JEREMIYA 12
12
Jeremiya ta pura Hompa
1“Hompa, nsene tu lipatana noge, to kara mouhunga. Nampili ngoso, tani ku pura yininke yokuhamena kousili. Vadinikarunga yinke ava ragopere ngoso?
Ava va hana usili yinke ayi va waperere?
2Ove kuvatapeka, tava simbama nondandani;
kukura tava yimi yiyimwa.
Awo kukuuyunga nkenye apa momuwa,
nye kapi ava ku pakere
nawa‐nawa mbili.
3Nye Hompa, ove wa diva nge,
ove kumona eyi ani rugana,
nomu na ku hara.
Gogomona vantu ava wovadona
ngwendi nonzwi vana kutwara kosidipagero;
va kunga dogoro kosiruwo
sedipago lyawo.
4Sirongo setu dogoro siruwoke
ngasi kukuta, nowayi womosanzara
dogoro siruwoke ngau kukuta?
Yikorama noyidira kuna kufa
morwaudinikarunga wovantu vetu,
vantu ava ava tanta asi:
‘Karunga kapi ana kumona eyi
tuna kurugana.’ ”
5 Hompa ta tanta asi:
“Jeremiya, nsene o roroka
kuduka novantu,
ngapi nye omu ngo vhura
kuduka nononkambe?
Nsene yi ku vhura kusikama
noporuzera paapa,
nsene momusitu gwaJorodana
ngapi nye?
6Nodjanyoko si vaava, vemepata
lyoge, kuna kukugombeka;
nawo kuna kulipakerera
va ku rwise.
Wa ha va huguvara
nampili va uyunge dombili.”
Eguwo lyaHompa kombunga zendi
7 Hompa ta tanta asi:
“Israel na mu zumbu;
na nyoka muhoko gwange
ogu na horowora.
Vantu ava na hara na va gava
mononkondo dononkore dawo.
8Vantu vange ava na horowora
vana pirukire nge;
moomu a kara nyime momusitu
yimo vana kunungira nge.
Makura name
yipo nina va nyenge nye.
9Vantu vange ava na horowora
kuna fana sidira esi vana kurwisa
vakakodi konombinga nadinye.
Ka zigideni yikorama yomowiza
yi ya lye sipito!
10Vapangeli wovanzi wovanayirongo
va zonagura sikunino sange soyindjembere;
va lyatagura mapya gange;
va pirura sirongo sange esi
na hara si kare mburundu.
11Va si paka mburundu;
kuna kara mapuku komeho zange.
Sirongo nasinye mburundu,
nye nagumwe si gokuyipakera mbili.
12Vantu kwa tunda konondundu
nadinye va ya hakane.
Nyame na tuma yita
yi ya hanagure sirongo mudima;
kutupu gokukara mompora.
13Vantu vange kwa kunine mahangu,
nye yiyo va zangura wayi;
awo kwa rugana unene,
nye nayimwe si va gwana po.
Morwehandu lyange lyenene,
muzangu gwawo yipo gwa lilimbira.”
Etumbwidiro lyaHompa kovamaparambo vaIsraeli
14 Hompa ta tantere nge asi: “Na kara noyuma yokuuyunga yokuhamena kovamaparambo woVaIsraeli, ava va zonagura sirongo esi na pa mbunga zange zaIsraeli. Vadinikarunga owo ngani va gusa mo moyirongo yawo ngwendi simeno, makura Juda ngani mu yoworore mo mwawo. 15Ngani mana kuvagusa mo, ntani nye ngani va fira nkenda; makura ngani tengwide nkenye muhoko oku gwa tunga kosirongo sago. 16Nsene ngava tambura nonomutjima dawo nadinye ukereli wombunga zange va gane asi: ‘Hompa muzuni’ — moomu tupu va rongere vantu vange, ngava ragopa. 17Nye nsene ngapa kara muhoko ogu guna kudira kulimburukwa, ngano ngani gu dura mo, tani gu hanagura po nuunu. Ame Hompa, nyame na yi tanta.”
Currently Selected:
JEREMIYA 12: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
