Rukasa 6

Jesus yige hompa gEsabata

1MEsabata limwe Jesus kwa gendere momapya. Makura varongwa vendi tava digi ntafu va lye. 2Vafalisayi vamwe tava va tantere asi: “Yinke muna kuruganena eyi va silika mEsabata?” 3Jesus ta va limburura asi: “Kapi mwa resa eyi ga rugene Ndafita, apa za mu kwete nzara novantu vendi, 4a ze monzugo zaKarunga a ka lye nomboroto donzambo edi va va dilikire kulya, ntudi vapristeli woowo?” 5Age ta va tantere hena asi: “MunwaMuntu yige hompa gEsabata hena.”

Everuro lyomugara gokufa kuwoko

6MEsabata limwe Jesus kwa zire mosinagoge a ka ronge. Amo mwa kere mugara gumwe gokuwoko korulyo kokufa. 7Valirongi womatjangwa noVafalisayi kwa tarerere Jesus asi, nsene na verura mEsabata, nkumwe va gwanene po yokumupesa usima. 8Nye age ta diva magazaro gawo, makura ta tantere mugara gokufa kuwoko asi: “Sikama opo pokatji kawo.” Age makura ta sikama. 9Makura Jesus ta va tantere asi: “Tani mu pura asi, eyi va gava mEsabata yokurugana yoyiwa ndi yoyidona, yokuparura mwenyo ndi yokuguzonagura?” 10Age makura ta manenekeda kuvatara navenye, ta tantere ogo mugara asi: “Gonyonona kuwoko koge!” Gwina ta yi rugana, makura taku veruka, taku fana kukwawo. 11Awo tava handuka unene‐nene, tava liyongo asi ngapi omu nava mu rugana Jesus.

Jesus ta horowora vapostoli murongo navavali

12Pomazuva ogo Jesus kwa pwagere, ta ka ronda kondundu, makura ta kanderere kwaKarunga masiku mudima. 13Eyi kuna kusa, makura ta zigida varongwa vendi, ta horowora po murongo navavali, ava ga rukire asi vapostoli: 14Simoni ogu ga rukire asi Peturusa, namumbyendi Andiliyasa, naJakopo naJohanesa naFilipusa naBaratoromeusa, 15naMateusa naTomasa, naJakopo zaArufeusa naSimoni ogu ngava tumbura asi gomupampi, 16naJudasa zaJakopo naJudasa Isikalyoto, ogu ga ya mu horwere.

Jesus ta udisa oku ta verura vaveli

17Jesus makura ta humburuka ko kumwe nawo, tava ya sikama pevega lyokuhetakana. Apo pwa pongere mbunga zovarongwa vendi, nombunga zonene zava va tundire moJudeya nazinye nomoJerusarema nava wokononkenkenkera daTirusi naSidoni. 18Awo kwa wizire va ya mu zuvhe, awo va ya va verure komauvera gawo, nava si ngadi hepeke nompepo donondona nawo kwa va verwire. 19Mbunga nazinye kwa kondyerere po asi zi mu gume, yeeyi nonkondo kwa tundire mwendi, tadi verura navenye.

Munerago yilye?

20Jesus makura ta tara varongwa vendi, ta tanta asi:

“Vanerago one vahepwe

yeeyi Untungi waKarunga weni.

21Vanerago one ava muna kufa nzara ntaantani,

yeeyi ngava ka mu kutika.

Vanerago one muna kulira ntaantani,

yeeyi one ngomu ka hafa!

22“One vanerago nsene vantu tava mu nyenge oku tava mu tjida‐tjida va mu tumbure asi mu vadona, nye mokonda zaMunwaMuntu. 23Omu hafe oku tomu dana nsene ngayi mu horokera eyi, yeeyi mfeto zeni nene meguru. Yeeyi ozinyakurweni vaporofete yimo ngava va rugana ngorooro.

24“Nane vakwetu, one nongawo ntaantani,

yeeyi mwa gwana nare ruyiga rweni!

25Nane vakwetu, one ava muna kuta ntaantani,

yeeyi ngomu fa nzara.

Nane vakwetu, one muna kuzora ntaantani,

yeeyi ngomu ka guva oku tomu lili!

26“Nane vakwetu, vantu navenye nsene tava mu uyunga momuwa, yeeyi vaporofete woyimpempa ozinyakurweni yimo ngava va uyunga.

