JESAYA 43
43
Matumbwidiro gaKarunga gokuyoworora mbunga zendi
1Israeli, Hompa ogu ga ku unga
kuna kutanta asi: “Wa ha tjira —
ame ngani ku parura.
Ame kwa ku tumbura kedina —
ove gwange.
2Nsene ngo genda petondo,
ame ngani kara kumwe noge;
maudigu goge kapi ngaga ku
diinina po.
Nsene ngo genda momundiro,
kapi ngo pya;
maheteko gomadigu aga ngaga
wiza, kapi ngaga ku remeka.
3Yeeyi ame nyame Hompa
Karunga goge,
Karunga gokupongoka
gwaIsraeli, ogu a ku parura.
Egipite tani mu gava
nga ku mangurure
ngani gava Sudani naSeba.
4Ame ngani gava nomuhoko
nadinye pevega lyomwenyo goge,
morwa ove ntumbu kwange
kwa ku hara yiyo na ku fumadeka.
5Wa ha tjira — ame noge na kara!
“Ame ngani reta vantu vange kwawo,
va tundilire kantando
koUpumezuva nokoure koUtokero.
6Ngani tantera Vamuzogo
ngava va sige va ze,
noVambindakano asi
va ha va ligegera.
Sigeni vantu vange va tunde
koyirongo yaure, komaruha
nagenye gomouzuni.
7Awo vantu vaamwange
ame kwa va sitira asi
va fumadeke nge.”
Israeli ndipo zaHompa
8Karunga ta tanta asi:
Pongekeni mbunga zange kompanguro.
Awo kwa kara nomeho, nye
vatwiku; kwa kara nomatwi,
nye yipuru‐puru!
9Pongekeni nomuhoko
di wize kompanguro.
Karungake povakarunga vawo
ogu a tanta yokomeho?
Yilye po pwawo ogu ga pumba
eyi yina kuhoroka ntaantani?
Owo vakarunga va rete undipo wawo
wokulikida asi awo monzira va kara,
u horore usili wononkango dawo.
10“Mbunga zaIsraeli,
one nyone nondipo dange;
ame kwa ku horowora
o kare mukereli gwange,
asi ngano o dive nge, to pura
mwange, o yi kwate egano asi
ame nyamelike Karunga.
Kutupu hena Karunga nagepeke;
kapi ga kara ko rumwe;
hena narumwe si nga kara ko.
11“Ame nyamelike Hompa
anihuru gokukukwafa.
12Ame kwa tanta eyi ngayi horoka,
makura tani ku kwafa.
Kutupu hena Karunga gwapeke
ogu ga yi rugana eyi;
one nyone nondipo dange.
13Ame nyame Karunga
dogoro dogoro.
Kutupu gokuhenduka
nonkondo dange;
kutupu gokurundurura
eyi nina kurugana.”
Etjwayu lyomoBabironi
14Karunga gokupongoka
gwaIsraeli, Hompa ogu
a parura kuna kutanta asi:
“Ame ngani tuma mbunga
zowakwayita koBabironi,
ni ku parure;
ngani tezagura marungavero gositata,
ano elilikido lyovantu vamo
ngani li pirura li kare nonkali.
15Ame nyame Hompa, Karunga
goge gokupongoka.
Ame nyame na ku sita,
ove Israeli, ano nyame Hompa goge.”
16Nare‐nare Hompa kwa rugene
nzira mefuta,
elira momema gononkondo.
17Age kwa twere mbunga
zovakwayita zononkondo mezonauko,
vakwayita woturukara toyita nononkambe.
Tava gu va hana kupinduka hena,
tava dimi po navenye‐venye
moomu ava dimisa kinteli.
18Nye Hompa ta tanta asi:
“Mwa ha kakatera kweyi yanare
ndi mu pakere po mbili
eyi ya horauka nare.
19Tareni yoyipe eyi nani ka rugana.
Ayo nare ya horoka — nye apa
ngesi ntani muna kuyimona!
Ame ngani paka nonzira
momburundu tani mu pe mo
nomukuro domema.
20Noyikorama yeeyi
ngayi fumadeka nge;
vambanze nonompo ngadi panda nge
apa ngani ninka nomukuro
di pupe momburundu
ni gave mema kombunga
zange ezi na horowora.
21Awo vantu ava na lisitira
nyamwange, awo ngava dimba
yehamberero lyange!”
Nzo zaIsraeli
22 Hompa kuna kutanta asi:
“Nye ove Israeli, wa roroka nge;
kapi hena o kerere nge.
23Kapi o retere nge nonzambo
doge dokuswakerera dononzwi;
kapi o fumadeke nge
nononzambo doge dokutoma.
Ame kapi na ku twika udigu
wononzambo ndi ni ku rorore
pokukuhundira manganganga gokututumikidisa.
24Kapi wa randera nge manganganga
gokututumikidisa ndi asi o kutike
nge nomagadi goyimuna yoge.
Pevega lyoyo ove yiyo wa twika nge
mudigo gononzo doge;
wa rorora nge noudona ou
wa rugana.
25Nye nampili ngoso, ame nyame
Karunga ogu ani dongonona po
nonzo doge,
ame kuyiruganena eyi morwange nyaamwange.
Ame kapi ngani horeka nonzo doge.
26“Tu zeni kompanguro;
ka gaveni maunzoni!
Ka gaveni yokulikida asi
monzira muna kara!
27Zinyakurweni gomuhoverera
kwa zonene;
vapitisili veni kwa zona kwange,
28ano vapangeli veni va nyateka
upongoki wange.
Makura yipo nye na reta
ezonauko kwaIsraeli;
ame kwa siga mbunga
zaamwange va zi swaure.”
Currently Selected:
JESAYA 43: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
