Rukasa 5

Ehoroworo lyovarongwa wokuhova

1Ezuva limwe Jesus apa ga sikamene konontere dekurudiva lyaGenesareta, makura mbunga tazi lirombo asi zi ka zuvhe nonkango daKarunga. 2Makura ta mono mawato gavali gana hegama konontere dekurudiva. Vena wokutega nomfi awo vana tundu mo, kuna kukuhwa makwe gawo. 3Jesus makura ta perama mowato umwe, waSimoni. Ta mu ninki asi a sure a u gorese ko nakauke konontere. Makura age ta hingire, a ronge mbunga, age mowato.

4Apa ga mana kuuyunga, makura ta tantere Simoni asi: “Dugira petondo, makura mu ka tege makwe geni, mu kwate.” 5Simoni makura ta mu limburura asi: “Murongi, ose kuna rugana masiku mudima, nye nayimwe si tuna kwata. Nye konkango zoge nani li tegera ekwe.” 6Apa va yi rugene, kwa kwete nomfi dononzi, ekwe kuna kuhara kutomoka. 7Makura tava rapa vakwaawo, ava va kere mowato umwe, va ya va kwafe. Awo tava wiza. Makura mawato nagenye gavali taga zura, kuna kuhara kudama.

8Simoni Peturusa eyi ga yi mwene, ta ligandere konongoro daJesus, ta tanta asi: “Tunda po pwange, Hompa, morwa ame mugara gomunanzo.” 9Yeeyi yitetu ya mu gwene nava ga kere nawo, yekwato lyonomfi dononzi, 10oJakopo naJohanesa vana vaSebede, vakwawo vaSimoni, nawo ngosikwawo. Nye Jesus ta tantere Simoni asi: “Neisi nagu ku pwagera; kutunda apa, ove ngo kwata nye vantu.” 11Mawoto tupu va ga hegeka, makura nayinye tava zumbu, va kwame Jesus.

Everuro lyomunayingondwe

12Ano Jesus apa ga kere mositata simwe, makura tapa wiza mugara gumwe goyingondwe. Eyi ga mona Jesus, ta ligandere komeho zendi, ta ninki asi: “Hompa, nsene o yi panga, kuvhura kuverura nge.” 13Jesus ta gonona kuwoko kwendi, ta mu gumu, ta ninki asi: “Nina yi panga, veruka!” Naruvali si nare ana veruka koyingondwe yendi. 14Jesus makura ta mu tantere asi: “Tara, wa ha ka yi tantera muntu. Nye zende o ka lilikide komupristeli, o ka gave nzambo zeveruko lyoge, ezi ga paka po Mosesa, ngazi kare umbangi wawo.” 15Nye mukukumo gwaJesus tagu lihana nye unene. Nombunga dononene dovantu tadi pongo di ya mu purakene, age nga ya va verure mauvera gawo. 16Nye age ta tengwire komavega gomaporeza a ka kandererere ko.

Everuro lyosirema somondambo

17Ezuva limwe apa ga rongere Jesus, Vafalisayi vamwe novalirongi vamwe womatjangwa ava va tundire koyitata nayinye yaGalireya nomoJudeya nokoJerusarema, awo kuna hingire. Nonkondo daHompa dokuverura vaveli kwa kere mwaJesus. 18Makura vagara vamwe tava reta sirema somondambo aso pouro, awo tava heteke asi va mu hwilide mo, va ka mu ture komeho zaJesus. 19Eyi yina kulimba kumuhwilida mo, makura tava tomona mpito pondunda, tava mu hegumwisire kumwe nouro wendi pokatji kovantu komeho zaJesus. 20Jesus eyi ga mona epuro lyawo, makura ta tantere sirema asi: “Anyove, muntu, nonzo doge vana di ku dongwenene po!” 21Ano valirongi womatjangwa noVafalisayi tava lipuragere asi: “Yilye mwene ogu a swaura Karunga ngesi? Ogu gokuvhura kudongonona po nonzo ga hana asi Karunga gelike hena yilye?” 22Jesus apa ga divire magazaro gawo, ta tanta asi: “Yinke eyi muna kugazara monomutjima deni? 23Yoyireru po yeyi yokuuyunga asi, ‘Nonzo doge vana di dongonona po,’ ndi yokuuyunga asi, ‘Katuka o gende’? 24Nye mokumudivisa asi MunwaMuntu kwa kara nononkondo dokudongonona po nonzo pevhu, yiyo nina kutantera sirema asi: katuka, gusa uro woge o ze kweni.” 25Gwina makura nare ana katuka awo kuna kutara, ta damuna uro wendi ou ga rere, ta zi kwawo oku ta hamberere Karunga. 26Navenye kwa tetukire unene. Guna va pwaga, tava panda Karunga asi: “Ee, yitetu musi tuna mono naina!”

Jesus ta horowora Revhi

27Kutunda opo Jesus eyi ana genda‐genda ko, makura ta mono mufutisi gomutero edina lyendi Revhi, age ana hingire pomberewa zomutero. Makura ta mu tantere asi: “Kwama nge!” 28Revhi makura ta sigi nayinye, ta katuka ta ka mu kwama.

29Revhi kwa ruganenene Jesus sipito sosinene membo lyendi. Membo kwa kere mo vafutisi womutero wovanzi, navamwe hena ava va lire nawo. 30Ano Valirongi womatjangwa noVafalisayi tava ngungutwire varongwa vaJesus asi: “Yinke muna kulira oku tomu nu kumwe noVafutisi womutero novananzo?” 31Jesus ta va limburura asi: “Ava va kanguka kapi va hepa muhakuli, vaveli ntani yiwo va mu hepa. 32Ame kapi na wizira asi ni ya zigide vahungami, vananzo na wizira asi va litezurure.”

Yediliro lyonondya

33Awo makura tava tantere Jesus asi: “Varongwa vaJohanesa kudilira nondya nkenye apa oku tava kara momakanderero, nye varongwa woge kulya oku tava nu.” 34Jesus ta va tantere asi: “One kuvhura kudilika wosipito age mukwali pweli pwawo? 35Nye ngapa wiza mazuva aga ngava mu va gusa mukwali, ntani nye ngava dilira nawo.”

36Age ta va tantere hena sifanekeso asi: “Nagumwe si a tura sivandeko sosipe posikoverero sosikuru‐kuru, morwa yeeyi asi esi sosipe neisi si zomona po, si sige po emuntomo lyenene. 37Nagumwe si hena ogu a dwire vhinyu zompe monompunda dononkuru‐nkuru, neisi di tauka, vhinyu zi tjike mo, nompunda tadi zonauka. 38Ano vhinyu zompe kuzidwira monompunda donompe. 39Nagumwe si a nu vhinyu zonkuru‐nkuru, asi a nwe hena zompe, yeeyi ta tanta asi, ‘Zonkuru‐nkuru yizo zongwa.’ ”

Currently Selected:

Rukasa 5: KWN

Highlight

Compare

Copy