Rukasa 10

Jesus ta tumu varongwa nomurongo ntano‐nambali

1Eyi ya pwa oyo, makura Hompa ta horowora hena nomurongo ntano‐nambali, ta va tumu vavali‐vavali komeho zendi kwankenye sitata nankenye evega eli ga tumbwire. 2Age ta va tantere asi: “Muzangu munzi, nye varugani vasesu. Kanderereni nye Hompa gomuzangu, a tume varugani momuzangu gwendi. 3Zendeni! Tareni, ame kuna kumutuma ngwendi nonzwigona mokatji komambungu. 4Mwa ha lisimbira ndyato zoyimaliva ndi ndyato zomorugendo ndi nonkaku, one hena nokumorora si muntu monzira. 5Muna kuza monzugo, tanko tomu morora. 6Nsene si muntu gombili, mbili zeni tazi wiza pwendi. Nsene yimo sa, mbili zeni tazi mu tengwire nyamweni. 7Tomu kara monzugo zoozo, tomu li oku tomu nu eyi vana kumuzumbura, yeeyi murugani kwa fira kugwana mfeto zendi. Mwa ha ka genda tunda kambo zende kambo. 8Nkenye sitata esi ngomu ka hwilira, nye tava mu tambura, lyeni eyi vana kumuzumbura. 9Tomu verura vaveli ava muna kugwana mo, one tomu va tantere asi, ‘Untungi waKarunga una kara pepi neni.’ 10Nye nsene mu za mositata, nye va nyoke kumutambura, zendeni mononzira mu tante asi: 11‘Nombundu zeezi zomositata seni ezi zina tu kakatere, tatu zi mu kukumwine. Nye mokudiva, diveni, Untungi waKarunga pepi neni una kara.’ 12Ame tani mu tantere asi, upyakadi waSodoma ngau kara hasa mezuva lyoMpanguro, wositata oso ngau rura!

Yitata ya hana kulitezurura

13“Ngo yi mona ove Korasini nove Betesaida! Yeeyi ngano asi yitetu eyi kwa horokerere moTirusi nomoSidoni, ngano va litezurura nare va gwave evhu. 14Nye oTirusi naSidoni ngayi va wapera hasa ezuva lyoMpanguro kumupitakana one. 15Ano o kare ove Kaperenaumu, nye ngava ku tumbe tupu dogoro keguru ndi? Ndangove, ove mosirongo sovafe ngava ku zugumina.

16“Ogu ana kumuzuvha, nyame a zuvhu, ogu ana kumunyoka, nyame ana nyoka. Ano ogu ana kunyoka nge, googu ga tuma nge, yige ana nyoka.”

Etenguro lyovarongwa nomurongo ntano‐nambali

17Owo nomurongo ntano‐nambali kwa tengwire nehafo lyenene, tava tanta asi: “Hompa, nonompepo donondona deedi kuna ka kara mepangero lyetu medina lyoge.”

18Jesus makura ta va tantere asi: “Ame kuna mono Satana ta gu meguru ngwendi ruvadi. 19Tareni, ame tani mu pe nonkondo, asi mu lyate pomazoka nopononge, nonkondo dokupitakana donkore zeni Satana; nayimwe si eyi ngayi mu remeka. 20Nye walye omu hafere eyi asi nompepo donondona kuna ka kara mepangero lyeni. Nye hafereni eyi asi madina geni vana ga tjangere meguru.”

Ehafo lyaJesus

21Mosiruwo sooso Jesus ta hafa moMpepo zoKupongoka, ta tanta asi: “Nyove nina kupanda, Tate, Hompa geguru nevhu, yeeyi wa horeka yininke eyi vakonentu novanandunge, yiyo wa yi horwera vantuuntu tupu. Nhi, Tate, ngesi yimo wa yi harera.

22“Nayinye kwa yi pa nge ame oTate; nye nagumwe si ga diva Muna, ntudi Guhwe no. Hena nagumwe si ga diva Guhwe, ntudi Muna no, nogu ga yi harera kuyihorwera Muna.”

