Mateusa 26

Maliyongo govanene gokudipaga Jesus

1Jesus apa ga mene kuuyunga nonkango mudima edi, ta tantere varongwa vendi asi: 2“Muna diva asi mazuva gavali tupu gana hupu ko, makura ngatu dane sipito saPaska. MunwaMuntu yipo ngava mu gava, ngava ka mu pampare kosilivindakano.”

3Makura vapristeli wovanene nomasimbi goVajuda taga pongo mosinyanga somupristeli gomunene, edina lyendi Kayifasa. 4Tava lizuvhu asi va kwate Jesus megombeko, va mu dipage. 5Nye tava tanta asi: “Nye kapisi posipito, neisi napa kara ndjorongani movantu.”

Jesus tava mu gwaveke moBetani

6Apa ga kere Jesus moBetani monzugo zaSimoni goyingondwe, 7yipo ga mu wizilire mukadi nosipako sosiwa semanya, aso sina zura magadi gondiro. Makura ta ga mu tjire komutwe gwendi, age pompanda ana kara. 8Apa nye va yi mwene eyi varongwa vendi, tava zuvhu nyengo, tava tanta asi: “Eh, eyi vana kugahepekera ngesi gene aga magadi hena yinke? 9Nda ngano kwa ga randesa nondiro, yimaliva va yi pe vahepwe.” 10Nye apa ga yi nongwenene Jesus, ta va tantere asi: “Mukadi ogu yisinke eyi muna kumuhepekera? Yeeyi age kuna ruganene nge sirugana sosiwa. 11Owo vahepwe muna kuninka amesi kumwe nawo ngomu kara nkenye apa. Ano nye ame kapi ngomu kara kumwe name nkenye apa. 12Magadi aga eyi ana ga tjilire nge korutu, evhumbiko lyange ana yi ruganene. 13Yosili nina kumutantera asi, nkenye oku ngava udisira Mbudi zoNngwa ezi mouzuni mudima, neyi ana rugana ngava ka yi sanseka ko, va mu diworokere po.”

Judasa ta lizuvhu novapristeli wovanene yokuhorora Jesus

14Kutunda pweyi gumwe powo murongo navavali, edina lyendi Judasa Isikalyoto, ta zi kovapristeli wovanene, 15ta ka va pura asi: “Yinke ngomu pa nge, nsenesi ni mu horwera Jesus?” Awo tava mu futu yimaliva nomurongo ntatu yosiliveli. 16Kutunda opo makura ta papara nye mpito zongwa zokumuhorora.

Jesus ta li Paska novarongwa vendi

17Mezuva lyokuhova lyosipito soNomboroto da hana Muhahu, varongwa vendi kwa wizire kwaJesus, tava ya mu pura asi: “Kupi ko ono hara, tu ka ku wapaikire Paska?” 18Age ta limburura asi: “Zendeni mositata komugara gumwe, mu ka mu tantere asi: ‘Murongi kuna tanta asi: Siruwo sange pepi sina kara. Poge yipo nani ya danena Paska kumwe novarongwa vange.’ ” 19Makura varongwa tava rugana moomu ga va tanterere Jesus, tava ka wapaika nzwigona zaPaska.

20Kongurova Jesus ta li kumwe novarongwa vendi murongo navavali. 21Hava za mokulya, age ta uyunga asi: “Yosili nina kumutantera asi, mukweneni gumwe na horora nge.” 22Makura vena yiko sa kuguva komu, tava mu puragere gumwe‐gumwe asi: “Nani panga kapisi nyame, Hompa?” 23Age ta va limburura asi: “Googu nani vereda kumwe nendi posiyaha, yige googo na horora nge. 24MunwaMuntu ngayi mu gwana moomu va yi mu tjangera. Nye ehudi lyomuntu ogu ana kuhorora MunwaMuntu mutupu omu. Muntu ogo ngano kapi va mu hampuruka, ngano hasa yiwa.” 25Ano Judasa, muhoroli gwendi, makura ta pura asi: “Amesi nani panga kapisi nyame, Murongi?” Jesus ta limburura asi: “Hawe, yimo sa, nyove.”

