Mateusa 13

Sifanekeso somukuni

1Ezuva olyo Jesus kwa pwagere monzugo, a ka hingire kekurudiva. 2Makura ekurumbunga lyovantu tali ya mu pongere. Yipo nye ga peramene mowato, makura ta hingire. Mbunga zovantu makura tazi sikama konontere. 3Makura ta va tantere yininke yoyinzi moyifanekeso asi:

“Mukuni gumwe kwa zire a ka kune. 4Haga za mokukuna, mbuto zimwe tazi gwire ponzira, makura yidira tayi wiza, tayi zi li po nu. 5Ano mbuto zimwe tazi gwire poyingurumanya, apa pwa hana evhu lyezuni. Naruvali si nare zina mene, morwa evhu lyapo esesu unene. 6Eyi lina pumu ezuva, tazi pi, makura tazi kukuta nye morwakupira nondandani. 7Ano mbuto nkwawo tazi gwire momega. Mega eyi ga kura kumwe nazo, tazi fu musine. 8Makura ezi zimwe yizo nye za gwililire pevhu lyewa, tazi reta nondanda efere, ezi zimwe nomurongo ntano‐nazimwe, ano ezi zimwe nomurongo ntatu. 9Ogu ga kara nomatwi gokuzuvha, a zuvhe!”

Egano lyoyifanekeso

10Makura varongwa tava wiza, tava ya pura Jesus asi: “Morwasinke ono kuvauyungilira moyifanekeso?” 11Age makura ta va limburura asi: “Yeeyi one kwa yi mu pa yokukwata egano yihoramo yoUntungi weguru, nye awo kapi va yi va pa. 12Yeeyi ogu ga kara noyuma, ngava yi mu vhukisira, ano ogu ya pira, ngava mu gusa neyeeyi ga kara nayo. 13Yipo nye nina kuvauyungilira moyifanekeso, yeeyi awo nampili va tare, nye ngwendi kapi vana kumona, va zuvhe, nye ngwendi kapi vana kuzuvha va yi kwate egano. 14Awo yiwo lya tamba epumbo lyaJesaya, li sike mo asi:

‘Komatwi ngomu zuvhisa, nye kapi ngomu yi kwata egano;

komeho ngomu taresa, nye kapi ngomu yi mona.

15Morwa nomutjima domuhoko ogu nonkukutu,

ga kare matwi gado, kwa limbandera.

Awo kwa ferera komeho asi va dire kumonesa ko,

komatwi va dire kuzuvhisa ko,

ano komutjima va dire kukwatesa ko egano,

va dire kulitezurura,

ano ame Karunga ni dire kuvaverura.’

16“Nye meho geni kwa ragopa morwa taga mono, ano ga kare matwi geni, nago kwa ragopa, morwa taga zuvhu. 17Yosili nina kumutantera asi, vaporofete novahungami wovanzi kwa here kumona eyi muna kumona, nye kapi va yi mwene, awo kwa here kuzuvha eyi muna kuzuvha, nye kapi va yi zuvhire.

Jesus ta fwatura sifanekeso somukuni

18“Ano purakeneni nye yosifanekeso somukuni. 19Nsenesi muntu a zuvhu nonkango doUntungi weguru, nye a dire kudikoneka, Mudona makura ta wiza, ta ya di hakana mo momutjima gwendi nonkango edi vana kunu mo. Ezi yizo nye mbuto ezi va kunine ponzira. 20Mbuto ezi va kunine poyingurumanya gogu a ninki, eyi na zuvha nonkango, nare ana di tambura nehafo. 21Nye age kutupu nondandani mwamwene, nye age kapi ga kora. Nsenesi pa wiza maudigu nehepeko morwanonkango, makura age kapi a kara ko, kuzonauka. 22Mbuto ezi va kunine momega, gogu a zuvhu nonkango, nye sinka seyi youzuni ou neyivayiwo lyemona tali mu dipagere nsine nonkango, makura ta dili nye kureta mbuto. 23Ano nye mbuto ezi va kunine pevhu lyewa, gogu a zuvhu nonkango, ta di kwata egano. Ogu yige nye a yimi, ta reta nondanda efere, pamwe nomurongo ntano‐nazimwe, ano pamwe nomurongo ntatu.”

Sifanekeso somau

24Jesus kwa va tanterere hena asi: “Untungi weguru kwa lifana nomuntu, ogu ga kunine mbuto zongwa mepya lyendi. 25Ano vantu eyi va rara, gonkore zendi makura ta wiza, ta ya kunu mau moyilya, makura ta ka za. 26Ano mbuto eyi za kulire zi vhare, mau nago makura taga moneka mo. 27Vakareli vanturangumbo makura tava wiza, tava ya mu tantere asi, ‘Nturagumbo, nani kapi wa kunine mbuto zongwa mepya lyoge? Mau kupi nye ga litundilira?’ 28Age ta va limburura asi, ‘Gonkore ga yi rugana.’ Vakareli tava mu pura asi, ‘Ono hara tu ze, tu ka ga pongaike mo ndi?’ 29Age ta va limburura asi, ‘Hawe, apa nomu ka dura mo wayi, neisi nomu ka dulilira noyilya. 30Yi sigeni tupu, yi kulire simwe dogoro nokokuteza‐teza, ntani ngani tantera vatezi asi, Hoveni tanko kupongaika mau, mu ga mangaike yitungu, mu ga hwike, ano yilya nkumwe mu yi tware koutara wange.’ ”

Sifanekeso sohuma zomositareta nesi sohingo

31Jesus kwa va tanterere hena sifanekeso sikwawo asi: “Untungi weguru kwa lifana nohuma zomositareta, ezi ga kunine muntu mepya lyendi. 32Mbuto ozo yizo za nunupa po unene ponombuto nadinye. Nye nsenesi zina kuru, kupitakana yihaperera nayinye, makura tazi kara sitjiitji, yidira tayi wiza, yi ya tunge yikorogo monomutayi daso.”