23Jesus makura ta piruka a tare kovarongwa vendi velike, ta tanta asi: “Meho aga gana kumona eyi muna kumona kwa ragopa. 24Yeeyi ame tani mu tantere asi, vaporofete nohompa wovanzi kwa here kumona eyi muna kumona, nye kapi va yi mwene, awo kwa here kuzuvha eyi muna kuzuvha, nye kapi va yi zuvhire.”

Sifanekeso soMusamaliya gonkenda

25Mulirongi gumwe gomatjangwa kwa sikamene a heteke Jesus pokumupura asi: “Murongi, yinke eyi nani vhura kurugana, nkumwe ngani gwanene po mwenyo gwanarunye?” 26Jesus ta mu limburura asi: “MoVeta yinke eyi va tjanga mo? Omu o resa mo ngapi?” 27Age ta limburura asi: “O hare Hompa Karunga goge nomutjima goge nagunye nomwenyo goge nagunye nononkondo doge nadinye nonondunge doge nadinye, o hare hena mukweni ngwendi moomu wa lihara nyamoge.” 28Jesus makura ta mu tantere asi: “Ono hungike kulimburura! O yi rugane ngo kare nomwenyo.”

29Nye age kwa here a liwapaike, makura ta pura Jesus asi: “Mwene ogo mukwetu yilye?” 30Jesus ta mu limburura asi: “Mugara gumwe kwa tundire koJerusarema, a ze koJeliko. Makura ta ka litwa movamahaka. Awo kwa mana tupu kumuhutura, tava mu toona, makura tava mu sigi, age kamwenyogona mo. 31Pana kuninka tapa ya piti mupristeli gumwe, ta ka mu mona, makura ta ka mu zapuka ta ka za. 32Murevhi gumwe nage ta wiza po opo pevega, ana kumumona, ta zapuka ta ka pita. 33Ano Musamaliya gumwe nage ga gendere nzira ozo, ta ya mu gwana. Ano apa ga mu mwene, ta mu retere nkenda, 34ta mu zire, makura ta dingi yironda yendi oku ta tjire po magadi novhinyu. Makura ta mu rondeke ponkutira zamwene, ta mu twara kohotera, ta ka mu veda. 35Kuna kusa, makura ta gusa mo tumaliva tuvali tosisiliveli, a tu pe mwenyahotera, ta mu tantere asi: ‘Mu pakera mbili. Nsene ngaku kamba hena yimwe, ngani ya yi futa apa ngani tengura.’ 36Koge ove omu ono kugazara, pwava vatatu, yilye po mukwawo zogo va rwadekere vamahaka?”

37Mulirongi gomatjangwa ta limburura asi: “Googu ga mu fililire nkenda.” Jesus yipo nye ga mu tanterere asi: “Zende, nove o ka yi rugane.”

Jesus ta dingura oMalita naMariya

38Morugendo rwawo oJesus novarongwa vendi kwa wizire momukunda gumwe. Makura mukadi gumwe, edina lyendi Malita, ta mu tambura membo lyendi. 39Age kwa kere namunwazina gomukadi, edina lyendi Mariya. Age kwa hingilire ponompadi daJesus a purakene nonkango dendi. 40Nye Malita age kuna kuviyauka a wapaike nayinye. Makura ta wiza, ta ya sikama po, ta tanta asi: “Hompa, nani nokuyifira si mbili, eyi ana sigi nge ogo mumbyange, ni rugane nyamelike? Mu tantera nye a ya kwafe nge!” 41Nye Hompa ta mu limburura asi: “Malita, Malita, yinzi ono lipakere sinka, ove hena ono piyagana. 42Nye sininke simwe po yiso sohepero. Mariya kuna horowora po age ruha roruwa, oru ngava dira kumugusa.”

Currently Selected:

Rukasa 10: KWN

Highlight

Copy