Mateusa 12

MunwaMuntu yige mwenyEsabata

1Momazuva gena Jesus kwa gendere momapya mEsabata. Varongwa vendi nzara za va kwete, makura tava tezagura ntafu va lye. 2Makura eyi vana yi mono Vafalisayi, tava mu tantere asi: “Ko tara si, varongwa woge kuna kurugana eyi va silika mEsabata.” 3Jesus ta va limburura asi: “Kapi mwa resa eyi ga rugene Ndafita, apa za mu kwete nzara novantu vendi, 4a ze monzugo zaKarunga, a ka lye nomboroto donzambo, edi va va dilikire kulya, ntudi vapristeli woowo? 5Ndi kapi mwa resa moVeta zaKarunga, asi vapristeli ngapi omu ava taguruka Veta zEsabata montembeli, nye nousima si woou? 6Nye ame tani mu tantere asi, ogu ga pita ntembeli pweli apa. 7Nye ngano si kwa diva eyi adi tanta nonkango edi asi, ‘Ame ufenkenda na hara, kapisi nzambo,’ ngano kapi muna pangura ava va hana usima. 8Yeeyi MunwaMuntu yige mwenyEsabata hena.”

Everuro lyemEsabata

9Jesus eyi ga tunda opo, makura ta hwilire mosinagoge zawo. 10Amo muna kara mugara ogu ga fa kuwoko. Vena makura tava mu pura asi: “MEsabata kuvhura kuverura mo muntu ndi?” menome lyokuninka asi va mu mone usima, ngava ka mu pangwise. 11Age ta va limburura asi: “Opo muna kara pokatji keni, yilye ogu ga kara nonzwi zimwe tupu, ano eyi nazi gwira mekero ngoso, nye a dire kukazihora mo moomo mEsabata? 12Pomuntu nonzwi, gefumano po yilye? Ano mEsabata kuvhura kuninka mo yoyiwa.” 13Kutunda opo ta tantere mugara asi: “Gonyonona kuwoko koge.” Makura age ta ku gonyonona, taku veruka taku fana kukwawo. 14Vafalisayi makura tava pwaga, tava liyongo asi ngapi omu nava mu rugana Jesus, va mu dipage.

Jesus Muhoroworwa gwaKarunga

15Apa ga yi nongwenene Jesus, makura ta tundu po. Vantu wovanzi tava mu kwama‐kwama, age ta va verura navenye. 16Makura ta va pamperekeda asi ngano va ha mu zigauka. 17Morwa asi di sike mo nonkango domuporofete Jesaya, ogu ga tente asi:

18“Ko tara si, mukereli gwange, ogu na horowora,

yiyo na mu harerera, ogu ga za nge komutjima.

Mwendi ngani tura Mpepo zange,

nga ka divise nomuhoko youhunga.

19Marwanambo kapi nga ga paka

noyizazagana si yeeyi, hena nagumwe si googu

nga zuvha ezwi lyendi pomaharango.

20Ru kare ruu rokudifuka, kapi nga ru teza,

nokage si koramba, kapi nga ka dimisa.

Age nga didimika dogoro noku

nga sikise mo uhunga,

21ano nomuhoko nadinye mwendi ngadi huguvara.”

Jesus ga vhura nonkondo Belisebubu

22Kutunda opo tava retere Jesus sipuru‐puru sokutwika, esi sa kere nompepo zondona. Age ta ya mu verura, makura ta mono, ta uyunga hena. 23Mbunga mudima makura tazi tetuka, tazi tanta asi: “Nsene na panga nye, kapisi MunwaNdafita ogu?” 24Eyi vana yi zuvhu Vafalisayi, tava ninki asi: “Age kapi a tjida mo nompepo donondona nononkondo dapeke, ntudi nedi daBelisebubu, mukurona gonompepo donondona.” 25Apa ga mwene Jesus asi yimo vana kugazara ngesi, makura ta va tantere asi: “Nkenye sirongo esi sa litavagana mwasene, kuhanauka po, si kare sitata ndi embo eli lya litavagana mwalyene, kapi ngali sika mouta wa kora. 26Ano nsenesi satana kutjida mo satana, makura tapa kara nye malitavagano. Ngapi nye omu ngau kora untungi wendi? 27Nsenesi ame nompepo donondona kuna kuditjida mo nononkondo daBelisebubu, ano ava vana veni nononkondo dalye ava di tjida mo? Yipo nye nava karera vapanguli veni. 28Ano nye ame nsene si nompepo donondona kuditjidisa kononkondo daMpepo zaKarunga, diveni asi Untungi waKarunga una mu wizire nye.

