Rukasa 8

Vakadi ava ngava kwafa Jesus

1Konyima zoyo makura Jesus ta zi mwa za yitata a udise Mbudi zoUntungi waKarunga. Owo murongo navavali awo kumwe nendi, 2kumwe novakadi vamwe ava ga verwire konompepo donondona nomauvera: Mariya Mangadarena ogu da tundire nompepo donondona ntano‐nambali, 3naJohana mukadaKusa, erenga lyaHerodesa, naSusana, navamwe hena wovanzi ava ngava mu kwafa nemona lyawo.

Sifanekeso somukuni

4Emukurumbunga lyovantu kwa pongere li tunde moyitata peke‐peke. Jesus makura ta va tantere mosifanekeso asi:

5“Mukuni kwa zire a ka kune. Haga za mokukuna, mbuto zimwe tazi gwire konontere donzira, tava zi lyatanga, yidira tayi wiza tayi zi li po nu. 6Ano mbuto zimwe tazi gwire poyingurumanya. Naruvali si nare zina mene, makura tazi kukuta, morwa kapi pwa duvara nawa. 7Ano mbuto nkwawo tazi gwire momega. Mega eyi ga kura kumwe nazo, makura tazi fu nsine. 8Makura ezi zimwe yiyo nye za gwililire pevhu lyewa, tazi kuru tazi reta nondanda nkenye ezi.” Eyi ga yi tanta ngoso, makura ta zigire asi: “Ogu ga kara nomatwi gokuzuvha, a zuvhe.”

Jesus ta fwatura sifanekeso somukuni

9Ano varongwa vendi tava mu pura asi: “Ngapi omu asi tanta sifanekeso esi?” 10Age makura ta va limburura asi: “One kwa yi mu pa yokukwata egano yihoramo yoUntungi waKarunga, nye kwava vapeke kuyiuyungira moyifanekeso, asi nampili va tare, ngwendi kapi vana kumona, va zuvhe, nye ngwendi kapi vana kuzuvha, va yi kwate egano.

11“Ano efwaturo lyosifanekeso lyeli: mbuto, yido nonkango daKarunga. 12Mbuto ezi za gwililire konontere donzira, vaava ava zuvhu nonkango, makura Mudona ta ya di hakana mo nonkango monomutjima dawo, asi va ha pura ngava dire kuparuka. 13Ezi zopomamanya vava ava ninki, eyi va zuvha nonkango, nare vana di tambura nehafo, nye awo kutupu nondandani, yeeyi awo kupura karuwogona tupu, posiruwo somaheteko kapi va kara ko, kuzonauka. 14Mbuto ezi za gwililire momega vava ava zuvhu nonkango, nye sinka souzuni ou neyivayiwo lyemona tali va dipagere nsine nonkango daKarunga, makura tava dili nye kureta nombuto. 15Ano edi da gwililire mevhu lyewa, vava ava zuvhu nonkango, makura tava pungura nonkango momutjima gomuwa gokulimburukwa. Ava yiwo ava reta nombuto medidimiko.”

Sifanekeso soramba

16“Nagumwe si ogu a hwameke ramba makura a zi swike yuma ndi a zi ture konhi zouro. Nani nye kuzitura pontunda, ntani zi temena navenye ava vana kuhwilira mo. 17Yeeyi kutupu eyi ya horama asi ngayi dire kuhoroka, ndi yeyi va horeka asi ngayi dire kudivikwa yi wize poruzera.

18“Omu takamese mokupurakena kweni. Yeeyi ogu ga kara noyuma, ngava yi mu vhukisira, ano ogu ga yi pira, ngava mu gusa neyeeyi a gazara asi yiyo ga kara nayo.”

Vanavazina vaJesus

19Ozina novamumbya vaJesus kwa mu wizilire, nye morwambunga kapi va ka sikire ko kwendi. 20Awo makura tava mu tantere asi: “Ani onyoko novamumbya woge ponze vana kara, awo kuna hara va ku mone.” 21Nye Jesus ta va limburura asi: “Onane novamumbya vange ame, vaava ava zuvhu nonkango daKarunga, nye tava di sikisa mo.”

Jesus ta mwenekeda ekundungu

22Ezuva limwe Jesus novarongwa vendi kwa peramene mowato. Age makura ta va tantere asi: “Tu ruteni tu ze mesinya mwina lyekurudiva.” Awo makura tava zi. 23Hava za mokuruta, makura Jesus ta rara. Va tara ko, ekundungu lina pinduka mekurudiva, wato kuna kuhara kuzura mema, mokudama mwelike vana kerere. 24Awo makura tava mu zire, tava mu pindura asi: “Murongi murongi, tatu fu!” Age makura ta pinduka, ta kava ekundungu nomankumpi, ayo tayi litura, taku tende. 25Age ta va pura asi: “Epuro lyeni no kupi?” Nye awo tagu va pwaga, tava tetuka tava tanta asi: “Ogu hena muntu musinke, ogu a kava nonompepo deedi nomema, nye tayi mu zuvhu?”

