Rukasa 7

Jesus ta verura mukareli gomupitisili govakwayita

1Jesus kwa mana tupu kutantera vantu yininke nayinye eyi, makura ta zi koKaperenaumu. 2Ano mukareli gomupitisili gumwe govakwayita goMuroma kwa verere unene, monomfa ga kererere. 3Gwina eyi ga zuvha yokuhamena Jesus, makura ta tumu ko masimbi goVajuda, va ka mu zigide asi a ya verure mukareli gwendi. 4Eyi va wiza kwaJesus, tava mu likwambere asi: “Yokumukwafa ove, ya mu fira, 5yeeyi kwa hara muhoko gwetu, yiyo ga tu tungira sinagoge mwagelike.”

6Jesus makura ta zi kumwe nawo. Nye eyi ana kuhara kusika pepi nembo, makura mupitisili govakwayita ta tumu vakwawo va ka mu tantere asi: “Hompa, neisi no rorokera, yeeyi ame kapi na fira asi o hwilire ove monzugo zange. 7Nanyamwange ko yiyo yina limbi nge kuwiza koge. Nhi, tanta tupu nonkango, makura mukareli gwange a veruke. 8Yeeyi name muntu va pa nonkondo, vakwayita mwange ava zuvhu. Kutantera gumwe asi, ‘Wiza,’ ta wiza, ndi mukareli gwange asi, ‘Rugana eyi,’ ta yi rugana.” 9Jesus eyi ga yi zuvha, tayi mu tetura, makura ta piruka a tantere mbunga ezi za mu kweme asi: “Tani mu tantere asi, nomoIsraeli si moomu kapi na gwana mo rumwe epuro lya hura apa.” 10Ano ava va tumine eyi va tengura kembo, va ka mu gwane mukareli gwa ndjewa‐ndjewa.

Jesus ta tura mwenyo muna gomugara gomufisayendi moNayini

11Eyi kwa sa, makura Jesus ta zi kositata saNayini, ano varongwa vendi nombunga zonene tazi zi kumwe nendi. 12Kwa ya sika tupu perungavero lyositata, va tara ko, simpu vana kupwagesa, mugara a huru mezimo lyozina, zina hena mufisayendi ga kere, age kwa mu sindikilire mbunga zonene zomositata. 13Ano Hompa eyi ga mu mona zina, ta mu retere nkenda, makura ta mu tantere asi: “Wa ha lira!” 14Age makura ta heda ko, ta gumu kosintali, vasimbi vaso tava sikama. Jesus ta tanta asi: “Mugara, tani ku tantere asi, pinduka!” 15Nakufa ta pinduka, ta tameke kuuyunga, Jesus makura ta mu gava kozina. 16Utjirwe makura tau va gwana navenye oku tava hamberere Karunga asi: “Muporofete gomunene ana horoka mokatji ketu,” hena asi, “Karunga kuna ya dingura vantu vendi.” 17Sihoroka esi makura tasi lihanene moJudeya nazinye nomonomukunda nadinye dopopepi.

Nontumi daJohanesa Mukuhwi

18Varongwa vaJohanesa kwa mu sansekerere yininke nayinye eyi. Makura Johanesa ta zigida po vavali, 19ta va tumu kwaJesus, va ka mu pure asi: “Ove nyove ogu asi ngo wiza ndi tu ndindire nagepeke?” 20Ano vagara owo eyi va wiza kwaJesus, tava tanta asi: “Johanesa Mukuhwi yige ana tu tumu koge asi, ‘Ove nyove ogu asi ngo wiza, ndi tu ndindire nagepeke?’ ” 21Poopo ngoso Jesus ta verura vantu wovanzi womauvera noyikunkira nava wonompepo donondona oku ta mahura meho govatwiku wovanzi. 22Jesus makura ta va limburura asi: “Zendeni mu ka dimbwire Johanesa eyi muna mono neyi muna zuvhu: vatwiku kuna kumona, yirema kuna kugenda, vanayingondwe kuna kuveruka, yipuru‐puru kuna kuzuvha, vafe kuna kupinduka, ano vahepwe kuna kuvaudisira Mbudi zoNgwa. 23Nye munerago googu a dili kulimbilirwa mwarwange!”

