Rukasa 9

Jesus ta tumu varongwa murongo navavali

1Jesus kwa zigidire varongwa vendi murongo navavali va ponge, makura ta va pe nonkondo nepangero lyokupangera nompepo donondona nokuverura vaveli. 2Age makura ta va tumu asi va ka udise Untungi waKarunga oku tava verura vantu. 3Ta va tantere asi: “Nokupitura si yuma va gende nayo monzira, nompango si nondjato si nonondya noyimaliva si. One hena nagumwe si na simba yikoverero yivali. 4Nsene vana mu tambura membo, tomu kara moomo dogoro noku ngomu pita. 5Ano vantu ntene kapi vana mu tambura, tundeni mo mositata oso, nombundu zokonompadi deni nazo tomu zi likukumuna, ngazi kare undipo wawo.” 6Awo makura tava zi, makura tava gendi tunda mukunda zende mukunda va udise Mbudi zoNgwa oku tava verura vaveli.

Utjirwe waHerodesa

7Mupangeli gwaGalireya Herodesa apa ga zuvhire nayinye eyi ya horokere, tagu mu pwaga. Yeeyi vamwe kwa tente asi: “Johanesa ga vhumbuka koufe,” 8vamwe asi: “Eliya ana horoka,” ano ava vamwe mo asi: “Muporofete gwanare gumwe ana vhumbuka koufe.” 9Makura Herodesa ta tanta asi: “Johanesa nyame na mu teta mutwe, ogu no nina kuzuvhira yangoso yilye?” Makura age ta papara evega lyokumona Jesus.

Jesus ta kutike emumbunga

10Vapostoli eyi va ka tengura ko, makura tava tantere Jesus eyi va ka rugene. Age makura ta zi kumwe nawo mwavelike komaporeza kositata saBetesaida. 11Ano vantu apa va yi zuvhire, makura tava mu kwama. Age makura ta va tambura, ta va tantere yokuhamena Untungi waKarunga, ano ava va hepere everuko, ta va verura.

12Ano eyi lina kugomboka, varongwa vendi murongo navavali tava mu wizire, tava tanta asi: “Tuma vantu va ze konomukunda nomu mwa za mambo va ka papare nomuraro nonondya, yeeyi ose apa pevega lyomapuku tuna kara.” 13Nye Jesus ta va tantere asi: “Va peni ko nye nondya va lye.” Awo tava tanta asi: “Ose nomboroto ntano nonomfi mbali tupu tuna kara nayo — ntudi tatu zi tu ka randere vantu ava navenye nondya.” 14Yeeyi opo ngoso vagara wokuhura pomayovi gatano ngoso va kere po. Jesus makura ta tantere varongwa vendi asi: “Va hingidikeni monombunga donomurongo ntano‐ntano.” 15Nawo yimo va yi rugene, makura tava hingidike vantu. 16Jesus makura ta gusa nomboroto odo ntano nonomfi mbali, ta ligamene keguru, ta pandura Guhwe, ta di bamagura, ta di pe varongwa vendi, va di gavere vantu ava va hingilire. 17Navenye kwa lire tava kuta. Ruhupwa oru rwa hupire ko kwava va lire, kwa ru pongaikire, nye yikumba murongo nayivali tayi zura.

Etongonono lyaPeturusa

18Jesus apa ga kandererere age gelike, varongwa vendi makura tava wiza kwendi. Age ta va pura asi: “Vantu omu ava tanta asi nyame yilye?” 19Awo tava mu limburura asi: “ ‘Johanesa Mukuhwi,’ ava vamwe asi, ‘Eliya,’ ano ava vamwe mo asi, ‘Muporofete gwanare gumwe ana vhumbuka koufe.’ ” 20Makura age ta va pura asi: “One nye no omu omu gazara asi nyame yilye?” Simoni Peturusa ta limburura asi: “Nyove sa Mesiyasa gwaKarunga!”

Jesus ta divisa runyando rwendi nonomfa dendi

21Jesus makura ta va pamperekeda unene asi va ha yi tantera vantu. 22Age ta tanta asi: “MunwaMuntu nga nyanda unene. Ngaga mu zumba masimbi novapristeli wovanene novalirongi womatjangwa. Ngava mu dipaga, nye mezuva lyautatu nga vhumbuka koufe.”

23Age makura ta tantere navenye asi: “Ogu ga hara kukwama nge, a lidine ntani, ta damuna silivindakano sendi nkenye ezuva, ta kwama nge. 24Yeeyi nkenye ogu ga hara kupopera mwenyo gwendi, nga gu zumbanesa, ano ogu a zumbanesere mwenyo gwendi mwarwange, yige nye nga gu gwana. 25Ndi yinke ayi kwafa muntu yokuweka uzuni udima, nye a zonauke mwene ndi a liretere simpagwa. 26Yeeyi nkenye ogu a fu nge nomuga nononkango dange, naMunwaMuntu nage nga mu fa nomuga apa nga wiza mouyerere wendi nou waGuhwe nou wovaengeli wokupongoka. 27Yosili nina kumutantera asi, poveli vamwe paapa tuna sikama ngesi, ava ngava dira kufa awo va hana kumona Untungi waKarunga.”

