JESAYA 42
42
Mukereli gwaHompa
1 Hompa kuna kutanta asi:
“Ogu yige mukareli gwange
ogu na nkondopeka —
ame kwa mu horowora,
age yige gwa hara mwenyo gwange,
ame kwa mu zwida mpepo zange,
age nga twarera nkenye muhoko uhungami.
2Age kapi nga zigira ndi a ziguruke,
ndi asi a zuvhikise ezwi lyendi monzira.
3Ruu rokutauka kapi nga ru tezagura,
ano kage koramba,
kapi nga ka dimisa.
Age nga twara uhungami
wanarunye kwanavenye.
4Kapi nga zumbanesa endindiro
ndi uradi,
dogoro noku nga dika uhungami pevhu.
Ano yirudi kuna kundindira
erongo lyendi.”
5Karunga kwa sita maguru
yiyo ga ga zanzumuna;
kwa tura ko evhu neyi nayinye
ya kara ko;
age kwa gava mwenyo
nomuhezero kovantu navenye
ava va tunga ko.
Ano nye Hompa Karunga kuna
kutantera mukareli gwendi asi:
6“Ame Hompa kwa ku zigida,
yiyo na ku pa nonkondo
o tare asi uhungami va u rugane pevhu.
Ame ngani tura po elikwatakano
novantu navenye moroge;
ano nomuhoko ngadi gwana
uzera moroge.
7Ove ngo mahura meho govatwiku
to mangurura ava vana hingire
monodorongo dodovera.
8“Ame nyamelike Hompa
Karunga goge.
Kutupu Karunga gwapeke,
kapi ngani tarerera vakarunga woyimpempa
va gwane ko efumano lyange.
9Yininke eyi nina divisa,
yina lihorora asi yousili.
Ano nye ntaantani,
tani ku tantere yininke yoyipe
nampili kapi yina horoka simpe.”
Rusumo rompandu
10Dimbireni Hompa rusumo rorupe;
mu hamberereni uzuni mudima!
Mu pandeni, one ava omu gendi mefuta;
mu pandeni, yisitwa nayinye yemefuta!
Dimbeni, one yirongo yaure
nava mwa kara mo navenye!
11-12Mburundu noyitata yamo
yi pande Karunga;
vantu womoKedara va mu pande!
Ava va kara mositata saSera
va zigilire kondungu
zondundu morwehafo!
13 Hompa kuza koyita
ngwendi ependa;
age kuna liwapaike,
dowo‐dowo koyirwa.
Ta gava nkugo zoyita,
ekandanga lyoyirwa;
ta likida nonkondo dendi
kononkore dendi.
Etumbwidiro lyaKarunga lyokukwafa vantu vendi
14Karunga ta tanta asi:
“Siruwo sosire na mwena teete zange;
kapi na limburura mbunga zange.
Ano ntaantani siruwo
sokurugana sina siki mo nye;
ame kuna kutakuma
ngwendi mukadi ana zegama.
15Ame ngani hanagura po
yindundu nonondundu
tani kukutike wayi noyitji.
Nomuramba domema
ngani di paka nomburundu,
ano madiva gomema ngani ga pwilika.
16“Ngani gendesa mbunga zange
zontwiku mononzira
edi za dira kugenda rumwe.
Mundema gwamo ngani
gu pirura gu kare uzera
sirongo sawo soyingungunya
ngani si hetakanesa komeho zawo.
Aga yigo matumbwidiro gange,
ngani ga sikisa mo
ya hana kulimba nge.
17Navenye ava va huguvara
movakarunga woyimpempa,
tava tumbura mafano asi
vakarunga vawo,
ngava va nunupika
tava va fisa nomuga.”
Israeli ya mu sumpira kulironga
18 Hompa ta tanta asi:
“Purakeneni yipurupuru one!
None vatwiku, tareni nawa!
19Pweli nye ogu ga pitakana
moutwiku mukereli gwange,
ndi a pitakane moupurupuru
ntumi ezi ani tumu ndi?
20Israeli yinzi wa mona
nye yinke nye ya tanta ko koge?
Wa kara nomatwi gokuzuvhisa,
nye sili wa yi zuvha nawa‐nawa ndi?”
21 Hompa yige Karunga ogu
ga kara nouradi wokuparura
ano nga zerura noveta dendi
nomarongo gendi,
ano age kwa hara asi vantu
vendi ngava va fumandeke.
22Nye nani mbunga zendi kwa zi rwa;
awo kwa va zweka motukunzu
yiyo va va paterera nonodorongo.
Awo kwa va hakana tava va ru,
pwa hana ogu gokuvayoworora.
23Pweli ogu ana hara kupurakena
kweyi ndi?
Kutunda apa ngomu purakena
nye nawa‐nawa ndi?
24Yilye ogu ga gava Israeli kovanamahaka?
Amesi Hompa mwene
ogu twa zona kwendi!
Ose kapi atu vhuru kukara nomwenyo,
moomu ga tu harera tu kare nomwenyo
ndi tu limburukwe komarongo
aga ga tu pa.
25Yipo nye ga tu ninka tu dimburure
nonkondo dehandu lyendi
tu hepe kepiyagano lyoyita.
Ehandu lyendi kwa twerere
ngwendi mundiro mwazaIsraeli,
nye kapi twa divire eyi yina kuhoroka;
nayimwe si twa lirongera ko.
Currently Selected:
JESAYA 42: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