29“Muntu kapi a vhuru kuhwilira monzugo zomugara gependa, a ka hakane mo yuma yendi, ntudi a pandeke tanko mugara ogo gependa, ntani nye na vhura kutuva nzugo zendi.

30“Ogu a dili kukara kumwe name, kwa lilimba name, ano ogu ga ha pongaike kumwe name, kuhanagura. 31Yipo nye nina kumutantera asi, nkenye nzo neswau vantu kuvhura kuzivadongwenena po, nye eswau lyokoMpepo zoKupongoka nokulidongonona po si. 32Ogu a uyungire MunwaMuntu nkango zondona, kuvhura kuzimudongwenena po, nye ogu a uyungire Mpepo zoKupongoka nkango zondona, nokuzimudongwenena po si, nomouzuni si ou, nomu mou si wokomeho.”

Sitji noyiyimwa yaso

33“Nsenesi mu tumbura sitji asi siwa, tumbureni noyiyimwa yaso asi yiwa. Ano nsenesi mu tumbura sitji asi sidona, tumbureni noyiyimwa yaso asi yidona. Yeeyi koyiyimwa yiko ava nongwenesa sitji. 34Ano nye one vatundakani wonombaroka, ngapi nye omu nomu vhura kuuyunga yoyiwa, one nyonevene mu vadona? Morwa eyi ya zura mutjima, kana nako yiyo aka uyunga yooyo. 35Muntu gomuwa kuhorora yoyiwa yomougawo wendi wouwa. Ano muntu gomudona kuhorora yoyidona yomougawo wendi woudona.

36“Nye ame tani mu tantere asi, nkenye nkango za hana mulyo, ezi ava uyunga vantu, yiwo kuzizeresa mEzuva lyoMpanguro. 37Yeeyi kononkango doge yiko ngava ku hungamekesa, ano kononkango doge yiko ngava ku pangwisa kooko.”

Sitetu saJona

38Makura valirongi womatjangwa noVafalisayi vamwe yipo nye va tanterere Jesus asi: “Murongi, ose tuna hara o rugane po sitetu, tu si mone.” 39Age makura ta va limburura asi: “Vantu vangesi wovadona woruhonda nye yiwo vana kuhara sitetu. Kutupu hena sitetu nasopeke sokuvhura kuvaruganena, ntudi sitetu somuporofete Jona no. 40Yeeyi, moomu tupu ga kere Jona nomutenya ntatu nomasiku gatatu mezimo lyemumfi, naMunwaMuntu yimo ngorooro nga kara nomutenya ntatu nomasiku gatatu konhi zevhu. 41MEzuva lyoMpanguro vagara womoNinive ngava pirukira vantu ava, va va pe nzo, yeeyi awo kwa litezwilire morweudiso lyaJona. Komu tara si, ogu ga pita Jona googu. 42Hompa gomukadi gokoMbindakano nga pirukira mEzuva lyoMpanguro vantu ava a va pe nzo, yeeyi ure oko kosikondo souzuni ga tundire a ya purakene ukonentu waSaromo. Komu tara si, ogu ga pita Saromo gogu apa!

Etenguro lyompepo zondona

43“Nsenesi mpepo za hana kukuhuka zina pwaga momuntu, azo kurenda‐renda mosirongo somburundu, zi papare uturo. Nye apa nazi dira kuugwana, 44makura tazi tanta asi, ‘Tani tengura konzugo zange ezi na pwagere.’ Ano eyi nazi wiza ngoso, kuyagwana nzugo azo mawoko‐woko, vana zi kombo, vana zi limbagura. 45Makura azo tazi zi nye, zi ka rete ko nompepo nonkwawo ntano‐nambali donondona ko nye unene kuzipitakana zene. Makura tadi hwilire mo, di ya tunge mo. Yirugana yokuhulilira yomuntu gwangesi kuyipilira, yomuhowo hasa. Novantu ava wovadona yimo ngesi ngava kara.”

Ozina novanavazina vaJesus

46Jesus haga za mokuuyunga, a tantere mbunga, nani ozina novamumbya vendi ponze vana sikama, vana hara kuuyunga nendi. 47Makura muntu gumwe ta mu tantere asi: “Ani onyoko novamumbya woge ponze vana kara, kuna hara va uyunge noge.” 48Age makura ta mu limburura asi: “Onane hena wolye? Nowo vamumbya vange hena wolye?” 49Makura ta gonywenene kuwoko kwendi koyiha yovarongwa vendi, ta tanta asi: “Tareni, onane novamumbya vange vava. 50Yeeyi nkenye ogu a rugana mpango zOtate vemeguru, yige mumbyange, yige mpanzange, yige nane.”

Currently Selected:

Mateusa 12: KWN

Highlight

Compare

Copy