Hareni nonkore deni

27“Nye one ava muna kupurakena, ame tani mu tantere asi: omu hare nonkore deni, tomu ruganene ava va mu nyenga uwa. 28Omu swere ava ava mu fingilire, tomu kandererere ava ava mu swaura. 29Ano nsene ana ku toona muntu ketama, mu pirwira nekwawo. Gumwe hena nsene a ku gusa ndyafa, mu sigira nohema. 30O gave kwankenye ogu ana kukuhehera yuma. Ove hena oyo yininke nokuyitondora ko si kogo ono yi pe. 31Eyi wa hara asi yiyo nava ku ruganena vantu, nove o yi va ruganene. 32Nsene mu hara vaava va mu hara, mpandu musinke nye ngomu gwana po? Yeeyi novananzo kwa hara vaava va va hara. 33Ndi nsene mu rugana momuwa ava ava mu rugana momuwa, mpandu musinke ngomu gwanena po? Yeeyi vananzo nawo yimo ava rugana ngorooro. 34Nsene mu gava makongo kwavaava mwa diva asi ngava yi futa, mpandu zeni musinke po nye opo? Vananzo nawo kugava kovananzo vakwaawo, asi ngava va futire paapa ya hura. 35Nye one, omu hare nonkore deni, tomu va ruganene uwa. Tomu gava makongo one mwa hana kugatondora, makura mfeto zeni ngazi vhuka, one makura ngomu kare vana vaKarunga gekeguru‐guru. Yeeyi nage kuruganena uwa ava va ha pandura novadona. 36Omu kare nonkenda, moomu ga kara Guhyeni nonkenda!

Kulipangura‐pangura

37“Walye omu pangura, ntani ngava dira kumupangura none. Walye omu gava usima, ntani ngava dira kumupa usima none. Omu dongwenene po vakweneni, none ngava mu dongwenene po. 38Omu gave, none ngava mu pe. Siheteko esi va sinda va nyunganga sa zulilira, ngava si mu tentekera momavha geni. Yeeyi sihetekeso esi omu hetekesa, yiso ngava mu hetekesera none.”

39Jesus makura ta va tantere sifanekeso asi: “Mutwiku kuvhura kukwata mutwiku mukwawo kompango ndi? Kapi va gwire navenye mouvali wawo mekero ndi? 40Murongwa kapi a pitakana murongi gwendi; nye nsene ana pu kumuronga, ntani nye ana kufana murongi gwendi.

41“Yinke nye no zigira kavambi meho lyamukweni, ove wa hana kumona nkambo ezi zina vindama meho lyoge? 42Ndi ngapi omu no tantera mukweni asi, ‘Hewa, ninka ni ku guse kavambi oko kana kara meho lyoge,’ ano ove ezi nkambo zina kara meho lyoge wa ha mono? Anove muyilipaki, hova tanko kuligusa nkambo ezi zina vindama meho lyoge, o mone nawa, ntani nye no gusa kavambi aka kana kara meho lyamukweni.

Sitji noyiyimwa yaso

43“Sitji sosiwa kapi asi yimi yiyimwa yoyidona, ano si kare sitji sosidona kapi asi yimi yiyimwa yoyiwa. 44Nkenye sitji kusinongwenesa koyiyimwa yaso. Komega kapi ava nyanga ko ekuzu, ano muntu hena kapi a tete sisokombwa somandyembere kosihwa somega. 45Muntu gomuwa kuhorora yoyiwa yomougawo womutjima gwendi wouwa. Ano muntu gomudona kuhorora yoyidona yomougawo womutjima gwendi woudona. Kana kupwagesa eyi ya zura momutjima.

Vatungi wononzugo vavali

46“Yinke nye eyi omu tumbwire nge asi, ‘Hompa, Hompa,’ one mwa hana kurugana eyi ani mu tantere? 47Nkenye ogu a wiza kwange, ta purakene nonkango dange nye ta di sikisa mo, tani mu mu likida omu ga fana. 48Age kwa lifana nomugara ogu ga tungire nzugo. Age kwa simine mukanko gokupita, makura ta tatekere pemanya. Ano eyi rwa wiza ruhanzo, mema ga litoone mo monzugo ozo, azo za zengu, morwa kwa zi tatekera pemanya. 49Nye ogu a purakene nonkango dange, age ga hana kudisikisa mo, age kwa lifana nomugara ogu ga tungilire nzugo pomuheke azo za hana etateko. Ano mema eyi ga ya litoona mo, nzugo nare kazi mbandaukire, nye embandauko lyazo kwa nenepere.”

Currently Selected:

Rukasa 6: KWN

Highlight

Compare

Copy