JEREMIYA 11
11
Jeremiya negwanekero
1 Hompa ta tantere nge asi: 2“Purakeneni kononkango degwanekero. Tantera vantu womoJuda nava womoJerusarema 3asi ame Hompa Karunga gwaIsraeli, na tura efingiliro kwankenye ogu a dili kulimburukwa kononkango degwanekero eli. 4Alyo egwanekero eli na peke po nozinyakurwawo, apa na va gusire moEgipite, sirongo esi sa kere kwawo ngwendi esuga lyomundiro. Ame kwa va tanterere, va limburukwe kwange va rugane nayinye eyi na va pangera. Ame kwa va tanterere asi, nsene va limburukwa ngano ngava kara vantu vange, ano ame ngani kara Karunga gwawo. 5Makura ngano ngani sikisa mo etumbwidiro eli na tumbwidilire ozinyakurwawo asi, ngani va pa sirongo sosingawo sevhu lyewa esi vana kara nawo ntaantani.”
Ame tani tanta asi: “Hawe, yimo Hompa.”
6 Hompa ta tantere nge asi: “Zende koyitata yaJuda nokononzira daJerusarema. Ka udise mbudi o ka sansekere vantu asi, va purakene kononkango degwanekero va di limburukwe. 7Apa na gusire ozinyakurwawo moEgipite, kwa va rondwere nomugano asi va limburukwe kwange, makura yiyo ani va rondora‐rondora ngorooro dogoro naina ngesi. 8Nye awo nokuzuvha si ndi asi va limburukwe. Nye nkenye ogu ta twikire ngorooro kurunda mutwe nokuyipa kupitakana pwanare. Ame kwa va pangera asi va sikise mo egwanekero, nye awo tava nyoka. Makura yipo na va reterere mafutiso nagenye aga va tjanga mo.”
9Makura Hompa ta tantere nge asi: “Vantu womoJuda nava womoJerusarema kuna kukatukira nge va vyuke nge, 10Vana tengwire kononzo dozinyakurwawo, ava ngava nyoka kurugana eyi ngani tanta; awo ngava tongamene vakarunga peke. Navenye naIsraeli naJuda va teza po egwanekero eli na peke po nozinyakurwawo. 11Ano ngesi ame Hompa kuna kuvarondora asi tani va retere ezonauko, kapi ngava yoworoka. Ano nsene ngava kuga kwange ekwafo, kapi ngani va purakena. 12Makura vantu womoJuda nomoJerusarema ngava za kovakarunga ava ava zambere nonzambo, va ka va kugire ekwafo. Nye vakarunga owo kapi ngava va parura apa ngali wiza ezonauko. 13Vantu womoJuda kwa kara novakarunga wovanzi ngwendi yitata yawo, ano Vajerusarema kwa siga yizambero yokuzamberera karunga goyihuna Bara ngwendi nonzira domositata. 14Jeremiya, wa ha kanderera nge ndi o likwambere nge mombinga zovantu ava. Apa ngava kara moudigu nye va kuge kwange ekwafo, kapi ngani va purakena.”
15 Hompa ta tanta asi: “Vantu ava na hara kuna kurugana yininke yoyidona. Sikwafo musinke nye sokukara awo montembeli zange? Awo kugazara asi ngava kandana po ezonauko pokuninka matumbwidiro nopokuzamba nonzambo doyimuna ndi? Oyo yiyo nye ngayi va pa nye erago ndi? 16Ame kwa va ruka asi uzwe woyihako yoyitarara, una zura yiyimwa yoyiwa; nye ntaantani, nendundumo ngwendi lyomvhura ngani hwika mahako gawo, nomutayi ngadi tekauke.
17“Ame Hompa Munakondo nadinye, nyame na tapeka Israeli naJuda; nye ntaantani na va katukire nezonauko. Eyi vene va yi liretera, morwa va rugana yepuko; va handukisa nge pokuzambera nonzambo Bara.”
Jeremiya tava mu lizuvhu
18 Hompa kwa fudire nge ko komatwi eyi dina kulizuvha nge nonkore dange. 19Ame kwa fene ngwendi nzwigona ezi va huguvara vana kupwagesa va ka zi dipage, ame kapi na divire asi nyame vana kugazarera yininke yoyidona. Tava tanta asi: “Tu komangereni po sitji aso simpe siwaawa; tu mu dipageni po ngava dire hena kumudiworoka.”
20Makura tani kanderere asi: “Hompa Munankondo nadinye, ove mupangeli gouhunga; ove kukonakona yomomutjima nomagazaro govantu. Nonkango dange momawoko goge nina kudigava; ninka nge ngani mone omu ono kuvarugwida kuwoko vantu ava.”
21Vagara womoAnatoti kuna hara kudipaga nge, awo kwa tantera nge asi ngava dipaga nge, nsene asi yimo ngorooro ngani zuvhisa mbudi zaHompa. 22Makura Hompa Munankondo nadinye ta tanta asi: “Ngani va futisa! Vadinkantugara vawo ngava fa moyita; vana vawo ngava fa kerumbu. 23Na tura po siruwo sokureta siponga kovantu womoAnatoti, ano siruwo apa ngasi sika mo, nagumwe si ogu nga hupa po.”
Currently Selected:
JEREMIYA 11: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