Murarero goKupongoka gwaHompa

26Hava za mokulya Jesus ta gusa mboroto, ta pandura Guhwe, ta zi bamagura, a zi pe varongwa vendi, ta tanta asi: “Guseni mu lye, oru yiro rutu rwange.” 27Makura ntani ana gusa nkinda, ta pandura Guhwe, ta zi va pe, ta tanta asi: “Nwaa‐nweni mo namuvenye, 28yeeyi ezi yizo honde zange zegwanekero lyepe, ezi ngazi tjikangerera wovanzi edongonono lyononzo. 29Nye ame tani mu tantere asi, kutunda pwanaina kapi hena ngani nwa yoyiyimwa eyi yosindjembere, dogoro nekezuva eli ngani ka yi nwa yoyipe kumwe neni moUntungi waTate.” 30Apa va mene kudimba rusumo rompandu, makura tava pwaga, va ze koNdundu zoMauzwe.

Jesus ta horora epatano lyaPeturusa

31Makura Jesus ta va tantere asi: “Masiku ganaina one namuvenye tomu ka limbilirwa mwarwange, yeeyi kwa tjanga asi, ‘Ngani dipaga musita, makura siunda sononzwi ngasi lihane.’ 32Nye apa ngani vhumbuka, ngani hova kweni kuza koGalireya.” 33Peturusa makura ta mu limburura asi: “Nampili navenye va limbilirwe mwaroge, ame nampili kuna manga, asi ni limbilirwe mwaroge?” 34Jesus makura ta mu limburura asi: “Yosili nina kukutantera asi, masiku aga ganaina, sikondomboro aso sa hana kuziga, ove nare ono patana nge rutatu.” 35Peturusa makura ta mu tantere asi: “Ame nampili ngano kufa, kufa tupu noge, nokukupatana si ame.” Varongwa navenye nawo yimo va uyungire.

Jesus ta kanderere moGesemani

36Kutunda poyo Jesus makura ta zi kumwe nawo kosikunino, edina lyaso Gesemani. Makura age ta tantere varongwa vendi asi: “Hingireni apa siruwo esi nina kuza kwina, ni ka kanderere.” 37Makura ta pitura Peturusa novana vavali vaSebede, makura ta vareke nye kuguva nokukara nompwagetjima. 38Age ta va tantere asi: “Mwenyo gwange yilyo sa eguwo lyomu, nda ngwendi ni fe. Kareni paapa, mu vangarese nge ko.” 39Ta linapuka nawo kanunu, makura ta kudumana kawomba, ta kanderere asi: “Tate, nsenesi kuvhura, ninka runyando oru rwa ha gwana nge. Nye kapisi moomu nina panga, hawe, moomu tupu ono panga ove.”

40Makura ta zi kovarongwa vendi a ka va gwane, awo vana rara. Ta tantere Peturusa asi: “Nani nye, kapi muna vhuru kuvangaresa nge ko nampili vili zimwe tupu? 41Vangareni oku tomu kanderere, mu dire kugwira meheteko. Mwenyo ago mureru kupura usimbu, nye rutu kapi rwa paka nonkondo.”

42Ta linapuka hena nawo rwauvali, ta ka kanderera asi: “Tate, runyando oru nsenesi kapi runa kuvhura kulipitira, nye aro rwa hana kugwana nge, yi horokere nge moomu ono panga.” 43Makura ta tengura hena, kuyagwana varongwa, awo vana rara, morwa nompofu kwa va kwatere.

44Jesus ta va sigi poopo, ta zi ko hena, ta ka kanderera rwautatu nononkango doodina domuhowo. 45Kutunda opo ta tengura kovarongwa vendi, ta ya va tantere asi: “Simpe hamwa rarera mu pwizumuke? Tareni, siruwo sina siki mo, MunwaMuntu tava mu gava momawoko govananzo. 46Katukeni, tu zeni. Ogu ana kuhorora nge googo ana kuwiza!”

Jesus tava mu kwata

47Haga za Jesus mokuuyunga ngesi, va tara ko, Judasa, gumwe powo murongo navavali kuna kuwiza kumwe nombunga zonene nonomfuro dawo nonomuramu dawo. Awo kwa va tumine vapristeli wovanene nomasimbi goVajuda. 48Muhoroli gwendi kwa va pere sidiviso asi: “Googu tupu nani ka ncumita, yige googo mu kwateni.” 49Age kwa sikire tupu, makura ta hedere Jesus, ta tanta asi: “Moro, Murongi!” Makura ta mu ncumita. 50Jesus ta mu tantere asi: “Hewa, rugana eyi ono wizire!” Makura vena tava mu hedere, tava mu kwata. 51Va tara ko, gumwe gosigendo saJesus ta pweza rufuro rwendi, ta kamuna mukareli gomupristeli gomunene, makura ta mu tete kutwi. 52Jesus ta mu tantere asi: “Zweka mo rufuro roge mosiraro saro, yeeyi nkenye ogu a kwata rufuro, yiro ngaru mu lya rooro. 53Nsenesi ni hundira Tate, ove asi a dire kutumina nge mamumbunga gokupita murongo nagavali govaengeli? 54Nsene ngoso, ngapi nye ngano omu ngaga sika mo matjangwa, aga aga tanta asi, ngesi yimo ngayi horoka?”

