu ka tantere vamumbya vange, va ze koGalireya. Kwina yiko nye ngava ka monena nge.”

Mbudi zovanomeni

11Vakadi awo simpe hava za mokugenda, vanomeni vamwe tava zi mo mositata, tava ka dimbwira vapristeli wovanene nayinye eyi ya horokere. 12Awo makura tava pongo kumwe nomasimbi, va liyonge. Makura tava pe vanomeni yimaliva yoyinzi, 13awo tava va ngongomekeda asi: “Omu tante asi, varongwa vendi yiwo vana mu wizire, va ya mu vake mo masiku, ose ha twa rarera. 14Nsenesi yi ka sika metwi lyomupangeli, ngano ngatu mu goromona, none ngano ngomu yoworokera mo.” 15Vena makura tava gusa yimaliva, tava ka rugana moomu va va tantere. Mbudi ezi kwa lihanena moVajuda dogoro naina.

Jesus ta tumu varongwa vendi mouzuni

16Varongwa murongo nagumwe kwa zire koGalireya kondundu ezi ga va tanterere Jesus va ze ko. 17Apa va mu mwene, tava mu tongamene, nye vamwe kwa mu singanyekere. 18Jesus ta va hedere, ta va tantere asi: “Nonkondo nadinye demeguru nedi depevhu nyame va di pa. 19Yipo nye nomu zira konomuhoko nadinye, mu ka di ninke di kare varongwa vange, mu ka di kuhwire medina lyaGuhwe neli lyoMuna neli lyoMpepo zoKupongoka. 20Ka di rongeni, di ka limburukwire nayinye eyi na mu rekera. Tareni, ame neni ngani kara dogoro nokouhura wouzuni.”

Currently Selected:

Mateusa 28: KWN

Highlight

Compare

Copy