JEREMIYA 10
10
Ukereli wovakarunga woyimpempa noukereli wosili
1Vaisraeli, purakeneni mbudi zeni zakwaHompa. 2Age kuna kutanta asi:
“Mwa ha honena nonkedi
donomuhoko peke;
walye omu kankama mamoneko gekeguru,
mpili ngomu adi ga tjira
nomuhoko peke.
3Ukereli wovantu ava
kutupu sikwafo.
Sitji tava ka si teta mowiza;
ta si tjokora mutjokoli nonontjindjo,
4ta si limbagura nosisiliveli nongorodo.
Tava si pampara nonomboha
si dire kugwa.
5Vakarunga vangoso kwa fana
sitjiliso soyidira
mosikunino somatanga;
kapi ava uyunga;
kuvadamuna morwa kapi ava gendi.
Nokuvatjira si: kapi va mu korese,
ndi asi va mu ruganene uwa.”
6 Hompa, ove kutupu ogu ga ku fana;
ove munankondo, edina
lyoge enene alyo lyononkondo.
7Yilye gokudira kukufumadeka,
ove hompa gonomuhoko nadinye?
Ove wa wapera kukufumadeka.
Ove kutupu ogu ga ku fana mokatji
kovanongo wonomuhoko
ndi mokatji kohompa vawo.
8Navenye vapote, awo vagova.
Kovakarunga woyitji yinke eyi
ngava lirongera ko?
9Vakarunga vawo kwa va vambaika
nosisiliveli sokoSipaniya
nongorodo zokoUfasi,
nayinye oyo yirugana yononkurungu;
awo kwa va dwareka yikoverero
yoyigeha neyi yopurupuli, eyi
va tunga vatungi wononkurungu.
10Nye ove Hompa, nyove
Karunga gosili,
ove nyove Karunga gomwenyo
nahompa gwanarunye.
Nsene o handuka,
uzuni kukankama;
nomuhoko nokuvhura si
kulididimikira ehandu lyoge.
11(One mbunga, va tantereni asi vakarunga ava va dira kusita evhu neguru ngava va haraganesa po. Kapi ngava kara ko hena konauzuni.)
Rusumo rompandu kwaKarunga
12 Hompa kwa sita evhu
kononkondo dendi;
age kwa sita uzuni, yiyo ga
zanzumuna eguru kounongo wendi.
13Kompangera zendi mema
gekeguru kundunduma;
age kureta maremo ga tundilire
kouhura wevhu.
Age kuninka ruvadi ru veme
momvhura, ta tumu mpepo
zi tunde moupungwiro wendi.
14Nkenye muntu kutupu nondunge,
nayimwe si ga diva;
nkenye muhambuli govakarunga
woyimpempa yiwo vene
ngava mu fisa nomuga,
morwa vakarunga owo
ava rugana, woyimpempa,
awo hena kapi va paka mwenyo.
15Ayo yininke yomawoko‐woko,
yizoresa tupu;
awo ngava hanauka po apa nga
wiza Hompa a va vyuke.
16Karunga gwaJakopo kapi ga va fana;
age yige ga rugana nayinye,
age yiyo ga horowora Vaisraeli
va kare vantu vamwene.
Hompa Munakondo nadinye
yilyo edina lyendi.
Upika wokomeho
17Vajerusarema, one kuna mu kundurukida! Pongaikeni yiweka yeni. 18Hompa ta mu zuguma mo mosirongo esi; nga mu myona ngapa dire kuhupa nampili gumwe. Hompa yimo ga yi tanta.
19Vajerusarema tava kugu asi:
“Vana tu zonagura unene!
Yironda yetu kapi ngayi veruka.
Ose kwa gazarere asi nampo
ngatu vhura kuyididimika!
20Notenta detu vana di zungurura;
nongodi edi da di kwata
dina ndembauka.
Vana vetu navenye vana zi;
patupu ogu ana hupu po asi
a tomeke hena notenta detu;
patupu gokutura ko makehe.”
21Ame makura tani limburura asi:
“Vagendesi vetu vapote;
kapi va hundira epitisiro lyaHompa.
Yipo nye ya va sumpilire nye opo,
vantu vetu vana va haraganesa po.
22Purakeneni si! Mbudi zina wiza!
Momuhoko gokoMuzogo
epiyagano lyenene lina kara mo;
vakwayita vago ngava ninka
yitata yaJuda yi kare mburundu,
evega lyokukara vambanze.”
23 Hompa, ame na diva asi
nzira zovantu kapi za kara
mepangero lyamwene;
kutupu ogu a pangere
kukaramwenyo kwamwene.
24Pukurura vantu woge, Hompa;
wa ha tu damekerera po
ndi o tu futise nsene ono handuka;
makura ngano yilyo ehagero
lyetu ngali kara.
25Pigwira ehandu lyoge konomuhoko
edi adi dili kukutongamena
nokovantu ava va ku nyenga.
Awo kwa dipaga vantu woge;
awo kwa tu hanagura po nuunu
sirongo setu yiyo va si siga mapuku.
Currently Selected:
JEREMIYA 10: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