Jesus ta verura wonompepo donondona

26Awo makura tava ka sika kosirongo saGadara, esi sa livyuka naGalireya. 27Jesus eyi ga tunda mo mowato, makura mugara gumwe ta tundu mositata a mu simbagwire, age kwa kere nonompepo donondona. Kapi nga dwara yikoverero, age hena kapi nga kara membo, nye monontoko. 28Eyi ga mona Jesus, ta ligandere komeho zendi, ta zigire unene asi: “Ose noge hena pwasinke, ove Jesus, MunwaKarunga gekeguru‐guru? Nina ku kanderere, wa ha zonagura nge po!” — 29yeeyi Jesus kwa tanterere mpepo zondona asi zi tunde mo momugara ogo. Yeeyi runzi ngazi mu koka‐koka. Awo ngava mu manga nomalyenge, tava mu pandeke konompadi, tava mu takamesa. Nye age yipandeko nga yi gagunyuna, makura mpepo tazi mu tjidire momburundu. 30Makura Jesus ta mu pura asi: “Nyovelye edina lyoge?” Age ta limburura asi: “Mbunga”, yeeyi nompepo donondona nonzi da zire mwendi. 31Nompepo tadi mu hundire asi ga ha di tantera di ze mEzonauko.

32Opo ngoso pwa kere siunda sosinene soyinguru sa lire pondundu. Nompepo donondona tadi ninki asi a di sige di hwilire moyinguru. Age makura ta di sigi. 33Makura ado tadi pwaga mo mogo mugara, tadi ka hwilira moyinguru. Va tara ko, utanga woyinguru kuna kundandumukira mekurudiva, tau fu mema.

34Vasita eyi va mona eyi ya horokere, makura tava duka, tava ka yi sanseka mositata nomu mwa za nomukunda. 35Makura vantu tava tjapuruka mo va ka tare eyi ya horokere. Awo makura tava wiza pwaJesus, tava ya gwana mugara ogu da tundire nompepo donondona, age kuna hingire pwaJesus, ana dwara muwaawa. Awo makura tagu va pwaga. 36Ava va yi litarerere, nawo tava sanseke omu va mu verwire gonompepo donondona. 37Vantu navenye womo mwaza Gedara tava ninki Jesus asi a tunde po pwawo, yeeyi awo utjirwe wounene wa va gwene. Jesus makura ta perama mowato, ta ka za. 38Ano mugara ogu da tundire nompepo donondona, ta mu kanderere asi a kare pwendi. Nye Jesus ta mu ninki a ze, ta tanta asi: 39“Tengura kembo lyeni o ka sanseke yininke yoyinene eyi ana ku ruganene Karunga.” Age makura ta zi mwaza sitata, ta ka udisa yirugana yoyinene eyi ga mu ruganene Jesus.

Everuro lyamunwaJairusa neli lyomukadi ogu ga gumine kosikoverero saJesus

40Ano Jesus eyi ga tengura, makura mbunga nazinye tazi mu tambura, yeeyi navenye kwa mu ndindilire. 41Makura mugara gumwe, mwenyasinagoge, edina lyendi Jairusa, ta wiza kwaJesus, ta mu gwire konompadi, ta mu likwambere asi a wize kembo lyendi. 42Yeeyi age kwa kere nomuna gumwe tupu gomukadi gonomumvho murongo nambali ngoso, age ta hara kufa.

Jesus eyi ana kukaza, azo mbunga zonene tazi mu kwama. 43Pwa kere mukadi gumwe ogu nga vere madambwe nomumvho murongo nambali. Yininke yendi nayinye ga manenene kononganga, nye nagumwe si ogu ga vhulire kumuverura. 44Age ta mu tundilire konyima, ta gumu konyerera zimwe zokosikoverero saJesus. Poopo ngoso makura uvera wendi wohonde tau mu sigi. 45Jesus makura ta pura asi: “Ogu ana gumu nge yilye?” Eyi vana kupatana navenye ava ga kere nawo, makura Peturusa ta mu tantere asi: “Mbunga ezi zina kuumbilikida ngesi zina kupaterekeda, nye yiyo no tanta asi, ‘Ogu ana gumu nge yilye?’ ” 46Nye Jesus ta limburura asi: “Pweli ogu ana gumu nge, yeeyi nina lizuvhu asi nonkondo dina tundu mo mwange.” 47Mukadi eyi ga zuvha asi, ana nongonokwa, makura ta ligandere komeho zaJesus, age ta kankama mbunga kuna kutara, ta tanta konda ezi ana mu gumine nomu ana veruka usimbu‐simbu. 48Jesus ta mu tantere asi: “Gu ku dame munwange. Epuro lyoge lina ku parura. Zende nombili.”

49Haga za mokuuyunga, mugara gumwe ga tundire kembo lyamwenyasinagoge nage ana wiza, makura ta tanta asi: “Munoge ana fu, wa ha hepekesa murongi mawoko‐woko.” 50Nye Jesus apa ga yi zuvhire, ta tanta asi: “Gwa ha ku pwaga! Pura tupu, makura ta paruka.” 51Jesus eyi ga ya sika membo, kapi ga sigire nage peke a hwilire nendi monzugo, ntudi oPeturusa naJakopo naJohanesa noguhya nozinyamukadona makura. 52Navenye kwa tendanene va mu lire nonkali. Nye Jesus ta tanta asi: “Mwa ha lira, kapi ana fu, kuna rara.” 53Awo makura tava mu zoro sirungu, yeeyi va divire asi mukadona ana fu. 54Ano eyi ga mana kuvatjida mo navenye va pwage, makura ta mu kwata kokuwoko, ta zigire asi: “Mukadona, pinduka!” 55Ago makura tagu wiza mo, nare ana pinduka. Jesus ta tanta asi, va mu pe ko yuma yokulya. 56Vakurona vendi kwa tetukire, nye Jesus ta va tantere asi, nokuyisansekera si muntu eyi yina horoka po.

Currently Selected:

Rukasa 8: KWN

Highlight

Copy