Eyererepeko lyaJesus

28Konyima zodo nonkango kwa pitire po tupu ngwendi mazuva gatano‐nagatatu ngoso, makura Jesus ta gusa oPeturusa naJohanesa naJakopo, a ronde nawo kondundu, a ka kanderere. 29Haga za mokukanderera, kosipara sendi taku lisitunuka ku kare namopeke, yikoverero yendi tayi vembera vayi?-?vayi. 30Pwa kere vagara vavali va uyungire nendi, yiwo oMosesa naEliya. 31Awo kwa monekerere mouyerere wemeguru, makura tava uyunga naJesus yositambo saKarunga esi nga ka sikisa mo Jesus pokukafa moJerusarema. 32Ano oPeturusa nava ga kere nawo tadi va gwana nompofu. Nenge va pinduka, ntani nye vana kumona uyerere waJesus nowo vagara avali, ava va sikeme pwendi. 33Vana kutunda po pwendi va ka ze, Peturusa ta tantere Jesus asi: “Hompa, apa pawa kukara apa. Tu dikeni po marutambo gatatu: limwe lyoge, limwe lyaMosesa, ano eli limwe lyaEliya.” Nye age kapi ga divilisire eyi ana kuuyunga. 34Haga za mokuuyunga, eremo makura tali wiza li va kudumike, va ze momundwire gwalyo. Varongwa kwa va pwagere unene, apa va mwene asi, eremo tali va kudumike. 35Meremo makura tamu tundu ezwi lyokutanta asi: “Ogu Munwange ogu ga za nge komutjima, omu mu zuvhe!” 36Lya zuvhika ezwi, makura Jesus gelike po. Mazuva ogo varongwa kwa mwenene, nagumwe si va sansekerere ko eyi va mwene nampili nakauke.

Jesus ta verura mumati gonompepo donondona

37Eyi kwa sa ko mokutunda kwawo kondundu, Jesus ta gwanekere nombunga zonene. 38Mugara gumwe mombunga ta zigire asi: “Murongi, na kanderere, fira nkenda munwange, yeeyi yige gelike na paka a huru. 39Va liharuka ko mpepo zondona tazi mu gama, ta takuma, tazi mu nyunganga, mokana egwe lyelike, azo kapi za here kumusiga. 40Ame kwa likwamberere kovarongwa woge asi va zi tjide mo, nye kapi va yi vhulire.”

41Jesus makura ta limburura asi: “Ani one vantu va hana epuro, novantu wovalipuki! Siruwo sokuhura kupi ngani kara pokatji keni? Siruwo sokuhura kupi ngani mu fa nonkenga? Reta munoge oku!”

42Mumati simpe kuna kuwiza, mpepo zondona tazi mu gama tazi mu nyunga‐nyunga, tazi mu gandere pevhu. Makura Jesus ta tugumukire mpepo zondona, makura azo tazi pwaga mo momumati, ta veruka vili zoozo. Jesus makura ta mu tengwida koguhwe. 43Vantu navenye kwa va tetwire unankondo waKarunga.

Jesus ta uyunga hena yorunyando rwendi

Ano eyi ya va tetura ngoso navenye eyi ga rugene Jesus, makura ta tantere varongwa vendi asi: 44“Tureni nonkango edi konomutjima, asi MunwaMuntu ngava mu gava momawoko govantu.” 45Nye varongwa kapi va divire asi yinke yina kutanta eyi. Kwa yi va horekere asi va ha yi kwata egano, ano kumupura yokuhamena eyi tava litjilire.

Ogu ga nenepa po yilye?

46Varongwa ga va gwene malipuragero gokuninka asi yilye munene po pwawo. 47Jesus ga divire eyi va gazarere monomutjima dawo. Makura ta gusa munona, ta mu sikameke koruveki rwendi, 48ta va tantere asi: “Ogu a tambwire munona gwangesi medina lyange, nyame a tambura. Ano ogu a tambura nge, kutambura hena ogu ga tuma nge. Yeeyi mununu po pwanamuvenye, yige nga kara munene.”

Ogu a dili kulilimba none, kweni ga hama

49Johanesa ta limburura asi: “Murongi, ose twa mwene mugara, ta pwagesa mo nompepo donondona medina lyoge. Nye ose katu yi mu nyokerere, yeeyi age kapi ga tu hamena.”

50Jesus ta mu tantere novarongwa vakwawo asi: “Yinke yokumunyokerera, yeeyi ogu a dili kumuvyuka, kweni ga hamena.”

Vasamaliya tava nyoka kutambura Jesus

51Apa ga sikire pepi mazuva gokutambwira Jesus meguru, ta tokora kuza koJerusarema. 52Age kwa tumine nontumi di pite komeho. Ado makura tadi zi momukunda gwaSamaliya asi di ka mu wapaikire nayinye. 53Nye vantu vamo kwa nyokere kumutambura, yeeyi va yi divire nawa‐nawa asi koJerusarema ana vyuka. 54Ano varongwa vendi oJakopo naJohanesa apa va yi mwene, tava tanta asi: “Hompa, ono hara tu hundire mundiro meguru, gu va hanagure po ndi?”

55Jesus ta piruka ta va tugumukire. 56Makura tava ka za komukunda nagopeke.

Yokukwama Jesus

57Hava hokwa monzira zawo, mugara gumwe ta tantere Jesus asi: “Ame kuna hara, ngani ku kwame nkenye oku ngo za.” 58Jesus ta mu limburura asi: “Vambanze kwa kara nomakero gawo, ano yidira noyikorogo yayo, nye MunwaMuntu kapi ga paka evega lyokurara a pwizumuke.” 59Age makura ta tantere gumwe asi: “Kwama nge.” Gwina ta limburura asi: “Hompa, siga nge tanko ni ka vhumbike otate.” 60Jesus ta tanta asi: “Siga vafe va vhumbike vafe vawo. Ove yo ze o ka udise Untungi waKarunga.”

61Gumwe hena ta tanta asi: “Ame kuna hara ni ku kwame, Hompa. Nye siga nge tanko ni ka rekere vembo lyetu.” 62Jesus ta mu limburura asi: “Nkenye ogu ana vareke kupurura, nye a tare konyima, kapi ga wapera Untungi waKarunga.”

Currently Selected:

Rukasa 9: KWN

Highlight

Copy