55Kutunda opo Jesus ta tantere mbunga asi: “One kuna wiza ngwendi moomu ava wizire munamahaka nonomfuro nonomuramu, mu ya kwate nge. Amesi nkenye ezuva kumwe ngatu hingireni, ame tani rongo montembeli, nye one nokukwata nge si. 56Nye nayinye eyi kuna kuhorokera asi matjangwa govaporofete ga sike mo.” Makura varongwa vendi tava mu zumbu, tava ka tjira.

Jesus komeho zaKayifasa nomasimbi goVajuda

57Ava va kwatere Jesus, kwa mu twere kwaKayifasa, mupristeli gomunene, oku va lipongaikilire valirongi womatjangwa nomasimbi goVajuda. 58Peturusa makura ta mu kwama‐kwamene koure dogoro nemerombe lyomupristeli gomunene. Ta hwilire, ta ka hingira kumwe novakareli, a tare oku nayi ka hulira. 59Vapristeli wovanene nosigongi mudima somasimbi tava paparere Jesus umbangi woyimpempa, asi va mu twaredesere konomfa. 60Nye nampili ngomu pa kere nombangi dononzi doyimpempa, nayimwe si va gwene. Moruhura tapa wiza mbali, 61tadi tanta asi: “Ogu kwa tente asi, ‘Ame kuvhura kuzungurura ntembeli zaKarunga, makura tani zi tungurura momazuva gatatu.’ ”

62Makura mupristeli gomunene ntani ana katuka, ta mu pura asi: “Ove nelimbururo si lyeeli kweyi vana kukurundaika ava?” 63Nye Jesus teete zendi. Makura mupristeli gomunene ta mu tantere asi: “Ame tani ku ganesa kwaKarunga gomunamwenyo, o tu tantere asi, nyove Mesiyasa, MunwaKarunga, ndi?” 64Jesus ta mu limburura asi: “Ono tanta. Nye ame tani mu tantere one namuvenye asi, kutunda apa ngomu ka mona MunwaMuntu ana ka hingira korulyo rwaKarunga Munankondo nadinye, age ta wiza pomaremo geguru.” 65Makura mupristeli gomunene ta taura sikoverero sendi oku ta tanta asi: “Ana swaura Karunga. Nombangi dasinke hena natu hepereni? Muna lizuvhire ko sa ntaantani omu ana swaura Karunga? 66Ngapi omu muna kugazara?” Awo tava mu limburura asi: “Nomfa dina mu fire.”

67Makura tava mu fizagere mazeze mosipara sendi, oku tava mu toona nononyongo. Ava vamwe kwa mu toonene nonkusi, 68oku tava tanta asi: “Mesiyasa, tu tantera asi, yilye ogu ana ku toona!”

Peturusa ta patana Jesus

69Peturusa kwa hingilire peharango. Makura mukareli gumwe gomukadi ta mu hedere, ta mu tantere asi: “Nove kumwe naJesus goMugalireya wa kere.” 70Age ta patana moyitarameho yanavenye asi: “Ame eyi ono kutanta, kapi nina kuyizuvha.” 71Haga za mokupwaga, mukareli gumwe gomukadi ta tantere ava va sikamene po asi: “Ogu nage kumwe ga kere naJesus goMunasareta.” 72Age ta patanesa hena komugano asi: “Ndangame ame, muntu ogu kapi na mu diva.” 73Eyi pana piti karuwogona, vena kava sikama pena, tava hedere Peturusa, tava mu tantere asi: “Yosili, nove nyove mukwaawo, yeeyi ruuyungo roge yiro runa kukunongwenesa.” 74Makura ta lifingilire oku ta gana asi: “Ndangame ame, muntu ogo kapi na mu diva.” Kapi pa kara hena, sikondomboro tasi zigi. 75Peturusa makura ta diworoka nye nonkango daJesus, edi ka mu tanterere asi: “Sikondomboro aso sa hana kuziga, ove nare ono patana nge rutatu.” Makura ta pwaga, ta ka lira makurulira.

Currently Selected:

Mateusa 26: KWN

Highlight

Compare

Copy