33Jesus ta va tantere hena sifanekeso simwe asi: “Untungi weguru kwa lifana nohingo ezi ga gusire mukadi, ta zi paka momahemere gatatu gousura, dogoro noku za hahesa usura mudima.”

Eyi nga ruganesa Jesus yifanekeso

34Yininke mudima eyi Jesus kwa yi tanterere vantu moyifanekeso. Nayimwe si ga va tanterere pa pire sifanekeso, 35asi di sike mo nonkango edi ga uyungire muporofete pookuuyunga asi:

“Ame ngani zahura kana kange moyifanekeso,

ngani uyunga yininke eyi ya horama

kutunda petameko lyouzuni.”

Efwaturo lyosifanekeso somau

36Jesus apa ga rekerere mbunga, makura ta zi nye kembo. Varongwa vendi makura tava mu wizire va ya mu pure asi: “Tu fwatwira nye sifanekeso somau gemepya.” 37Makura ta va tantere asi: “MunwaMuntu yige mukuni gombuto zongwa. 38Epya ko lyene yiwo uzuni ou. Mbuto zongwa yiwo ava va hamena Untungi weguru. Ano mau yiwo ava va hamena Mudona. 39Gonkore ogu ga ya kunine mo mau, Muzonaguli, muzangu uhura wouzuni, ano vatezi yiwo vaengeli. 40Moomu tupu ava pongaike mau, va ka ga swakerere mendiro, yimo ngayi kara pouhura wouzuni. 41MunwaMuntu nga tuma vaengeli vendi, va ya pongaike vapukisi novazoni woVeta zaKarunga moUntungi wendi. 42Ngava va zugumina mEndiro, omu ngamu kara siliro nomalikwetjo gomazego. 43Makura vahungami ngava paime ngwendi ezuva moUntungi waGuhyawo. Ogu ga kara nomatwi gokuzuvhisa, a zuvhe.

Sifanekeso sougawo nesi sombamba

44“Untungi weguru kwa lifana nougawo ou wa horama mepya. Mugara gumwe ga u gwene, ta u horeke. Morwoyo ta zi nehafo a ka randese nayinye eyi ga wekere, ta ya randesesa ko epya olyo.

45“Untungi weguru kwa lifana hena nomurandi, ogu a papara nombamba donongwa. 46Eyi na gwana mbamba zimwe zomulyo gomunene, ta zi ta ka randesa emona lyendi nalinye, ta ya zi randa po.

Sifanekeso sekwe

47“Untungi weguru kwa lifana hena nekwe, eli va tegere mediva, makura tali kwata nkenye rudi romfi. 48Eyi lina zura, tava li kokere pezenga, tava hingire va horogere nomfi donongwa moyipako, ano donondona tava di zugumine kwina. 49Yimo ngorooro ngayi kara pouhura wouzuni: vaengeli ngava wiza, tava ya hangura wovadona kovahungami, 50va va zugumine mesita lyendiro, omu ngamu kara siliro nomalikwetjo gomazego.”

Eyi yoyipe neyi yanare

51Jesus ta va pura asi: “Yininke eyi nayinye muna yi kwata egano ndi?” Awo tava mu limburura asi: “Nhi, Hompa.” 52Makura age ta va tantere asi: “Nkenye mulirongi gomatjangwa, age hena murongwa gweyi yoUntungi weguru, yipo nye ga lifanena nanturagumbo, ogu a horora yoyipe neyi yanare pougawo wendi.”

Jesus tava mu nyoka moNasareta

53Apa ga mene Jesus kuuyunga yifanekeso eyi, makura ta tundu po, ta ka za. 54Makura age ta zi mositata sendi soundambo, ta ka ronga mosinagoge zawo. Awo yiko sa kutetuka va tetukire, dogoro noku va pulilire mo asi: “Oku ga u gwana ukonentu ou nononkondo dokurugana yitetu hena kupi? 55Nani kapisi munwamuhongi goyikungu? Nani zina kapisi Mariya? Va kare vamumbya vendi nani kapisi oJakopo naJosefa naSimoni naJudasa? 56Nani vampanza vendi kapisi vaava twa kara nawo? Oku ga gwana nye yininke nayinye eyi kupi ko nye?” 57Makura tava mu nyenge. Nye Jesus ta va tantere asi: “Muporofete ha ga tunda kapi ga hwa kufumanena mositata sendi nemekoro lyendi.” 58Morwakudira kupura kwawo, yiyo nye ga dililire kuruganena ko yitetu yoyinzi.

Currently Selected:

Mateusa 13: KWN

Highlight

Compare

Copy