JESAYA 41
41
Egwanekero lyaKarunga kwaIsraeli
1Karunga kuna kutanta asi:
“Mweneni mu purakene
nge, one yirongo yaure!
Liwapaikireni nonkango deni mompanguro;
ngomu gwana evega lyokuuyunga.
Tu pongeni tu tokore po asi
yilye gouhunga.
2“Yilye ogu ga reta mukwati
goyirongo a tunde koUpumezuva,
ta mu ninki yi mu wapere
nkenye oku ana vyuka?
Yilye a mu pe efundo kohompa nokonomuhoko?
Rufuro rwendi ngaru va
rwapeke pevhu ngwendi vava
asi mbundu tupu.
Yikutji yendi ngayi va rwapeke
ngwendi rwenge
zina kureragura mpepo.
3Age kukwama, ta konko ta gendi yoyiwa‐yoyiwa,
ta genderere monzira ezi za dira
kulyata rumwe mpadi zendi.
4Yilye ogu ga yi ninka yi horoke eyi?
Yilye ogu ga panga sitambo sahistoli?
Ame Hompa, nyame na kere po petameko,
ano ame Hompa hena nyame
ngani kara po pehagero.
5“Vantu wokoyirongo yaure
va mona eyi na rugana;
awo kutjira tava kankama kowoma.
Makura navenye tava lipongaike
va wize.
6Nonkurungu kukwafa
tadi likorangeda dene nadene.
7Muhongi goyikungu kutantera
muhambuli gongorodo asi:
Yina wapa kurugana!
Ogu a hambura yokupepura
ta korangeda gokuyipampara kumwe.
Awo tava tanta asi:
Kurotera kuwa —
nye awo tava mu pampara
karunga goyimpempa nonomboha.
8“Nye ove Israeli mukereli gwange,
one mbunga ezi na horowora,
nontekuru daAbirahamu, mukwetu.
9Ame kwa mu gusa komauhura gouzuni;
ame kwa ku zigida komakovhu
gokoure‐ure, tani ku tantere asi:
Ove mukereli gwange.
Ame kapi na ku nyenga,
nye kwa ku horowora.
10Wa ha tjira — ame noge na kara!
Ame nyame Karunga goge —
patupu yokukutjilisa!
Ngani ku nkondopeka
tani ku kwafa;
ngani ku popera tani ku parura.
11“Ava vana ku handukire
ngava fa nomuga tava swauka.
Ava vana kukurwisa, ngava fa
12tava dongonoka ko konauzuni.
13Nyame Hompa Karunga goge;
ogu ani ku nkondopeke
nina kutanta asi:
Wa ha tjira, ame tani ku kwafa.”
14 Hompa ta tanta asi:
“Israeli, nampili o nunupe ngapi
ndi o yove,
wa ha tjira, ame ngani ku kwafa.
Ame nyame Karunga
Mupongoki gwaIsraeli,
nyamelike thi gokukuparura.
15Ame ngani ku ninka o kare
ngwendi sihwageso
somazego gomape gokutwepa.
Ove ngo ka ndyambagura
nondundu to di haraganesa po;
nondundugona ngo di myona
di kare mbundu.
16Ove ngo di natagwira mompepo,
ano mpepo ngazi di reragura,
nekundungu ngali yi haraganesa po.
Makura ove ngo hafa,
yeeyi asi nyame Karunga goge.
Ove ngo fumadeka nge,
ame Karunga, Mupongoki gwaIsraeli.
17“Apa ngazi hepa mbunga zange
zi papare mema,
nonomuliu dawo
apa ngadi kukuta di notwere,
ame Hompa yipo nye ngani
limbwilira ekanderero lyawo.
Ame Karunga gwaIsraeli, kapi
ngani va siga nampili nakauke.
18Ame ngani ninka nomukuro
di pupe pokatji koyindundu yomamanya,
nomarunone gomema
ngaga pupa monomuramba.
Mburundu ngani zi situnukisa
madiva gomema,
nosirongo sa kukuta,
ngani si ninka si pupe marunone.
19Ame ngani ka menesa
momburundu yitji yosedeli
neyi yoakasiya neyi yomirete
neyi yomauzwe.
Mawiza ngaga kara mosirongo somburundu,
mawiza gomaunyandi
nonomuhongo nosiperesi.
20Vantu ngava mona eyi,
makura ngava diva asi,
nyame Hompa na yi rugana.
Awo ngava yi kwata egano asi,
Karunga Mupongoki gwaIsraeli
yige ana yi ruganesa.”
Esemeneno lyaHompa kovakarunga woyimpempa
21 Hompa, Mupangeli gwaIsraeli
kuna kuuyunga ngesi asi:
“One vakarunga woyimpempa wonomuhoko,
hororeni nonkango deni,
twareni kwaHompa gwaJakopo
nonkango deni dokufa nokutara!
22Wizeni oku mu divise ko
eyi ngayi horoka ko,
asi ngatu yi divilise apa ngayi horoka.
Fwatwilireni mbangwiliro
yihoroka yanare,
one mu tu tantere eyi yina kutanta.
23Tu tantereni eyi yina tu kara komeho —
makura ngatu dive asi one vakarunga!
Ruganeni po yimwe yoyiwa
ndi yoyidona;
mu tu zwide woma tu tjire!
24Nayinye eyi omu rugana
kutupu ko sirugana,
nava ava mu tongamene
kwa kara moyihuna!
25“Ame na horowora mugara
gumwe korwaMuzogo‐zogo,
a wize,
nga tundilira korwaUpumezuva,
ta kugu edina lyange.
Age nga lyatanga vapangeli
ngwendi asi awo erova,
moomu a lyatanga muhongi
gwerova erova.
26Yilye gopokatji keni ogu na yi divisa
asi, eyi ngayi horoka,
ose tu vhure kuuyunga asi,
one monzira mwa kara?
Kutupu nampili gumwe
ogu nga yi uyunga,
nagumwe si ga mu zuvha
tomu uyunga yuma!
27Ame, Hompa nyame
muhoverera kutantera Siyoni mbudi;
kwa tuma ntumi koJerusarema
zi ka tante asi:
Vantu woge tava wiza!
Tava tengura kembo!
28Ame eyi na tara vakarunga,
nagumwe si gomumwawo
ogu ga uyunga yuma;
nagumwe si ogu ga limburura
mapuro gange.
29Vakarunga ava navenye womawoko‐woko;
nayimwe si eyi ava vhuru kurugana —
vakarunga ava woyimpempa
va yova, awo kutupu ko nonkondo.”
Currently Selected:
JESAYA 41: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
