Mateusa 11

Nontumi daJohanesa Mukuhwi kwaJesus

1Apa ga mene Jesus kuronga varongwa vendi murongo navavali, makura ta tundu po a ka ronge, a ku udise moyitata yawo.

2Apa ga zuvhire Johanesa, age ana kara modorongo, yirugana yaJesus, makura povarongwa vendi ta tumu po vamwe, va ka mu pure asi: 3“Ove nyove ogu asi ngo wiza ndi, ndi tu ndindire nage peke?” 4Jesus ta va limburura asi: “Zendeni mu ka dimbwire Johanesa eyi muna zuvhu neyi muna mono: 5vatwiku kuna kumona, yirema kuna kugenda, vanayingondwe kuna kukuhuka, yipuru‐puru kuna kuzuvha, ano vafe kuna kupinduka, vahepwe kuna kuvazagwira Mbudi zoNngwa. 6Nye munerago nkenye ogu a dili kulimbilirwa mwarwange.”

7Apa va tundire po nontumi, Jesus makura ta tantere mbunga zovantu yokuhamena Johanesa asi: “Yisinke eyi mwa zililire mu ka tare mosirongo somburundu? Ruu rokulinyunganga kompepo ndi? 8Ndi yinke eyi mwa zililire mu ka tare? Mugara ogu a dwara yikoverero yokurerema ndi? Tareni ava ava dwara yikoverero yokurerema, momarombe gohompa va tunga. 9Nye one yisinke eyi mwa zililire mu ka tare? Muporofete ndi? Nhi, ame tani mu tantere asi, age kwa pitakana muporofete. 10Yeeyi age yige ya hamena eyi va tjanga asi, ‘Tara, tani tumu mutumwa gwange komeho zoge, nga ku wapekere nzira zoge komeho zoge.’ 11Yosili nina kumutantera asi, kutupu ogu va hampuruka vakadi ga pita Johanesa Mukuhwi. Nye ogu ga nunupilira po moUntungi weguru, yige ga mu pita. 12Kutunda komazuva gaJohanesa Mukuhwi dogoro nokwanaina. Untungi weguru kwa hara kuuhakana nononkondo, yipo nye ava u gwanene vahakani vawo mononkondo. 13Eyi yiyo va pumbire vaporofete navenye noVeta zaMosesa dogoro nokwaJohanesa. 14Ano nsenesi muna hara kuyitambura, yige nye Eliya ogu asi nga wiza. 15Ogu ga kara nomatwi gokuzuvha, a zuvhe!

16“Vantu vantani kosinke nani va fanekesa? Awo kwa lifana novanona ava ava hingire pomarandero, ava zigida vakwaawo 17asi, ‘Ose katu mu sivire po nsiva, nye one yiyo muna dili kudana! Tuna mu dimbire po nonsumo domalirankali, nye one nokulikwata si mbida‐mbida.’ 18Johanesa eyi ga wiza, kapi nga li ndi a nwe. Makura yiyo ava mu ninki asi, ‘Age mpepo zondona zina mu kara.’ 19Ano MunwaMuntu eyi ga wiza, age kulya ta nu. Makura yiyo ava mu ninki asi, ‘Komu tara si, eh, makurulya nomakurunwa, age kwa likwata ukwawo novafutisi womutero novananzo.’ Nye ukonentu waKarunga kumoneka moyirugana yawo asi awo kwa hungama.”

Yitata ya hana kulitezurura

20Ntani nye ana popi yitata, omu ngayi hu kuhorokera yitetu yendi, nye awo kapi va litezwilire, asi: 21“Ngo yi mona ove Gorasini nove Betesaida. Yeeyi ngano si yitetu eyi kwa horokerere moTirusi nomoSidoni, ngano va litezurura nare va gwave evhu. 22Nye ame tani mu tantere asi, yoTirusi naSidoni ngayi kara hasa mEzuva lyoMpanguro kumupita one. 23Ano o kare ove Kaperenaumu, nye ngava ku tumbe tupu dogoro nekeguru ndi? Ndangove ove, mosirongo sovafe ngava ku zugumina! Yeeyi yitetu eyi ya horokerere moge, ngano si moSodomu ya horokerere, azo ngano simpe pozili nanaina. 24Nye ame tani mu tantere ko asi, yosirongo saSodomu ngayi kara hasa mEzuva lyoMpanguro kupita one.”

Wizeni kwange, mu pwizumuke

25Moruveze rwina Jesus kwa uyungire asi: “Nyove nina kupanda, Tate, Hompa geguru nevhu, yeeyi wa horeka yininke eyi vakonentu novanandunge, yiyo wa yi horwera vantuuntu tupu. 26Nhi, Tate, ngesi yimo wa yi harera.

27“Nayinye kwa yi pa nge Otate, nye nagumwe si ga diva Muna, ntudi Guhwe no. Hena nagumwe si ga diva Guhwe, ntudi Muna no nogu ga yi harera kuyihorwera Muna.

28“Wizeni kwange namuvenye, one ava wa rorora udigu, ni ya mu pwizumukise. 29Likambekeni ndjoko zange, mu lirongere nge po, yeeyi ame kwa gomoka, yiyo na linunupika momutjima, ngomu gwane rufuwo monomwenyo deni. 30Yeeyi ndjoko zange nderu, ano mudigo gwange kwa pepuka.”

Currently Selected:

Mateusa 11: KWN

Highlight

Compare

Copy