24Apa da tundire po nontumi daJohanesa, Jesus makura ta tantere mbunga zovantu yokuhamena Johanesa asi: “Yisinke eyi mwa zililire mu ka tare momburundu? Ruu rokulinyunganga kompepo ndi? 25Ndi yinke eyi mwa zililire mu ka tare? Mugara ogu a dwara yikoverero yokurerema? Tarenisi ava ava dwara yikoverero yokurerema, monombara va tunga. 26Nye one yinke mwa zililire mu ka tare? Muporofete ndi? Nhi, ame tani mu tantere asi, age kwa pitakana muporofete. 27Yeeyi age yige ya hamena eyi va tjanga asi: ‘Tara, ame tani tumu mutumwa gwange komeho zoge, nga ku wapekere nzira zoge.’ 28Yeeyi ame tani mu tantere asi, mokatji kava va hampuruka vakadi, mutupu ogu ga pita Johanesa Mukuhwi. Nye ogu ga nunupilira po moUntungi weguru, yige ga mu pita.”

29Ano mbunga nazinye, novafutisi womutero apa va yi zuvhire, tava pura asi Karunga Muhungami, makura tava tambura ekuho lyaJohanesa. 30Nye Vafalisayi novalirongi womatjangwa va lizoneserere eharo lyaKarunga, morwa va nyokere ekuho lyaJohanesa.

31Hompa makura ta tanta asi: “Vantu vantani kosinke nani va fanekesa, yinke eyi va fana? 32Awo kwa lifana novanona ava ava hingire pomarandero ava zigida vakwaawo asi, ‘Ose katu mu sivire po nsiva, nye one yiyo muna dili kudana; tuna mu dimbire nonsumo domalirankali, nye one nokulikwata si mbida‐mbida.’ 33Johanesa Mukuhwi eyi ga wiza, kapi nga li ndi a nwe, makura yiyo omu ninki asi, ‘Mpepo zondona za mu kara.’ 34Ano MunwaMuntu eyi ga wiza, age kulya kunwa, makura yiyo omu mu ninki asi, ‘Tareni gomakurulya nomakurunwa, age hena kwa likwata ukwawo novafutisi womutero novananzo!’ 35Nye ukonentu waKarunga kumoneka moyirugana yawo asi awo kwa hungama.”

Mukadi gononzo tava mu dongwenene po

36Mufalisayi gumwe kwa zigidire Jesus asi va ka lye nendi. Makura Jesus ta hwilire membo lyoMufalisayi, makura tava li. 37Ano mukadi gumwe gononzo gomositata oso apa ga zuvhire asi mweli membo lyoMufalisayi, yimo ana kulya, makura ta wiza nongwavero zoarubasiteli. 38Age makura ta sikama konyima zaJesus konompadi dendi oku ta lili. Age makura ta woreke nompadi daJesus mahodi, makura ta di kokotesa nohuki dokomutwe gwendi. Age makura ta di ncumita ta di gwaveke magadi gedumba lyewa. 39Ano Mufalisayi ogu ga zigidire Jesus, ta lipura asi: “Ogu ngano asi muporofete, ngano ana diva asi mukadi musinke ogu ana kumuguma, yeeyi mukadi gononzo.” 40Jesus makura ta mu tantere asi: “Simoni, na kara noyuma yokukutantera.” Gwina ta limburura asi: “Murongi, tanta tupu.” 41Jesus ta tanta asi: “Musinti gumwe goyimaliva kwa kere novantu vavali va mu lira makongo. Gumwe kwa mu gusire makongo gomadenali mafere gatano, ano ogu mukwawo madenali nomurongo ntano. 42Ano eyi ya va vhura kufuta, makura ta va dongwenene po navenye. Pwava vavali, yilye po nye ogu nga mu hara unene?” 43Simoni ta limburura asi: “Kwange ame googu ga dongwenena po dononzi.” Jesus ta limburura asi: “Ono pangura mouhunga.” 44Age makura ta piruka a tare komukadi, ta tantere Simoni asi: “Ono mu mono ogu mukadi? Apa na wiza membo lyoge, ove nokupa nge si mema gokukuhwa nompadi dange. Nye age ana woreke nompadi dange nomahodi gendi, yipo ana di kokotesa konohuki dokomutwe gwendi. 45Kuncumita kapi ono ncumita nge, nye age tupu ana wiza mo, kapi ana hageke kuncumita nompadi dange. 46Ove kapi ono gwaveke nge mugwawo komutwe gwange, nye age ana gwaveke nompadi dange magadi gedumba lyewa. 47Yiyo nye nina kukutanterera asi, nonzo dendi dononzi kuna di dongonona po, yeeyi age kwa kara neharo lyenene. Nye ogu va dongwenena po nakauke, kwa kara neharo lyenunu.” 48Jesus makura ta tantere mukadi asi: “Nonzo doge kuna di dongonona po.” 49Ava va kere pompanda tava tameke kulipura asi: “Muntu musinke ogu a dongonona po nononzo deedi?” 50Jesus makura ta tantere mukadi asi: “Epuro lyoge lina ku parura. Zende nye nombili.”

Currently Selected:

Rukasa 7: KWN

Highlight

Copy